Read MAASAI REVISED PROTESTANT Hosea 12 Bible Online

Hosea 12 - MAASAI REVISED PROTESTANT bible

Hosea 12

¹Osiwuo eirrita Efraim, nemirare ninye olkutati lo loosaen endama pooki; neponaa ninche elejare o larrabal; nening'ore ninche te nkinyang'a enkop e Asiria, nenapi eilata aaya Misiri.

²Eeta Olaitoriani enaikilikuanu tialo Yuda, naa kelo aitame Yakobo te risioroto oo iasat enyena, neitalak ninye te risioroto oo nkiaasin enyena.

³Ore tiatua enkoshoke e ng'otonye neibung Yakobo olalashe lenye entutunyo, ore etaa oltung'ani kitok nekeshare Enkai.

⁴Etekeshare ninye olmalaika neisulu, eishira ninye neing'oru omom enye. Enotore ninye Enkai te Betel, neirorie ninye Enkai teine.

⁵Olaitoriani Enkai oo lororani, Olaitoriani ninye enkarna enye:

⁶“Neaku ore iyie te retoto e Nkai ino, tushukunye, mbung'a enyorrata o esipata tukurraki nibik aanyu Enkai ino.”

⁷Olbiasharai oata entemet e lejare te nkaina enye.

⁸Eji etejo Efraim, “Ee kara nanu karsis, anotoko kewan imasaa.” Kake ore ina arsisisho enye, nemeiwuang'ie enkarruoisho oo ng'ok enyena.

⁹Ara nanu Olaitoriani Enkai ino, aitupukuo apa intae te nkop e Misiri; naa kaigil areu intae entobik too lng'oborri; anaa apa too nkolong'i o sirua otegeluaki.

¹⁰Airorie apa nanu iloibonok; nanu apa ilo otoponayie induaat, ore too loibonok naishoru nkitanyaanyukot.

¹¹Tenaa ketii entorroni Gilead meeta nchere pee mepuonu ninche aaku pesho; Tenaa kepolosi iloing'ok te Gilead, ore lelo pereren lenye naa kepuo aatiu anaa sotot loo soito too nong'ot e nkurma.

¹²(Eisikaka apa Yakobo enkop e Aram, ore teine neisiaisho Israel te nkaraki enkitok, naa ore te nkaraki enkitok neirrita nkerra.)

¹³Oloiboni le Nkai etaasishore Olaitoriani ailepunye Israel aitung'uaa Misiri; naa to loiboni le Nkai eitagolieki ninye.

¹⁴Eyaua Efraim embae naitagorisho oleng; neaku ore Olaitoriani lenye, keing'uaa ina kitarrurroto o sarge te shumata ninye, nerrinyoki ninye ina kurruna enye.