Read MAASAI REVISED PROTESTANT Daniel 7 Bible Online

Daniel 7 - MAASAI REVISED PROTESTANT bible

Daniel 7

¹Ore to lari le dukuya le Belshasa, olaiguanani le Babilon, netum Daniel enkidetidet o nduaat e ndukuya enye ina kata apa eirragita te ndapash enye. Neiger ninye ina kidetidet, nelimu esiana e ina bae.

²Nejo Daniel, “Atoduaa nanu te nduaata ai kewarie, lelo kutat ekut too lubot ong'uan e shumata te ngolon enaiposha kitok.

³Neipang'u ing'uesi ong'uan aapuku tiatua enaiposha, nemeetae enanyanyukie enkae.

⁴Ore ene dukuya nenyaanyukie olng'atuny neeta inaipuko o lkurragos. Ore aing'orita nanu nedotuni inaipuko enyena, neilepieki ninye te nkop neishori ninye meitasho too nkejek are anaa oltung'ani, neishori ninye endamunoto e tung'ani.

⁵Ore eng'ues e are, neikununo anaa olng'arurumi. Neilepieki ninye te nkalo nabo; neeta ninye ilaras okuni te nkutuk enye, too rishat oo lala lenyena; netiaakaki apa ninye, ‘Tudumunye inosa nkiri oleng.’

⁶Ore te siadi ena naing'orisho nanu nadol enkae ng'ues, nanyaanyukie olowuaru keri, neeta inaipuko ong'uan e motonyi te nkoriong enye; neeta ina ng'ues ilukuny ong'uan neishori ninye enkitoria.

⁷Ore te siadi ena nadol nanu too nduaat e nkewarie, eng'ues e ong'uan, torrono neitureisho negol oleng; neeta ilala sapuki le sekenkei; kenyaisho ninye negiligilisho, neituny ilekunot too nkejek enyena. Nemenyanyukie ninye nena ng'uesi pooki apa naatii dukuya ninye, neeta mowuarak tomon.

⁸Atisipua nanu nena mowuarak, nadol etupukuo tiatua ninche enkae mowuo, enkiti, naa te dukuya ninye etadotuoki imowuarak uni oo naduoo e dukuya, naa ng'ura ena mouo netii nkonyek naanyaanyukie nkonyek o ltung'ani o enkutuk nairo mbaa sapuki.

⁹“Ore aing'orisho nanu, neirragieki ilorikan le nkitoo, ore obo otobikoyie ilarin kumok netonie olorika lenye; ore ilkilani lenyena neibor anaa soito le nchan, ore ilpapit le ndukuya enye neikununo anaa ilpapit loo nkerra; ore ilo orika lenye le nkitoo naa ilng'ejepa le nkima ooyupuyup, ore nkejek oo ngarrin enyena naa enkima nayupuyup.

¹⁰Nepuku olkeju le nkima nelo aim dukuya ninye; neisiai ninye nkalifuni o nkalifuni, ore te dukuya ninye neitashe nkalifuni tomon katitin nkalifuni tomon; neton enkiguana eiguanare, neboli mbukui.

¹¹“Naing'orisho taa nanu te nkaraki ilo toilo le lelo rorei sapuki ooiroro ina mouo. Naa ore aing'orita, neyieng'i ina ng'ues, neinyali osesen lenye neishoori metapeji te nkima.

¹²Ore nena kulie ng'uesi neoruni enkitoria enye, kake ore enkishui enye neitoodoroki te rishata o te nkata.

¹³Atoduaa te nduaata e kewarie, naa, ore too nkatampo e shumata nelotu obo onyaanyukie enkerai e tung'ani, nelotu enetii Ilo otobikoyie ilarin kumok neitarasari te dukuya ninye.

¹⁴Neishori ninye erikore o enkitoo o enkitoria, pee etum iltung'ana pooki, o nkuapi, o lng'ejepa aaisiaayia ninye. Ore enkitoria enye naa enkitoria oo ntarasi nemeish aekata, Ore enkitoo enye naa enkitoo oo ntarasi, nemeish aekata, naa nabo enkitoria enye nemeidimi aaidaikie.

¹⁵“Ore tialo nanu, Daniel, nelimana oltau lai tiatua nanu, ore nena duaat e ndukuya ai naaitanyamal.

¹⁶Atataanikia nanu obo le lelo ooitashe teine naikilikuan esipata naipirta kuna pooki, neaku aatolikio ninye, naaibalakinye nanu enkibalakinoto e kuna tokitin.

¹⁷‘Ore kuna ng'uesi pokira ong'uan kituaak naa ilaiguanak oong'uan ooyooki aaipang'u te nkop.

¹⁸Kake ore lelo sinyat le ilo Otii Shumata Aisul naa keng'amu enkitoria, neaku enkitoria enenye ntarasi, o ntarasi o ntarasi.’

¹⁹“Naitoki ayieu nayiolou esipata naipirta ina ng'ues e ong'uan napaashari ninye too nkulie, naitureisho oleng, neeta ilala lenyena le sekenkei o loisotok lo suyai; nenyaisho negiligilisho neituny ilekunot too nkejek enyena;

²⁰o naaipirta nena mouwarak tomon naatii endukuya enye o ina ae mouo naa te dukuya ninye etigilari uni enye, ina mouo naata nkonyek o enkutuk nairo mbaa sapuki naaijo ninye kitok te nena naaboitare.

²¹Ore aing'orisho nanu neitayunye ena mouo olarrabal lelo sinyat, nemir ninche,

²²o metaba anaa nelotu Ilo Otobikoyie, neiguanareki lelo sinyat le Ilo Otii Shumata aisul, nebau ina kata pee eishori lelo sinyat enkitoria.

²³“Nji etejo ninye, ‘Ore tialo ina ng'ues e ong'uan, kelotu enkitoria e ong'uan enkop, naa kepaashari ninye too nkitoriat pooki, naa kemut ninye enkop, pooki, neituny, negiligil.

²⁴Ore nena mowuarak tomon naa ilaiguanak tomon, naa kedumunye likae te siadi ninche; naa kepaashari ninye te kuldo le dukuya, naa keiwuang'ie ninye ilaiguanak okuni.

²⁵Keiro ninye mbaa naapaashare Ilo Otii Shumata Aisul, naa kelo ninye ainaur lelo sinyat le Ilo Otii Shumata Aisul, nedamu pee eibelekeny nkatitin o nkitanapat; naa keishoori ninche aapik atua e nkaina enye te nkiti kata, katitin are o lpisiai le nkata.

²⁶Kake keton enkiguana aiguana, ore enkitoo enye naa keyae aaitung'uaa ninye, pee eishieki neinyali aaiting'ie.

²⁷Ore enkitoria o enkitoo o engolon oo nkitoriat naatii abori shumata pooki, neishori iltung'ana loo sinyat le Ilo Otii Shumata Aisul; ore enkitoria enye naa keaku enkitoria oo ntarasi, ore enkitoo pooki neisiai nening ninche.’

²⁸“Ena enkiting'oto e ina bae. Ore tialo nanu Daniel, aaitanyamala ndamunot aainei oleng. Ore tialo nanu Daniel, aaitanyamala ndamunot aainei oleng, neibelekenya emua o sesen lai; kake atushuma ina bae too ndamunot aainei.”