Read MAASAI REVISED PROTESTANT Daniel 2 Bible Online

Daniel 2 - MAASAI REVISED PROTESTANT bible

Daniel 2

¹Ore to lari li are le nkitoria e Nebukadnesa, neidetidet Nebukadnesa nenyamalu oltau lenye, neimin ninye njo.

²Neitanapisho ilo aiguanani nchere ore ilkuyantik o lasakutok o loas inenking'asia o Lkaldayo neiturrurruni te nebo pee etum aatoliki olaiguanani enkidetidet enye. Nejing'u ninche nepuonu aaitashe te dukuya olaiguanani.

³Nejoki olaiguanani ninche, “Aidetideta duoo, netanyamala oltau lai eyieu neyiolou ina kidetidet.”

⁴Nejoki Ilkaldayo olaiguanani, “Lo aiguanani, tobiko ntarasi! Toliki isinkan linono enkidetidet, pee kiliki iyie enkibalakinoto enye.”

⁵Newaliki olaiguanani Ilkaldayo ajoki, “Ore ilo rorei opuku tiatua nanu naa kedede; te nimikintayiololo intae nanu enkidetidet o empukunoto enye, nedung'udung'i intae aaitaa ndung'udung'ot, neidaikieki nkajijik inyi.

⁶Kake tinikiliki intae ina kidetidet o empukunoto enye, niyiookiki aang'amu te nanu nkishoorot o nchuneti o enkanyit kitok. Metaa entoduaaki nanu ina kidetidet o enkibalakinoto enye.”

⁷Newalu ninche aaigil eni are, “Nchoo olaiguanani eliki isinkan lenyena enkidetidet, pee kintodolu iyiook enkibalakinoto enye.”

⁸Newalu olaiguanani ajo, “Kayiolo aitisip nchere, erishata intae ing'oruru, te nkaraki nitoduaa intae aajo kaauno nanu olomoni,

⁹nchere ti nimimbalunyenye intae ina kidetidet te nanu, naa ena nabo ake endung'okinoto inyi e nkiguana. Itoning'okinote intae pee iroro elejare o rorei lemeitoriori te dukuya nanu o meibelekenyata irishat. Metaa entolikioki nanu enkidetidet pee ayiolou tenaa eikindimidimi aatoliki enkibalakinoto enye.”

¹⁰Newaliki Ilkaldayo olaiguanani aajoki, “Meetae hoo oltung'ani te nkop oidim aitabai ena yieunoto o laiguanani; amu meetae aekata olaiguanani kitok aashu ogol oikilikuanua embae naaijo ena too loibonok pooki o too lasakutok o too Lkaldayo.

¹¹Ore ena bae naikilikuanu olaiguanani naa kegol, nemeetae likae oidim aitoduaa ninye olaiguanani meteleku ake nkaitin, naa ore emanyisho enye neme te nebo ilooata seseni loo nkiri.”

¹²Ore te nkaraki ena negoro olaiguanani nerasu oleng te ngoro neitanapisho paa ore lelo tung'ana pooki ang'eni le Babilon neidaikieki.

¹³Neaku eibulayie ina kitanapata paa ore lelo tung'ana ang'eni neari metuata, neing'oru ninche Daniel o lelo le ncholiek enye, pee ear ninche metuata.

¹⁴Newaliki Daniel Ariok, ilo kitok le rripore o laiguanani, to losek o te nkarriyiano, laa ninye apa oshomo aar metuata iltung'ana ang'eni le Babilon;

¹⁵nejoki ninye Ariok, ilo kitok le rripore o laiguanani, “Kainyoo pee errish oleng ena kitanapata o laiguanani?” Neitayiolo taa Ariok Daniel ina bae.

¹⁶Nelo Daniel atua aji nesai olaiguanani meishoo ninye enkata pee etum aitoduaa olaiguanani enkibalakinoto.

¹⁷Neitoki Daniel alo atua enkaji enye, neitayiolo ina bae Hanania o Mishael o Asaria, lelo le ncholiek enye,

¹⁸nejoki ninche meing'oru olng'ur le Nkai e keper tialo ena kisudoroto, pee meidaaya ake Daniel o lelo le ncholiek enye te nebo lelo ang'eni le Babilon.

¹⁹Neboluni taa ina kisudoroto aaitodol Daniel te nduaata e kewarie. Nemayian Daniel Enkai e keper.

²⁰Nejo Daniel: “Metamayiani enkarna e Nkai ntarasi o ntarasi, amu enenye eng'eno o enkidimata.

²¹Eibelekeny ninye nkatitin o rishat; neiwuang'ie ninye ilaiguanak neput ilaiguanak; neisho ninye eng'eno nagut lelo ng'eni o eyiolounoto;

²²neitodolu ninye mbaa naagut oo nkisudorot; neyiolo ninye ina natii atua enaimin, naa ninye ebikie ewang'an.

²³Iyie, Enkai o loo papa, aaisho nanu enashe o enkisisa, amu kinchoo nanu eng'eno o engolon, nikintayiolo nanu nena nikinkilikuanutua te iyie, amu ntayiolo iyie iyiook ina bae naipirta olaiguanani.”

²⁴Nelo taa Daniel atua ine netii Ariok, laa ninye etegelua olaiguanani meidaikie lelo tung'ana ang'eni le Babilon, nelo ajoki ninye nji, “Mindaikie iyie lelo tung'ana ang'eni le Babilon; torikoki nanu mashomo dukuya olaiguanani, pee alo aitodol olaiguanani ina kibalakinoto.”

²⁵Neriku Ariok Daniel aitasieku aitijing'u meitasho te dukuya olaiguanani nelo ajoki ninye nji: “Anoto nanu tiatua lelo yarunoto ooing'uaa Yuda oltung'ani oidim aitayiolo olaiguanani ina kibalakinoto.”

²⁶Nejoki olaiguanani Daniel, laa keji apa enkarna enye Belteshasa, “Eikindim iyie aitayiolo nanu ina kidetidet natoduaa o enkibalakinoto enye?”

²⁷Newaliki Daniel olaiguanani ajoki, “Meetae iltung'ana ang'eni, anaa iloontaleng'o, anaa ilkuyantik, aashu laaing'urak loo lakir ooidim aaitoduaa olaiguanani ina kisudoroto naikilikuanua,

²⁸kake etii Enkai e shumata naa ninye nabolu nkisudorot neitayiolo ninye olaiguanani Nebukadnesa ina nayooki aaku too nkolong'i e siadi. Ore ina kidetidet ino o nena duaat e lukunya ino ina kata irragita te ndapash naa ninche kuna:

²⁹Ore te iyie, lo aiguanani, ina kata irrag te ndapash, nepuonu ndamunot oo naaidim aataa te siadi; naa ore ilo oibalunye nkisudorot nikintayiolo iyie ina nayooki aaku.

³⁰Kake ore te nanu, mme te nkaraki eng'eno ai naata alang pooki ooishu pee eibalunyeki ena kisudoroto te nanu, kake pee etumi aaitayiolo olaiguanani enkibalakinoto enye, pee itum atayiolo indamunot o ltau lino.

³¹“Itoduaa iyie, lo aiguanani, naa ng'ura, enkitanyaanyukoto kitok. Ore ena kitanyaanyukoto kitok oleng neeta ewang'an nawang oleng, neitashe te dukuya iyie, naa tenidol keitureisho.

³²Ore endukuya ena kitanyaanyukoto naa ene saabu nasila, ore olgoo lenye o nkaik naa ine nkosholai, ore enkoshoke enye o nkupesir naa ino suyai,

³³ore nkejek enyena naa ine sekenkei, ore ndapi enyena oo nkejek naa olkuroti oshula esekenkei o enterit.

³⁴Ore anaa enitoduaa etebeluaki osoit neme te nkaina e tung'ani nesulakino aosh ina kitanyaanyukoto nena kejek enyena naashula esekenkei o esarng'ab nebel ninche aitaa mbelibelat.

³⁵Neaku ore ina sekenkei o ina sarng'ab o ilo suyai o ina osholai o ina saabu nerrarra pooki aaku mbelibelat netiu anaa suut ewueji neidong'ieki enkurma te nkata e nkirowuaj, neya ninche olkutati o metaa medoli ninye enkiti enye. Kake ore ilo soit otoosho ina kitanyaanyukoto neaku oldoinyo sapuk neiput enkop pooki.

³⁶“Ena apa ina kidetidet; naa eikiliki naa taata iyiook olaiguanani enkibalakinoto enye.

³⁷Ore iyie, Laaiguanani, nira olaiguanani loo laiguanak, laa iyie eishoo Enkai e keper enkitoria o engolon o enkidimata o enkitoo;

³⁸naa atua nkaik inono etipika ninye, eneba anaa enemanya tung'ani o ng'uesi e ong'ata, o ntaritik o loing'ang'e, nikintaa iyie olaitoriani te shumata ninche pooki - iyie ina dukuya e saabu.

³⁹Ore te siadi iyie nedumunye ae kitoria nemegol anaa enino o enkae e uni o suyai naa kelo aitore enkop pooki.

⁴⁰Naa kelotu enkitoria e ong'uan, nagol anaa esekenkei, amu kebel esekenkei ntokitin pooki neitaa empunyua; naa ore anaa esekenkei napurdisho kebel nepurd kuna pooki.

⁴¹Naa ore anaa enitoduaa ndapi enyena oo nkejek o lkimojik aa esarng'ab o laitobirani eshula o esekenkei keaku enkitoria naoro; kake ore embata ndapai e sekenkei keaku ketii atua ninye, anaa ake enitoduaa esekenkei eshula o enterit.

⁴²Naa ore anaa enitoduaa lelo kimojik loo nkejek aa esekenkei nashula o enterit neijia etiu ina kitoria kegol ti ae alo neshal ti ae alo.

⁴³Ore anaa enitoduaa iyie esekenkei eshula o esarng'ab neijia etiu eshula maate aayama, kake meibung'a maate aaku nabo, anaa ake enemeibung'a esekenkei o enterit.

⁴⁴Ore tiatua nkolong'i e lelo aiguanak neun Enkai e keper enkitoria merruoyo aekata, ore enkitoria enye meya aekata kulikae tung'ana, naa kerrar ninye nkitoriat pooki neiting'ie ninche, neitashe ninye ntarasi;

⁴⁵anaa ake enitoduaa nchere etebeluaki osoit to ldoinyo neme te nkaina e tung'ani nerrar ina sekenkei o suyai o enterit o enkosholai o ina saabu. Enkai kitok naitayiolo olaiguanani ina nayooki atiu te siadi. Kedede ina kidetidet nesipa enkibalakinoto enye.”

⁴⁶Nebatata olaiguanani Nebukadnesa te nkomom enye, neserem ninye Daniel, neitanapisho pee ei taikini ninye olasar nepejokini enkorropil.

⁴⁷Nejoki olaiguanani Daniel, “Kesipa ore Enkai ino naa Enkai oo nkaitin naa Olaitoriani loo laiguanak, naa olaitodolunoni loo nkisudorot, amu indima iyie atabolu ena kisudoroto.”

⁴⁸Neisho ilo aiguanani Daniel enkitoo e shumata o nkishoorot kumok sapuki neisho ninye meitoria olosho e nkop e Babilon pooki, neitaa sii ninye olkitok loo lang'eni pooki le Babilon.

⁴⁹Neikilikuanu Daniel to laiguanani, negelu ninye Shadrak, Meshak o Abednego metaa ninche ooing'or mbaa e nkop e Babilon; kake etobiko ninye Daniel to lgoriet te nkaji o laiguanani.