Read MAASAI REVISED PROTESTANT Daniel 6 Bible Online

Daniel 6 - MAASAI REVISED PROTESTANT bible

Daniel 6

¹Eitishipa apa Dario pee epik ilbalusuni iip o tikitam meitoreisho tiatua enkitoria enye pooki;

²ore shumata ninche naa ilkituaak okuni, laa Daniel apa obo, aa ninye eyaki kulo balusuni ilomon, pee metum ake olaiguanani eng'orikinoto.

³Ore apa ilo Daniel nening'oyu oleng alang lelo kituaak pooki o lbalusuni, amu etii apa enkiyang'et sidai atua ninye. Neitobir olaiguanani pee epik ninye shumata enkitoria pooki.

⁴Ore lelo kituaak o lbalusuni neing'oru enaitang'orie Daniel tialo enkitoria; kake eitu ninche etum enaitang'orie aashu eleyiata, amu keisiligayu apa ninye, nemeetae enkitadiaata aashu eleyiata nanotoki te ninye.

⁵Neitoki kulo tung'ana aajo, “Mikitum ae kitang'oroto aashu eniking'unyung'unyakinye ele Daniel meteleku ake ti niking'oru tialo nkitanapat e Nkai enye.”

⁶Nening'okino kulo kituaak o lbalusuni embae nayaki olaiguanani, nepuonu aajoki ninye, “Olaiguanani Dario, tobikoi ntarasi.

⁷Ore iyiook pooki oosiaisho te nkitoria ino - ilaitasheikinok, o lbalusuni, o laitasheikinok loo lkerenketi, o lkulikae arikok, nikitoning'okinote nchere pee eitobir olaiguanani enkitanapata, neitirrishi oleng, nchere ore pooki ng'ae oserem ae ai aashu tung'ani too nkolong'i tomon uni, metelekuake iyie lo aiguanani nenang'akini ninye eululu oo lng'atunyo.

⁸Ore naa taata, la aiguanani, intobira ina kitanapata nipik olmishire ina natoning'okinoteki pee meidimi aaibelekenya, anaa enatiu nkitanapat oo Lmedi o Lparsian, nena nemeidimi aaibelekenya.”

⁹Neaku etipika apa olaiguanani Dario olmishire ina palai neimie.

¹⁰Ore ake pee eyiolou Daniel nchere etipikaki olmishire ina naimieki nelo ninye enkaji enye ebolo ildirishani le nkaji e shumata eing'orita Yerusalem; negil ninye kung katitin uni te nkolong neomon neishooyo enashe te dukuya Enkai enye, anaa apake enataasa.

¹¹Neitoki kulo tung'ana aapuonu te ning'okinoto neinepu Daniel esaisho neomon te dukuya Enkai enye.

¹²Neitoki ninche aapuonu aanyiku nejo te dukuya olaiguanani, “Amaa, tialo enkitanapata, la aiguanani! Keitu iyie ipik olmishire ina natoning'okinoteki; nchere ore pooki tung'ani osaisho tiae ai aashu te tung'ani tiatua nkolong'i tomoni uni meteleku ake te iyie, la aiguanani, nenang'akini atua eululu oo lng'atunyo?” Newal olaiguanani ajo, “Keuno ina bae, anaa enatiu enkitanapata oo Lmedi o enoo Lpasi, nena nemeidimi aaibelekenya.”

¹³Neitoki ninche aawal te dukuya olaiguanani ejo, “Ore lido Daniel ora obo loo yarunot ooitung'uari Yuda, mikishilaa ninye iyie, laaiguanani, aashu ina naimieki nitipika olmishire, kake keomon ninye asaisho katitin uni te nkolong.”

¹⁴Ore ake pee ening olaiguanani kulo rorei, neing'oru eneiko pee ekordu Daniel; nenyamalu o metadoi enkolong pee ekordu ninye.

¹⁵Neitoki kulo tung'ana aapuonu te nkiguanakinoto enetii olaiguanani, nejoki olaiguanani, “Tayiolo, laaiguanani, nchere enkitanapata ena oo Lmede o Lpasi naa nchere meetae enatudung'o olaiguanani aashu enkitanapata naidimi aaibelekenya.”

¹⁶Neitoki olaiguanani aitanapisho, neyauni Daniel nenang'akini atua eululu oo lng'atunyo. Nejoki olaiguanani Daniel, “Inchoo Enkai ino, ina nisiaaita anaake kikordu iyie!”

¹⁷Neyauni osoit aairragie te nkutuk e ina ululu nemishir olaiguanani to lmishire lenye o to lmishire loo lkituaak lenyena, nchere meetae embae naidimi aaibelekenya tialo Daniel.

¹⁸Nelo olaiguanani enkaji enye e nkitoo, neen kewan ina kewarie pee menya endaa, nemeetae nkinantani naayakaki ninye, nelau ninye njo.

¹⁹Ore enamanarie enkakenya nedumunye olaiguanani neisarrisar alo eululu oo lng'atunyo.

²⁰Ore pee elotu ninye ataaniki ina ululu natii Daniel neyietu aishir to ltoilo lo sina nejoki Daniel, “Oo Daniel, osinka le Nkai naishu, eikindima duoo Enkai ino ina nisiaai anaake atokordu too lng'atunyo?”

²¹Nejoki Daniel olaiguanani, “La aiguanani, tobiko ntarasi!

²²Eirriwua Enkai ai olmalaika neiken nkutukie oo lng'atunyo, neitu ninche aainyal, amu aatoduaki aajo maata entioto te dukuya ninye, o te dukuya iyie sii, laaiguanani, eitu aas entorrono.”

²³Neng'idayu ilo aiguanani oleng, neitanapisho meitayuni Daniel tiatua eululu. Neaku eitayioki apa Daniel tiatua eululu nemetii hoo olkordata le nkinyalata onotoki te ninye, enkaraki apa naisiliga ninye Enkai enye.

²⁴Neitanapisho olaiguanani, ore lelo tung'ana apa ooitang'oro Daniel neyauni, nenang'akini atua eululu oo lng'atunyo, ninche, o nkera enye o nkituaak enye; naa ore eitu ninche ebaiki abori ina ululu neng'amaa ilng'atunyo ninche negiligil iloik lenye.

²⁵Neitoki olaiguanani Dario aigeroki iloreren pooki, o nkuapi pooki o nkutukie pooki naatii enkop pooki ajo: “Metoponikini intae eseriani.

²⁶Aitobira nanu enkitanapata nchere ore tiatua enkitoria ai pooki neikirikira iltung'ana te nkuretisho te dukuya Enkai e Daniel, Amu Enkai naishu ninye, nebik ntarasi; meidak aekata enkitoria enye, naa enoontarasi enkitoo enye.

²⁷Kekordu ninye nesaru, neas ninye nkitoduaat e nking'asia te shumata o te nkop, ilo laa ninye oitajewuo Daniel aitung'uaa engolon oo lng'atunyo.”

²⁸Neaku etubula apa ele Daniel te nkata e nkitoria e Dario o enkitoria e Sairas ilo le Parsian.