Read MAASAI REVISED PROTESTANT Hosea 9 Bible Online

Hosea 9 - MAASAI REVISED PROTESTANT bible

Hosea 9

¹Ming'ida iyie Israel! Nimishipa te ng'ida anaa loreren; amu imborrie iyie onyek, ning'uaa Enkai ino. Itonyorra iyie olekoisiaayio le nkiborra oo nkonyek too wuejitin pooki neeiutuutishoreki.

²Ore eneituutishoreki o eneironyieki ilng'anayio meitoti ninche.

³Nemetum ninche enaisho ng'ejuk. Nebik ninche tiaatua ina kop o Laitoriani; kake kerrinyo Efraim alo Misiri, nepuo ninche aanya endaa nemesinya te Asiria.

⁴Meigil ninche aabukoki Olaitoriani ilasarri ooki le naisho oo sabibu; nemeitiship ninye too lasarri lenye. Ore imukateni enye naa ketiu anaa imukateni o lkiyioi; ore naa pooki onya ninche neisarkioneki amu ore imukateni enye naa keaku inesumash enye ake; meyauni atua enkaji o Laitoriani.

⁵Kaa kenya iasiasa teina olong o sirua o teina olong o sirua lo Laitoriani?

⁶Amu ng'ura kepuo Asiria; keiturrur Misiri ninche; nenukaa Memfis ninche. Nebulaki endiati nena masaa enye sidain e nkosholai; nejing ilkiku atua ilng'oborri lenye.

⁷Eetuo inkolong'i e nkitamioto, eetuo inkolong'i e nkitalaata; naa keyiolou Israel ina. Kemoda ilo oiboni, ore ilo tung'ani le nkiyang'et neeta oloirirua, te nkaraki ina arruoisho ino kitok o enkiba kitok.

⁸Ore ilo oiboni, naa olarriponi le Efraim, lelo tung'ana le Nkai ai, ore eyia netii orreshet laaijo olo larreshoni loo motonyi inkoitoi enyena pooki, netii enkiba atua enkaji e Nkai enye.

⁹Neisarkionie ninche ate oleng anaa too nkolong'i e Gibea: keyooki ninye adamu entorroni enye nelo aitame ing'ok enye.

¹⁰Anoto apa Israel eikununo anaa isabibu ti ong'ata. Nadol iloo papaai linyi eikununo anaa ilng'anayio lo lng'aboli le nkiterata. Kake eetuo apa ninche enetii Baal-peor, neitisinyaki ate enkitanyaanyukoto e nkai naji Baal, neaku ninche enkitagoroto anaa nena tokitin naatonyorra ninche.

¹¹Ore ina kitoo e Efraim naa kelo aaing'uaa ninye anaa emotonyi meitoki atii eishoi, nemetii enutai, nemetii enkibung'aroto.

¹²Ore ninye te neitubulu ninche nkera, naoru nanu ninche o metaba anaa metii enaleku. Woi ninche te nalo nanu aing'uaa ninche!

¹³Ore ilayiok le Efraim anaa enatoduaa nanu, nepuoito enkidaata; meeta nchere merik Efraim ilayiok lenyena enepuoi aar metuata.

¹⁴Nchoo ninche iyie Olaitoriani, kainyoo incho iyie? Nchoo ninche olkibiroto le nguset o lki oo toito.

¹⁵Ore pooki arruoisho enye netii Gilgal; teine apa nanu atang'asa aibayu ninche. Ore te nkaraki entorroni oo nkiasin enye kaaraa ninche aaitung'uaa enkaji ai. Maigil nanu anyorru ninche; ore lelo kituaak lenye pooki naa ilarruok.

¹⁶Etooshoki Efraim, etoito ntona enye, meitoki aaiu ilng'anayio. Ore hoo duoo ninye neisho ninche, kaar nanu metuata nena kera enye kiroteti.

¹⁷Keiturraa Enkai ai ninche, ore te nkaraki neitu ening ninche ninye; keaku ninche ilapuayak tiatua iloreren.