Read MAASAI REVISED PROTESTANT Yoel 1 Bible Online

Yoel 1 - MAASAI REVISED PROTESTANT bible

Yoel 1

¹Ororei lo Laitoriani ele oirriwaka Enkai Yoel olayioni le Petuel.

²Entoning ena intae iltung'ana moruak, nining'ining'i intae iloomanya ena kop! Ketaase aekata embae naikununo nji too nkolong'i inyi, anaa too nkolong'i oo loo papaai linyi?

³Entoliki nkera inyi, naa nchoo nkera inyi metoliki nkera enye, neliki nkera enye eishoi enye.

⁴Ore entoki naleku ilo maati odung'isho, nenya ina mus oo lmaat. Ore entoki naleku ina mus oo lmaat, nenya olmaati le mpukunoto oo ntargeet ore entoki naleku ilo maati le mpukunoto oo ntargeet nenya ilo maati le nkidaata.

⁵Enyoito intae ilamerak; enchira intae ilaokok le naisho, ook ina aisho namelok, amu eiwuang'ieki aaitung'uaa nkutukie inyi.

⁶Amu eewuo emus oo lmaat agilunore enkop ai, negol nemeikenayu te nkumoi; netiu ilala lenyena anaa ilala lo lng'atuny, neeta iltagiligil le lipong o lng'atuny.

⁷Eitomijoono ninche ilkeek laainei loo sabibu, neidaikie ninche ilng'abolo laainei, etikinyutua ninche nkabobok enye nenang'aki enkop; eiborrieki ilng'osil lenye.

⁸Nchira anaa esila naishopokoki ilkuniyiani, eishiraki keeya eilo ojo pee eyam ninye.

⁹Ore olasar lenye le ntapa o lasar lenye ooki neiwuang'ieki, te nkaji o Laitoriani. Eishira ilapolosak, lelo aisiaayiak lo Laitoriani.

¹⁰Eitomijoonoki nkong'at, neishir enkop; te nkaraki naidaikieki entapa, etoito isabibu neishunye eilata.

¹¹Esinanuoto intae ilaturok le nkop, enchira intae ilooata nkurman oo sabibu, enchiraki enkano o shairi amu eidaayie enkikesare e nkurma.

¹²Etoyio olchani loo sabibu, netoyio olng'aboli, ore kukumanka o ltukai, o lchani loo lng'anayio, netoito pooki. Neiting'o enchipai too nkera e tung'ana.

¹³Enchopo ilkuniyiani, niyietutu aaishir intae ilapolosak. Enteyietu enchira intae ilaisiaayiak lo lperere lo lasar. Entijing'u intae, entotoni enkewarie, pooki nchopitoto ilkuniyiani, intae ilaisiaayiak le Nkai ai! Amu ore olasar le ntapa o lasar ooki, neiwuang'ieki te nkaji e Nkai inyi.

¹⁴Entisinya eenata inyi e mpukoroto, empotu eumata nasinya enturrurro ilpayiani, o lelo pooki oomanya ina kop meetu enkaji o Laitoriani Enkai inyi; nipuonunu aaishiraki Olaitoriani.

¹⁵Oi ina olong! Amu etataana ina olong o Laitoriani, nalotu anaa enkidaaroto naing'uaa ilo magilani.

¹⁶Keitu eiwuang'ieki endaa aaitung'uaa dukuya nkonyek ang, neiwuang'ieki eng'ida o enchipai te nkaji e Nkai ang?

¹⁷Etumutate ilanterera te nkop natoyio, netomijoonito nkajijik naashumishoreki neinyalate ilkompen te nkaraki nemeetae entapa.

¹⁸Eng'ura eneba olkiyioi loo ng'uesi! Ore iluaat oo nchoo neidang'a te nkaraki nemeetae ndaat. Ore sii iluaat oo nkerrai netanyamala.

¹⁹Aaishiraka nanu iyie Olaitoriani. Amu etumuta enkima ndaat e ong'ata, nenya olng'ejep le nkima ilkeek pooki liong'ata.

²⁰Eikinchiraki sii ninche ing'uesi e ntim, amu etoito nchorroi oo nkariak, netumuta enkima ndaat e ong'ata.