Read MAASAI REVISED PROTESTANT Daniel 3 Bible Online

Daniel 3 - MAASAI REVISED PROTESTANT bible

Daniel 3

¹Neitobir olaiguanani Nebukadnesa enkitanyaanyukoto e saabu, naa ore enkadoro enye naa ntemeta e nkaina ntomoni ile naa ntemeta e nkaina ile neitasheiyie ninye enkong'ata e Dura, to lkerenket le Babilon.

²Neitoki Nebukadnesa airriwaa ilkiliku meiturrurruni ilkituaak o laitasheikinok sunashi ogelema o lbalusuni o ilaiguanak o ilashumak loo mpisai o ilkituaak loo nkitanapat o lkituaak pooki loo loshon pee epuonu enkitisinyata ina kitanyaanyukoto natesheta olaiguanani Nebukadnesa.

³Neiturrurro lelo kituaak o laitasheikinok sunashi ogelema o lbalusuni o lautarok o lashumak loo mpisai o ilkituaak loo nkitanapat o iladung'ok loo nkiguanat o lelo kituaak loo lkerenket, te nkaraki enkitisinyata e ina kitanyaanyukoto naitobirua olaiguanani Nebukadnesa; neitashe ninche te dukuya ina kitanyaanyukoto naitobirua Nebukadnesa.

⁴Ore ilo kilikuai, neibalunye to ltoilo sapuk ajo, “Eitanapaki intae, loo rere, nakuapi o lng'ejepa,

⁵nchere ore ti nining'ining'i oltoilo le mowuo o endule o lwulul loo usin o enkinanta nanyaanyukie olwulul o enkawuo oo sinkolioitin o lbene okuti te ndule o pooki pukunoto o sinkolio, nirrugogo aabaiki enkop, aaserem ina kitanyaanyukoto e saabu naitasheyie olaiguanani Nebukadnesa.

⁶Naa ore pooki ng'ae lemebatata aserem nepuoi nabo kata aanang'aki atua olkokuet le nkima oyupuyup.”

⁷Neaku ore ake pee ening iloreren ilo toilo le mowuo o lwulul loo usin o enkinanta nanyaanyukie olwulul o enkawuo oo sinkolioitin o lbene okuti te ndule o pooki pukunoto o sinkolio, ore iltung'ana pooki o loreren o lng'ejepa nebatata pooki te dukuya ina kitanyaanyukoto e saabu naitasheyie olaiguanani Nebukadnesa.

⁸Ore teina kata nepuonu kulikae Kaldayo dukuya neitang'or lelo Yahudi.

⁹Nejoki ninche olaiguanani Nebukadnesa, “Laaiguanani, tobiko ntarasi!

¹⁰Ore iyie, laaiguanani, intobira enkitanapata, nchere ore pooki tung'ani oning oltoilo le mowuo o endule o lwulul oo usin o enkinanta nanyaanyukie olwulul o enkawuo oo sinkolioitin o lbene okuti te ndule o pooki pukunoto o sinkolio naa kebatata aserem ina kitanyaanyukoto e saabu;

¹¹ore oloba anaa olemebatata aserem nenang'akini atua olkokuet le nkima oyupuyup.

¹²Etii kulikae Yahudi litegelua iyie meitasheiki mbaa olkerenket le Babilon: Shadrak o Meshek o Abednego. Eji ore kulo tung'ana, laaiguanani, mikishilaa ninche iyie; meisiaai ninche nkaitin inono aashu eserem ina kitanyaanyukoto e saabu nintasheyie.”

¹³Neitanapisho Nebukadnesa te ngoro napi meyauni Shadrak o Meshak o Abednego. Neyauni kulo tung'ana dukuya olaiguanani.

¹⁴Nejoki Nebukadnesa ninche, “Kesipa doi, Shadrak o Meshak o Abednego, nchere misiaayiayia intae nkaitin aainei aashu iserememe ina kitanyaanyukoto e saabu naitasheyie nanu?

¹⁵Ore naa taata ti niterretenate, ti nining'ining'i oltoilo le mowuo o le ndule o lwulul loo usin o enkinanta nanyaanyukie olwulul o enkawuo oo sinkolioitin o lbene okuti te ndule o pooki pukunoto o sinkolio, naa nibatatata aaserem ina kitanyaanyukoto e saabu naitobirua nanu, naa aisidai ina. Kake tinimiserememe intae, nenang'akini intae nabo kata atua olkokuet oyupuyup; naa kaa ai ina naidim atokordu intae aitayu too nkaik aainei?”

¹⁶Newaliki Shadrak o Meshak o Abednego olaiguanani nejoki, “Oo Nebukadnesa, mikiaata iyiook tipat pee kiwaliki iyie tena bae.

¹⁷Naa tenaa neijia, ore Enkai ang naa ninye kisiaai naa keidim atokordu iyiook aitayu tiatua ilo kokuet oyupuyup; naa kekordu ninye iyiook aitung'uaa enkaina ino, laaiguanani.

¹⁸Kake te neitu, tayiolo iyie, laaiguanani nchere, mikisiaai iyiook nkaitin inono aashu kiserem ina kitanyaanyukoto e saabu nintasheyie iyie.”

¹⁹Neiput Nebukadnesa engoro napi, ore enkomom enye neibelekenya arruoyo tialo Shadrak o Meshak o Abednego. Neitanapisho ninye meinoki ilo kokuet le nkima aaitulusoo katitin naapishana tena duoo kijukujuk e kiyupuyup.

²⁰Neitanap kulikae tung'ana magil le njore enye meteena Shadrak o Meshek o Abednego, nenang'aki ninche atua ilo kokuet oyupuyup le nkima.

²¹Neeni kulo tung'ana eishopito nkilani enye e atua o nioriong o nkopiyiani enye o kulikae kilani lenye, nenang'akini ninche atua olkokuet le nkima oyupuyup.

²²Ore te nkaraki narrish apa ina kitanapata o laiguanani neirowua oleng ilo kokuet le nkima, etang'amayie olng'ejep le nkima anya lelo tung'ana ootudumutua Shadrak o Meshek o Abednego.

²³Ore kulo tung'ana okuni, Shadrak o Meshak o Abednego, nesulakini eena atua ilo kokuet le nkima oyupuyup.

²⁴Neing'asia olaiguanani Nebukadnesa nedumunye nabo kata. Nejoki ninye ilarikok lenyena, “Keitu iyiook kinang'aki iltung'ana okuni eena atua enkima?” Newaliki ninche olaiguanani nejo, “Kesipa, Laaiguanani.”

²⁵Newaliki ninye ajo, “Kake adolita nanu iltung'ana oong'uan lemeena oopuoito te mpolos e nkima, neitu eiseyieki; ore o li ong'uan nenyaanyukie enkerai oo nkaitin.”

²⁶Nelotu Nebukadnesa anyiku enkutuk e ilo kokuet le nkima nayupuyup nejo, “Shadrak o Meshak o Abednego, isinkan le Nkai natii shumata aisul, wootu elepu, naa wootu ene!” Neipang'u Shadrak o Meshek o Abednego tiatua enkima.

²⁷Ore lelo kituaak o laitasheikinok sunashi oogelema o lbalusuni o laikook lo laiguanani neiturrurro te nebo nedol aajo eitu etum enkima ae golon too seseni le lelo tung'ana; ore ilpapit loo lukuny enye eitu ninye eisui, ore nkilani enye neitu eikoni ae, nemetii olng'usil le nkima ninche.

²⁸Nejo Nebukadnesa, “Meisisi Enkai e Shadrak o Meshek o Abednego, nairriwua ninye olmalaika lenye netokordua isinkan lenyena, lelo ooisiliga ninye, neitu eitaa toki enkitanapata o laiguanani, neitayu iseseni lenye alang te neisiaai neserem ae neme ina Ai enye maate.

²⁹Ore naa kaitayu enkitanapata: Ore pooki orere, o pooki kop o pooki ng'ejep oiro inaapaashare Enkai e Shadrak o Meshek o Abednego nedung'i aaitaa ndung'udung'ot, ore nkajijik enye neidaikieki; amu meetae ae Ai naidim atokordu tena pukunoto.”

³⁰Neilepie olaiguanani aisho enkitoo Shadrak o Meshek o Abednego to lkerenket le Babilon.