Read MAASAI REVISED PROTESTANT Daniel 9 Bible Online

Daniel 9 - MAASAI REVISED PROTESTANT bible

Daniel 9

¹Ore to lari le dukuya le Dario olayioni le Ahasuero, laa ore te inoto naa Olmedei, ilo otaa olaiguanani le nkitoria oo Lkaldayo

²ore to lari le dukuya le nkitoria enye, namusu nanu Daniel tiatua mbukui esiana oo larin, laa ore te risioroto ororei lo Laitoriani otolikioki Yeremia ilo oiboni meeta nchere pee mebaya te dukuya enkiting'oto e nkidaata e Yerusalem, naa ilarin ntomoni naapishana.

³Naitoki aibelekenyakino Olaitoriani Enkai, aing'oru ninye te nkomono o te sayiata te enata e kewan o te nkishopoto oo lkuniyiani o nkuruon.

⁴Atoomono nanu Olaitoriani Enkai ai nairridu ajo, “Olaitoriani Na ai kitok magilani, oibung ninye olning'o lo sotua o enyorrata nauno te lelo oonyor ninye neibung nkitanapat enyena,

⁵kitaasa iyiook eng'oki nikintarruoitie nikiaasisho te suujisho nikigolong'u, kimbelekenyate aaing'uaa nkitanapat inono o nkiguanat inono;

⁶eitu iyiook kinining isinkan linono lelo oibonok le Nkai, apa ooirorie ninche te nkarna ino ilaiguanak lang, o ilkituaak lang o loo papa, o ltung'ana pooki lena kop.

⁷Enino Olaitoriani esipita, kake kiaata iyiook enkurruna anaa enikitiu ena olong too ltung'ana le Yuda, te lelo oomanya Yerusalem, o Israel pooki, lelo ootaana o lelo oolakua pooki, tiatua nena kuapi pooki apa niterewa iyie ninche. Te nkaraki ina taboi nataasa ninche tialo iyie.

⁸Enaang, Olaitoriani, enkurruna, o laiguanak lang, o lkituaak lang, o loo papa enkaraki nikitaasa iyiook eng'oki.

⁹Eno Laitoriani Enkai ang olng'ur o empalakino amu kitogolong'akita iyiook ninye,

¹⁰neitu iyiook kining oltoilo lo Laitoriani Enkai ang aasuj nkitanapat enyena, apa naatipika ninye dukuya iyiook too sinkan lenyena lelo oibonok le Nkai.

¹¹Etigila Israel pooki enkitanapata ino neibelekenye, neany ening oltoilo lino. Ore ilo deket o lmumai naaigeroki tiatua nkitanapat e Musa ilo sinka le Nkai netubukokoki iyiook, enkaraki nikitaasa iyiook eng'oki tialo ninye.

¹²Eitabayie ninye irorei lenyena, lelo apa ooiroro ninye tialo iyiook o tialo lelo kituaak ooitore iyiook, ayau shumata iyiook enkitamioto sapuk; amu ore ti abori shumata pooki eitu aekata etumi embae nanyaanyukie enaitaasaki Yerusalem.

¹³Ore anaa enaigeroki tiatua nkitanapat e Musa, eeuo ena kitamioto pooki shumata iyiook, neitu ake kiomonu omom o Laitoriani Enkai ang, aaibelekenya aaing'uaa ntorrok ang nikining ina sipata.

¹⁴Neaku eitobira Olaitoriani ina kitamioto neyaua ninye shumata iyiook; amu ore Olaitoriani Enkai ang naa asipani too siaaitin pooki naataasa ninye, neitu iyiook kining oltoilo lenye.

¹⁵Naa ore taata, Olaitoriani Enkai ang, laa iyie oyaua iltung'ana linono aitupuku tiatua enkop e Misiri te nkaina magilani, nintobiraki kewan enkarna, anaa enatiu ena olong, kitaasa iyiook eng'oki, kitaasishote te ntorroni.

¹⁶Iyie Olaitoriani, ore te risioroto oo nkiaasin inono naasipa, nchoo engoro ino o empijan ino eibelekenya apaash ena anasa ino Yerusalem, ena doinyo ino sinyati; amu te nkaraki ing'ok ang o entorroni oo loo papa pee eimakini Yerusalem o ltung'ana linono tiatua kulo tung'ana pooki oomanita iyiook.

¹⁷Ore naa Olaitoriani, na Ai ang, toning'o enkomono o sinka lino o esayiata enye, naa ore te nkaraki kewan ino Olaitoriani, nchoo enkomom ino meitawang'aki ewueji ino sinyati ina nataa olmuaate.

¹⁸Na Ai ai, irrugu enkiok ino toning'o; tabolo nkonyek inono toduaa emijoonisho ang o ina anasa naipotieki enkarna ino; amu mikintarasu dukuya iyie isayiat ang te nkaraki esipata ang, kake te nkaraki olng'ur lino kitok.

¹⁹Olaitoriani, toning'o; Olaitoriani tapalaki iyiook; Olaitoriani toning'o iyiook niasisho; mimutie, te nkaraki kewan ino, na Ai ai, ore te nkaraki ena anasa ino o ltung'ana linono naa enkarna ino eipotieki.”

²⁰Ore ina kata airorita nanu naomonito, airridu ing'ok aainei o ng'ok oo ltung'ana laainei Israel, naitarasaa esayiata ai te dukuya Olaitoriani Enkai te nkaraki ina doinyo sinyati e Nkai ai;

²¹ore ina kata airorita nanu aomon, ore ilo tung'ani oji Gabriel, duoo latoduaa te nduaata e dukuya, nelotu ine natii nanu akuetu oleng teina kata o lasar le teipa.

²²Nelotu ninye naajoki nanu, “Oo Daniel, aewuo taata pee aaisho iyie eng'eno nagut o eyiolounoto.

²³Ore te nkiterata e sayiata ino eewuo ororei abau, naewuo nanu pee aaliki iyie, amu eikinyorri iyie oleng; metaa tadamu ilo rorei niyiolou ina duaata.

²⁴“Etudung'oki ilarin ntomoni naapishana kat intomoni naapishana oo larin te nkaraki iltung'ana linono o ina anasa ino sinyati, pee eiting'ieki enkitarruorroto, pee eishieki easata oo ng'ok, pee eitaikinyeki osotua ilaing'okok, pee eyauni esupatisho oo ntarasi, nemishiri enduaata o loiboni, nebukokini eilata ine wueji sinyati aisul.

²⁵Toning'o niyiolou naa nisipu nchere ore ebaiki pee eitaini enkitanapata pee esheti Yerusalem o metabau elotunoto e ilo otubukokoki eilata aaput, ilo kitok, naa keaku iwikii naapishana. Ore too wikii ntomoni ile oaare naa keaku keigili aashet too lkurrat ootumoreki o wuejitin neegol, kake te nkata e nyamali.

²⁶Ore te siadi nena wikii ntomoni ile o are neiwuang'ieki ilo otubukokoki eilata aaput, ilo kitok nemeitoki aata toki, ore lelo tung'ana le ilo kitok olotu neidaikie ina anasa o ewueji sinyati. Kelotu enkiting'oto enye anaa to loirrag le nkarenetii olarrabal o metabaiki enkiting'oto; neibalunyekiemijoonisho.

²⁷Naa keitobir ninye olning'o ogol te wiki nabo; ore to lpisiai le wiki naa keisho ninye ilasarri o nkishoorot meishunye; ore teina rishata nepiki olkirutoto torrono entopij e nkaji e Nkai, naa keton ninye teine, ometaba anaa neitabaya ilo otipika ine ina naitobiraka Enkai.”