Read MAASAI REVISED PROTESTANT Hosea 14 Bible Online

Hosea 14 - MAASAI REVISED PROTESTANT bible

Hosea 14

¹Tushukunye iyie Israel, torrinyokinoyu Olaitoriani Enkai ino amu itarrorre iyie te nkaraki enkarruoisho ino.

²Shomo iata rorei nirrinyokino Olaitoriani; tiaaki ninye, “Iwuang'ie enkarruoisho pooki; tang'amai ina sidai naa ekinchoru iyiook ilng'anayio loo nkutukie ang.

³Meitajeu iyiook Asiria, mikipuo iyiook aaked mbartan; nimikingil aekata aajo, ‘Enkai ang, too siaaitin oo nkaik ang. Tiatua iyie etum enkerai okishi olng'ur.’ ”

⁴Kaishiunye nanu ina golong'akinoto enye; kanyorru nanu ninche to ltau lai, amu eibelekenye engoro ai aing'uaa ninche.

⁵Katiu nanu anaa enkoileelio te Israel; naitupuku ninye anaa entapukai, naa keibung ntona anaa olchani onyaanyukie olchartuyian,

⁶neisuaa ilng'osil lenyena; netiu esidano enye anaa oloirien, ore erropili enye netiu anaa iltarakua ootii Lebanon.

⁷Kerrinyunye ninche nepuonu matorripo nanu ninche, naa kebul ninche anaa enkurma nebul anaa osabibu, nepuo ninche aaning'oyu anaa enaisho e Lebanon.

⁸Kejo Israel, kaa nanu aporokinore nkitanyaanyukot oo nkaitin? Nanu doi ilo likiwaliki nikigolie iyie. Atiu nanu anaa olchani onyori, onyaanyukie oltarakuai, nanu eing'uaa ilng'anayio linono.

⁹Ore ilo ora ng'en, nchoo eyiolou kuna baa; ore ilo ojurrisho, nchoo eyiolou ninche; amu keitoriori nkoitoi o Laitoriani, ore ilasipak neim ninche, kake kerrorro ilaitarruorok te ninche.