Read MAASAI REVISED PROTESTANT Hosea 2 Bible Online

Hosea 2 - MAASAI REVISED PROTESTANT bible

Hosea 2

¹Tejo olalashe lino, “Iltung'ana laainei,” nijo enkanashe ino, “Enanoto olng'ur.”

²“Tasayia ng'utunyi, tasayia amu mme enkitok ai ninye, nemara nanu olpayian lenye pee etum aiwuang'ie enkiborra oo nkonyek te nkomom enye, neiwuang'ie eloloito enye to lki lenyena;

³pee masul ake aoru ilkilani naitotiu ninye anaa ina olong apa naini, naitotiu ninye anaa ong'ata, naitotiu ninye anaa enkop natoyio, naar ninye te nkure.

⁴Ore sii ti alo nkera enyena maing'urrie nanu amu inkera e nkiborra oo nkonyek ninche.

⁵Amu eiborrie ng'otonye onyek; ore ina natunute ninche netaasa embae enkurruna. Amu etejo ninye, ‘Kalo arubare isintan laainei, laa ninche laaisho nanu emukate ai o enkare ai o enkila ai napuyiapui o kitani ai o eilata ai o enaisho oo sabibu.’

⁶“Ore te nkaraki ina kanuk nanu enkoitoi enye too lkiku; nashetaki nanu esuntai, pee metum ninye irrekiei lenyena.

⁷Kemir ninye isintan lenyena, kake meinepu; neing'oru ninche, kake metum ninche. Neitoki ninye ajo, ‘Kalo nanu narrinyokino olapa moruo lai le dukuya, amu keikash apa ina kata te nanu alang taata.’

⁸Neitu eyiolou ninye inchere nanu apa ilo oishoo ninye entapa, o enaisho oo sabibu o eilata, naiputaki ninye enkosholai o saabu naa ninche etaasishore te seramere e nkitanyaanyukoto e nkai naji Baal.

⁹“Ore te nkaraki ina ekarriny ilpaek laainei te nkata enye, o enaisho ai oo sabibu te rishata enye, narriny nanu ina kila ai napuyiapui o kitani, naa ninche apa naaitemoo emasipaisho enye.

¹⁰“Ore taata naa kasul nanu ninye aoru nkilani te dukuya lang'at lenyena, nemeetae olokordu ninye aitayu te nkaina ai.

¹¹Naa kaishie nanu isiruai lenyena pooki, o mashoi, o lapaitin lenyena ng'ejuk o Sabatoni enyena, o siruai lenyena pooki gelunot.

¹²Nainyal nanu isabibu lenyena o lkeek loo lng'anayio, laa ninche ejo ninye, ‘Elaakinoto ai kulo, laa ninche aaishoo isanchan laainei.’ Kaitaa nanu ninche entim, naa kenya ninche ing'uesi e ntim.

¹³Naa kaitame nanu ninye te nkaraki nena olong'i o sirua le nkitanyaanyukoto e nkai naji Baal ina kata apa pee epejoki enkorropil ninche, nekuso ninye too lgiso o too masaa, nelo asujaa isintan lenyena, nemaadamu ninye nanu, Olaitoriani ojo.

¹⁴“Ore enkaraki ina, ng'ura, kalejaa, narik ninye ong'ata, nairorie ninye te mborron.

¹⁵Ore teine naisho enkurma enye oo sabibu, naitaa ilo erata le Akor elusie o siligi. Ore teine newal ninye anaa apa too nkolong'i e kitisho enye, anaa apa pee eipang'u aing'uaa enkop e Misiri.

¹⁶“Naa ore kenya teina olong, Olaitoriani ojo, nikimpot iyie nanu ijo, ‘Olpayian lai,’ nimikingil iyie ajo, ‘Baal ai[1].’

¹⁷Amu kaiwuang'ie nanu nkarn e nkitanyaanyukoto e nkai naji Baal te nkutuk enye, nemeigili aekata aaipot ninche katukul.

¹⁸Naa kaaitobiraki nanu iyie osotua teina olong te nebo ing'uesi e ntim, o ntaritik o loing'ang'e o ng'uesi naaiserpepiari te nkop; naiwuang'ie nanu enkawuo, o lalem, o larrabal tena kop; naaisho nanu iyie irraga te seriani.

¹⁹Naa kaasiraki nanu iyie kewan ntarasi; kaasiraki nanu iyie kewan ai te supatisho o te sipata, te nyorrata nauno o to lng'ur.

²⁰Kaasiraki nanu iyie kewan ai te nkitisipata; naa eyiolou iyie Olaitoriani.

²¹“Naa ore kenya teina olong, Olaitoriani ojo, kawaliki nanu keper newaliki sii ninche enkop;

²²newaliki sii ninye enkop ilpaek o sabibu o eilata, naa kewaliki sii ninche Yesreel;

²³naa kaun nanu ninye, aunoki kewan tiatua ena kop. Naa kaing'urrie nanu ina naji ‘Enemeing'urrieki’, naa kajoki nanu lelo leme iltung'ana laainei, ‘Irara intae iltung'ana laainei,’ nejo ninye, ‘Ira iyie Enkai ai.’ ”