Read MAASAI REVISED PROTESTANT Daniel 4 Bible Online

Daniel 4 - MAASAI REVISED PROTESTANT bible

Daniel 4

¹Olaiguanani Nebukadnesa oigeroki iltung'ana pooki o loreren o lng'ejepa oomanya enkop pooki: Metoponikini intae eseriani!

²Atoduaa nanu ajo eisidai te naitodolu ilmonek o nenking'asia naataasaka Enkai natii shumata aisul tialo nanu.

³Kebaa esapuko oo lmonek lenyena le nking'asia, kebaa enkidimata oo mbaa enyena e nking'asia! Ore enkitoria enye naa enkitoria oo ntarasi, ore enkitoo enye nebaiki iishoritin o ishoritin.

⁴Ore nanu Nebukadnesa kaisikarra apa tiatua enkaji ai natudupe tiatua enkaji ai natudupe tiatua enkaji ai e nkitoo.

⁵Anoto apa nanu enkidetidet naaituria; ore airragita te ndapash naaitanyamal ndamunot o nduaat e ndukuya ai.

⁶Neaku aitanapishe nanu meyauni lelo tung'ana pooki ang'eni le Babilon meyauni dukuya nanu, pee aatum ninche aaitayiolo nanu enkibalakinoto eina kidetidet.

⁷Nepuonu ilkuyantik o loo ntaleng'o o Lkaldayo o laing'urak loo lakir atua ine natii; naliki nanu ninche ina kidetidet, kake maaidim ninche aatoliki nanu enkibalakinoto enye.

⁸Ore te siadi nelotu Daniel dukuya nanu - ilo apa oji enkarna Belteshasa aaipotie enkai ai, naa atua ninye etii enkiyang'et oo nkaitin sinyat naliki nanu ninye ina kidetidet, ajoki,

⁹“Iyie Belteshasa, olkitok loo lkuyantik, ore te nkaraki nayiolo nanu ajo etii enkiyang'et oo nkaitin sinyat atua iyie nemeetae enkisudoroto nagol te iyie, ena kidetidet nanu atoduaa; tolikioki nanu enkibalakinoto enye.

¹⁰Ore nena duaat e ndukuya ai ina kata airragita te ndapash naa kuna: Atoduaa nanu, naa ng'ura, olchani te mpolos e nkop; ore enkadoro enye naa eikitok.

¹¹Nebulu ilo shani negolu ore enchumata enye nebaiki keper, naa kelioo te neiting'ie enkop pooki.

¹²Ore mbenek enyena naa eisidain naa kumok ilng'anayio lenyena, ore ilo shani netii endaa e pooki toki. Netum ing'uesi e ong'ata oloip ti abori ninye ore ntaritik o loing'ang'e nemany ilng'osil lenyena, ore pooki toki naishu neitoti te ilo shani.

¹³“Atoduaa nanu te nena duaat e ndukuya ai ina kata airragita te ndapash, naa ng'ura, olarriponi, ilo osinya, nelotu adou eing'uaa shumata.

¹⁴Neyietu aishir nejo nji, ‘Entudung ilo shani meturori, nisulaa ilng'osil lenyena, nidung'oo mbenek enyena nindapashasha ilng'anayio lenyena; nchoo ng'uesi eisik aapuo te ntonata enye neisik ntaritik too lng'osil lenyena.

¹⁵Kake entung'uai enkobei o ntona enyena te nkop, eena te sekenkei o to suyai te mpolos oo nkujit naanana e ong'ata. Nchoo ninye eshalu te nkoileelio e shumata; nchoo erishata enye eaku te nebong'uesi tiatua nkujit e nkop;

¹⁶nchoo eibelekenya endamunoto enye e tung'ani naa nchoo eishori ninye endamunoto e ng'ues naa nchoo nkatitin naapishana egiroo ninye.

¹⁷Ore ina dung'okinoto e nkiguana ene lelo arripok, embae natudung'oki to rorei le lelo sinyat, pee eyiolou ilooishu pooki nchere ore ilo otii shumata aisul ninye oitore enkitoria oo ltung'ana, neisho ninye ilo oyieu, nepik shumata ninye ilo oshal.’

¹⁸Ore ena kidetidet, nanu olaiguanani Nebukadnesa, otadua. Naa ore iyie Belteshasa, mbalunye enkibalakinoto, te nkaraki ore lelo tung'ana pooki ang'eni le nkitoria ai maaidim aaitayiolo nanu enkibalakinoto, kake indim iyie, amu etii enkiyang'et oo nkaitin sinyat atua iyie.”

¹⁹Neitoki Daniel, apa oji enkarna enye Belteshesa, aing'asia te nkiti rishata neitanyamal ndamunot enyena ninye. Nejo olaiguanani, “Belteshesa, mincho kintanyamal ina kidetidet aashu enkibalakinoto.” Newalu Belteshasa ajo, “Olkitok lai, metaa ina kidetidet ene lelo likimba iyie ore enkibalakinoto enye neaku enoo lmang'ati linono!

²⁰Ore ilo shani litodua iyie, otubulua negolu o metabaiki enchumata enye keper, naa dapash ninye abaiki enkop pooki;

²¹laa eisidan mbenek enyena naa kumok ilng'anayio lenyena, naa ninye etii endaa e pooki toki; naa abori ninye etumie ng'uesi e ong'ata oloip, naa ilng'osil lenyena emanya ntaritik o loing'ang'e

²²iyie, ilo laaiguanani, itubula nigolu. Etubulua enkitoo ino o metabaiki shumata ore enkitoria ino netabaikia lubot e nkop.

²³Ore eing'orisho olaiguanani nedou ilo arriponi, sinyati eing'uaa shumata ejo, ‘Entudung entuuroi olchani ninyalinyala ninye, kake entung'uai enkobei o ntona enyena te nkop, eena te sekenkei o to suyai, too nkujit naanana e ong'ata; naa nchoo erubata enye eaku te nebo ng'uesi e ong'ata o metaba anaa negiroo ninye nkatitin naapishana;’

²⁴ena ninye enkibalakinoto enye, laaiguanani: Enkitanapata e ilo otii shumata aisul, ninye shumata olkitok lai olaiguanani,

²⁵nchere eikipuoi aaraa iyie aaitung'uaa iltung'ana, ore emanyisho ino naa keaku te nebo ing'uesi e ong'ata; eikinchori iyie inosa nkujit anaa olkiteng, naa eishalu iyie te nkoileelio e shumata, naa eikigiroo iyie nkatitin naapishana o metaba anaa niyiolou ajo ilo otii shumata aisul oitore enkitoo e tung'ana, neisho ninye ilo oyieu.

²⁶Naa ore anaa enaitanapishoteki pee eing'uari enkobei o ntona e ilo shani, naa kelo enkitoria ino adedeyu ebaiki ina kata niyiolounye ajo keper naitoreisho.

²⁷“Metaa naa laaiguanani nchoo enkikoo ai eng'amaroyu te iyie; nturrai ing'ok inono te asata e sipata, o ntorrok inono te nkitodolunoto o lng'ur too looitorogonyaki, pee ebaiki neponari nkolong'i inono e seriani.”

²⁸Eewuo ena pooki shumata olaiguanani Nebukadnesa.

²⁹Ore te siadi ilapaitin tomon o are neloito ninye te nchumata e nkaji e nkitoo e Babilon,

³⁰nejo olaiguanani, “Aimekitok ena Babilon natesheta nanu te ngolon ai kitok metaa enkaji e nkitoo nairragie o te nkitoo e nkitoria ai.”

³¹Ore eton epuku kulo rorei te nkutuk o laiguanani, nedou oltoilo oing'uaa keper, “Olaiguanani Nebukadnesa, kirorieki iyie: Kishomo enkitoria aing'uaa iyie,

³²naa aikiarari iyie aaitung'uaa iltung'ana, ore emanyisho ino naa keaku te nebo ing'uesi e ntim; naa keaku inya iyie nkujit anaa olkiteng; naa eikigiroo iyie irrishat naapishana o metaba anaa niyiolou ajo ilo otii shumata aisul oitore enkitoo etung'ana, neisho ninye ilo oyieu.”

³³Ore ina kata ake neitabari ilo rorei to laiguanani Nebukadnesa. Nearari ninye aaitung'uaa iltung'ana, nenya nkujit anaa olkiteng, neshalu osesen lenye, te nkoileelio e shumata o metubulu ilpapit lenyena te nkadoro anaa nkopir o lkurragos, netiu iloisotok lenyena anaa loo lmotonyi.

³⁴Ore te siadi nena olong'i, nashumu nanu Nebukadnesa nkonyek aainei aing'or shumata, naarrinyokino nanu ndamunot aainei, naisis nanu ilo otii shumata aisul, naisis nayanyitu ilo oishu ntarasi; amu ore enkitoria enye naa enkitoria oo ntarasi, ore enkitoo enye nebikoo too ishoritin o ishoritin

³⁵ore lelo pooki oomanya enkop neikenaki aajo pesho; neas ninye te risioroto e yieunoto enye to lorora le shumata o tiatua lelo oomanya enkop; nemeetae oloidimaa enkaina enye, aashu ejoki ninye, “Kaa iasita iyie?”

³⁶Ore teina kata ake naarrinyokino nanu endamunoto ai; ore te nkaraki enkitoo e nkitoria ai naarrinyokini enkisisa o enkishiaa. Naaing'oru ilaikook o lkituaak laainei, naapiki nanu atua enkitoria ai, naaponikini nanu enkitoo sapuk.

³⁷Ore nanu Nebukadnesa naisis naserem nayanyitu ilo Aiguanani le shumata; amu ore isiaaitin enyena pooki naa neitoriori. Ore nkoitoi enyena nesipa. Naa ore lelo oopuo to lwuasa keidim ninye aitadou.