Read MAASAI REVISED PROTESTANT Hosea 10 Bible Online

Hosea 10 - MAASAI REVISED PROTESTANT bible

Hosea 10

¹Olchani loo sabibu Israel oiu ilng'anayio lenyena. Ore anaa enaponari ilng'anayio lenyena neponaa ashet ilpereren loo lasarri kumok; ore anaa enaponari enkop enye asidanu, neponaa ing'apeta enyena.

²Etelejishote iltauja lenye; meeta taata nchere meitalaki entorroni enye. Kegil Olaitoriani lelo pereren lenye loo lasarri, neparripar nena ng'apeta enye.

³Amu kepuo taata ninche aajo: “Mikiaata iyiook olaiguanani, amu mikiure iyiook Olaitoriani, amaa olaiguanani, kaa eidim ninye aitaasa iyiook?”

⁴Eiro ninche irorei le pesho; ore too lmuma le lejare keitayu osotua; nebulu nkiguanat enye anaa sayieti naabulu too nkong'at e nkurma.

⁵Keikirikira lelo oomanya Samaria te nkuretisho, te nkaraki ilo ashe oitanyaanyukieki nkaitin e Babel. Keishiraki iltung'ana lenyena ninye, ore lelo apolosak lenyena ooserem inkitanyaanyukot neyietu aaishiraki ninye, teina kitoo enye nashomo aing'uaa ninye.

⁶Ee kenapi ina toki aaya Asiria, pee eaku enkishooroto te ilo aiguanani kitok. Keitukurruni Efraim, nekurru sii Israel te nkaraki enkitanyaanyukoto enye.

⁷Ore ilo aiguanani le Samaria naa kelo aidaaya, anaa olaburra ti oriong enkare.

⁸Ore nene wuejitin e shumata e Afen, ina ng'oki e Israel, naa keidaikieki. Kebulu ilkiku o laimerrerruani te nchumata lelo pereren lenye loo lasarri; naa kepuo ninche aajoki ildoinyo, Entemoi iyiook, nejoki indoinyo, enturokinoto iyiook.

⁹Ore apa ebaiki nkolong'i e Gibea itaasa eng'oki, iyie Israel; ore teine neshomo ninche aas ing'ok. Ae meinepu ninche olarrabal te Gibea?

¹⁰Kalotu nanu aarare kulo tung'ana aing'okok pee aitame ninche, naa keiturrurro iloshon aarare ninche, neitame ninche te nkaraki ina ng'oki enye natatashe.

¹¹Ore Israel netiu anaa enkashe apa naitamooki meidong'o entapa. Naitajewuo apa nanu ina murt enye sidai, kake kalo nanu apik Efraim enchata e murt. Meeta nchere pee meturisho Yuda, Meeta nchere meitupuyiapui Yakobo enkulupuoni makewan.

¹²Entuunoki ate esupatisho, ninkesusu ilng'anayio le nyorrata nauno; entutur ina kulukuoni inyi nayeng'iyeng'ieki amu etabawua enkata naing'orunyeki Olaitoriani, pee etum ninye aeu aitashaiki enjeunoto shumata intae.

¹³Ituuno apa intae entorroni, ninkesusu enkarruoisho, inosa intae ilng'anayio le lejare. Amu isiliga apa intae ngarrin inyi o larrabal o ina siamo oo lmurran linyi.

¹⁴Ore te nkaraki ina, kejing olarrabal atua iltung'ana linono, ore lelo sempewueti linono neidaikieki, anaa apa enaidaikie olaiguanani Shalaman enkanasa e Bet-arbelon teina olong o larrabal; nedung'udung'i nkera o noo ng'otonye.

¹⁵Ena ninye eyookini aaitaas intae, iyie na aji e Israel, te nkaraki ina torroni ino kitok. Ore enasirie neishieki ilo aiguanani le Israel katukul.