Read MAASAI REVISED PROTESTANT Daniel 5 Bible Online

Daniel 5 - MAASAI REVISED PROTESTANT bible

Daniel 5

¹Neitobir apa olaiguanani Belshasa osirua kitok te nkaraki ilkituaak lenyena enkalifu nabo, neok ninye enaisho oo sabibu te dukuya lelo enkalifu nabo.

²Ore ake pee eishamisham Belshasa enaisho, neitanapisho nchere ore nena masaa e saabu o nenkosholai apa naaitayio Nebukadnesa papaai lenye tiatua enkaji e Nkai te Yerusalem meyauni, pee etum olaiguanani o lkituaak lenyena o nkituaak enyena o nkapiak[2] enyena aatookishore ninche.

³Neyau ninche nena masaa e saabu o ne nkosholai apa naaitayioki tiatua enkaji e Nkai, teina aji e Nkai te Yerusalem. Neokishore olaiguanani ninche o lkituaak lenyena o nkituaak enyena o nkapiak enyena.

⁴Neok ninche enaisho oo sabibu, nerrep nkaitin, nena aitin e saabu o nenkosholai o nosuyai, o nesekenkei o enosoit.

⁵Ore nabo kata neliooyu ilkimojik le nkaina e tung'ani neiger enturoto naelare esuntai e nkaji o laiguanani enkipirakinoto oiket lo ltaa; nedol olaiguanani ina aina eigerisho.

⁶Neibelekenya emua o laiguanani, neitanyamal ninye ndamunot enyena, nelepori irubat osesen lenye neikirikira nkung aaosho.

⁷Neyietu olaiguanani abuaku pee eyakini iloibonok o Lkaldayo o laduaak. Nejoki olaiguanani lelo tung'ana ang'eni le Babilon, “Ore oloba anaa oloisoma ele sirata nelimu enajo ninye, naaitodol nanu enkibalakinoto enye neishopokini olkila sintet nepiki olpisiai le saabu aaitaman emurt enye, nelo ninye aaku oloitoreisho liokuni te nkitoria.”

⁸Nejing'u lelo ang'eni pooki lo laiguanani, kake meidim ninche aaisoma ilo sirata aashu eitayiolo olaiguanani enkibalakinoto.

⁹Nenyamalu oleng ilo aiguanani Belshasa neibelekenya emua enye, neiputukuny lelo kituaak lenyena.

¹⁰Ore enkitok o laiguanani, te nkaraki irorei lo laiguanani o lelo kituaak lenyena, nelotu olgilata oitoomonishoreki, nejo ina kitok olaiguanani, “La aiguanani, tobiko ntarasi! Mincho ndamunot inono kintanyamal aashu emua ino eibelekenya.

¹¹Etii atua enkitoria ino oltung'ani otii atua ninye enkiyang'et oo nkaitin sinyat. Ore apa too nkolong'i e papaai lino, nenotoki tiatua ninye ewang'an, o eyiolounoto o eng'eno natiu anaa eng'eno oo nkaitin, ore apa olaiguanani Nebukadnesa, papaai lino, neitaa ninye olkitok loo lkuyantik, oloo ntaleng'o, Ilkaldayo o laing'urak loo lakir,

¹²te nkaraki naa ore oltau sidai o eng'eno o ening'unoto nalimunye enkibalakinoto oo nkidetidetat oo iloyiotiaa neiwuang'ie inyamalaritin nenotoki tele tung'ani oji Daniel, apa oishoo olaiguanani enkarna ajo Belteshasa. Nchoo naa eipotuni Daniel pee eitodolu ninye enkibalakinoto ele sirata.”

¹³Neitijing'uni Daniel meeu dukuya olaiguanani. Nejoki olaiguanani Daniel, “Ira iyie lido Daniel, apa ora obo loo yarunot le Yuda, apa oyaua olaiguanani papa lai te Yuda.

¹⁴Atoning'o ilomon linono nchere etii enkiyang'et oo nkaitin sinyat atua iyie nenotoki sii ewang'an o eyiolounoto o eng'eno nagut tiatua iyie.

¹⁵Etorikuoki taata ilang'eni o loo ntaleng'o meetu dukuya nanu pee eisom ele kigeroto naaitayiolo nanu enkibalakinoto enye; kake meidim ninche aaitodolu enkibalakinoto ena bae.

¹⁶Kake atoning'o nanu nchere indim iyie atolimu nkibalakinot niwuang'ie enyamali. Ore naa taata ti nindim iyie aisoma ele kigeroto nikintayiolo nanu enkibalakinoto, nikinchopokini olkila sintet, nikipiki olpisiai le saabu aaitaman emurt ino, niaaku oliokuni oitoreisho te nkitoria.”

¹⁷Newal Daniel te dukuya olaiguanani ajo, “Nchoo nkishoorot inono eaku ininono, naa nchoo nena kishoorot inono likae; ore ake eyia kaisomaki nanu olaiguanani ilo kigeroto naitayiolo ninye enkibalakinoto e ilo kigeroto.

¹⁸Lo aiguanani, eishoo Enkai kitok oleng Nebukadnesa, papaai lino enkitoria o enkisisa o esikar;

¹⁹naa ore te nkaraki ina kitoo naishoo Enkai ninye eikirikirate iltung'ana pooki o loreren o lng'ejepa neureishoyu te dukuya ninye; ore oloyieu near metua near metua; ore oloyieu neitopok neitopok; ore ilo oyieu neilepie, neilepie, ore oloyieu neitadou neitadou.

²⁰Kake ore ake pee eilepunye oltau lenye neitagol oltau metaa keasisho to lwuasa neiwuang'ieki ninye te ilo orika lenye le nkitoo, neyae enkitoo enye aaitung'uaa ninye;

²¹neerari ninye aitung'uaa iltung'ana, neitotiuni ndamunot enyena anaa ineng'ues, ore emanyisho enye neaku te nebo isirkon le ntim; neitoti ninye too nkujit anaa olkiteng, neshalu osesen lenye te nkoliolio e shumata o metaba anaa neyiolou ninye ajo Ina Ai natii shumata aisul naitore enkitoria e tung'ana, nepik shumata ninye ilo oyieu ninye.

²²Naa ore iyie, olayioni lenye, Belshasa, eitu intobor oltau lino hoo niyiolo kuna pooki,

²³kake ilepunye kewan nigilunore Olaitoriani le keper; ore nena masaa e nkaji enye neitijing'uaki aayau dukuya iyie, ore iyie o lkituaak linono o nkituaak inono o nkapiak inono nitookie ninche enaisho oo sabibu, nirrepirrepe intae nena aitin e nkosholai o ne saabu o nosuyai o nesekenkei o nenchata o nosoit, nena nemedolisho aashu ening'isho aashu eyiolo, kake ore ina Ai naa enkaina enye etii enkiyang'et ino netii inkoitoi inono pooki neitu iyie iyanyit.

²⁴“Neaku teine netii ninye eirriwuaki ina aina, nesiri ele kigeroto.

²⁵Naa ele kigeroto otisiraki: MENE, MENE, TEKEL, o PARSIN.

²⁶Ena enkibalakinoto ena bae: MENE, eikena Enkai nkolong'i e nkitoria ino neyau ninye enkiting'oto;

²⁷TEKEL, kineneng'aki iyie te ntemet naineneng'ishoreki nedoli aajo ing'or.

²⁸PERES, etooroki enkitoria ino neishori ile Mede o le Pasia.”

²⁹Neitoki Belshasa aitanapisho neishopokini Daniel olkila sintet o lpisiai le saabu oitamanaki emurt enye, nelimuni aaibalunye naaipirta ninye, nchere keaku ninye o liokuni oitoreisho te nkitoria.

³⁰Ore ina kewarie ake neari Belshasa ilo aiguanani loo Lkaldayo metua.

³¹Neng'amu Darius le Mede enkitoria, aa oloo larin oobaya ntomoni ile oaare.