Read MAASAI REVISED PROTESTANT Daniel 8 Bible Online

Daniel 8 - MAASAI REVISED PROTESTANT bible

Daniel 8

¹Ore to lari liokuni le nkitoria o laiguanani Belshasa nadol nanu enduaata e are.

²Nadol nanu teina duaata; naa ore apa pee adol, natii Susa ina anasa kitok, natii olkerenket le Elam; nadol apa nanu te nduaata, atii embata olkeju le Ulai.

³Naraposhu nkonyek aainei nadol olmeregesh oitashe te ngilata o lkeju. Neeta imowuarak are; ore nena mowuarak pokira are naa kaadoru oleng, kake keado nabo alang enkae, ore ina naado neilep oleng, nelotu ina naado te siadi enkae.

⁴Nadol nanu ilo meregesh eipusho te nkalo o loo ntoluo, o moikuape o kopikop; nemeetae eng'ues naidim aitasho te dukuya ninye; nemeetae hoo obo oidim atokordu enatii abori engolon enye; etaasa anaa enayieu makewan nerup kewan aitaa sidai.

⁵Ore aibirribirrita, ng'ura, nelotu oloro eing'uaa enkalo o loo ntoluo eimu oriong enkop pooki eitu eibung enkop; neeta ilo oro emowuo e nking'asia te rishata oo nkonyek enyena.

⁶Nelotu ninye enetii ilo meregesh oata imowuarak are, ilo duoo latoduaa nanu eitashe te ngilata o lkeju, nekuetiki ninye te ngoro enye kitok.

⁷Nadol ninye eeuo anyikaki ilo meregesh neiponyare ninye, neosh ilo meregesh negil nena mowuarak enyena pokira are; neitu eitoki ilo meregesh aata engolon naitasheyie te dukuya ninye, kake etanang'ie ilo oro ninye enkop neituny ninye; nemeetae hoo obo oidim atokordu ilo meregesh aitung'uai engolon enye.

⁸Neisis ilo oro kewan oleng, kake ore ina kata egol ninye, negila ina mouo enye kitok, ore te rishata enye, nepuonu imowuarak ong'uan e nking'asia naaing'uaa ilubot pokira ong'uan e shumata.

⁹Etubulua emowuo nabo teina kiti mouo, natubulua oleng aipir enkalo e kopikop, neipir enkalo o loo saen neipir ina kop kitok.

¹⁰Nebulu ninye oleng o metabaiki olorora le shumata, ore embata o lorora loo lakir nesulaki ninye enkop, neituny ninche.

¹¹Nerup ninye kewan o te ilo kitok lo lorora; ore olasar opejori anaake neiwuang'ieki te ninye, ore ewueji e manyisho enye nenang'ari.

¹²Neishori ninye ilo orora te nebo ilo asar opejori anaake te ngilata oo nkitanapat; ore esipata nenang'akini enkop, neas ina mouo anaa enayieu nedupoyu.

¹³Naitoki nanu aning osinyati eiro; ore likae sinyati nejoki ilo oiroro, “Ae te nkata nabaa eetae ina duaata naipirta ilo osar opejori anaake, o ina gilata oo nkitanapat naitaa olmuaate, o ina naishooyioki emanyisho enye, o lorora meitunyi too nkejek?”

¹⁴Nejoki ninye, “Too nkalifuni are o iip uni oo nteipai o nkakeny; nerrinyokini taa enkaji e Nkai enapake wueji enye.”

¹⁵Ore nanu, Daniel, pee aidip atoduaa ina duaata, nanyok ajo ayiolou, naa ng'ura, eitashe teine te dukuya nanu obo oata empukunoto o ltung'ani.

¹⁶Naning nanu oltoilo lo ltung'ani te rishata oo ngilat o lkeju le Ulai, neipotisho ilo toilo ajo, “Gabriel, nchoo ele tung'ani ening'u neyiolou enduaata.”

¹⁷Neaku etinyikua ninye alotu ine apa naitasheyie nanu; ore pee elotu nairut nabatata te nkomom. Kake aatiaaka ninye nanu, “Toning'o iyie nakerai e tung'ani nchere ore ena duaata naa te nkaraki enkata e nkiting'oto.”

¹⁸Ore aairorie ninye nanu, naaibung njo oleng nairrag aitabaiki enkomom enkop; kake aaiseyie ninye naadumu nanu maitasho too nkejek aainei.

¹⁹Nejo ninye, “Toning'o, kaaitayiolo nanu iyie ina nayooki aaku te nkata e siadi e ngoro, amu ina kata apa nageluno e nkiting'oto eipirta.

²⁰Ore ilo meregesh litoduaa oata imowuarak are, ore nena mowuarak are naa ilaiguanak le Midia o Pasia.

²¹Ore ilo oro naa olaiguanani loo Lyunani; ore ina mouo kitok natii erishata oo nkonyek enyena naa ilo aiguanani oituruku.

²²Ore ina mouo apa natigile teine netubulunye kulie ong'uan naa keyooki aadumunye nkitoriat ong'uan te nkop enye, kake mme te ngolon enye.

²³Ore te nkata e siadi e nkitoria enye, eidipa ilaitarruorrok aatimitunye, nelotu olaiguanani ogogong netolo oyiolo oleng ndung'eta e rashe.

²⁴Naa kesapuku engolon enye, naa keyau enkidaata naitureisho naa keisul ninye te naba anaa enaas, naa keidaikie ninye iltung'ana magil o ltung'ana le lelo sinyat.

²⁵Ore te nkalamasisho enye naa keponaa aitubul elejare te nkaina enye ore too ndamunot enyena makewan nerup kewan. Keidaikie ilkumok metii enkikoo naa kedumakino doi ninye o metabaiki Olkitok loo lkituaak, kake kepuoi aagil ninye metii enkaina e tung'ani.

²⁶Ore ina duaata oo nteipai o nkakeny duoo natolimuoki naa kesipa; kake tunuka ina duaata, amu enoo nkolong'i naapuonu.”

²⁷Ore nanu, Daniel, naiterre nairrag nkuti olong'i atamuoyia; naitoki nanu adumunye nalo enkisiaayiare o laiguanani; kake aiputukunyie nanu ina duaata neitu aning'u ayiolou enajo.