Read MAASAI REVISED PROTESTANT Yoel 2 Bible Online

Yoel 2 - MAASAI REVISED PROTESTANT bible

Yoel 2

¹Entoosh esekekua te Sion; entoosh entadara teilo doinyo lai sinyati! Nchoo eikirikira lelo pooki oomanya ena kop, amu kelotu enkolong o Laitoriani, netataana.

²Enkolong e naimin o sina, enkolong oo nkatampo o enaimin nagut! Ketiu anaa erokan eisalaashakino ildoinyo, olmaati kitok ogol, eitu aekata etumi enanyaanyukie ninche ebaiki apa moitie, nemetumi aekata enanyaanyukie ena too larin loo ishoritin pooki naapuonu.

³Kemutisho enkima te dukuya ninche. Ore te siadi ninche neinosisho olang'at le nkima. Keikununo ina kop anaa enkurma e Eden te dukuya ninche, kake ore te siadi ninche naa ong'ata nememanya, nemeetae entoki naidim ailanya ninche.

⁴Ore empukunoto enye neikununo anaa mbartan, nekuet ninche anaa mbartan o larrabal.

⁵Ore oltoilo netiu ana ngarrin oo mbartan, neipid ninche too nchumat oo ldoinyo, anaa endarata enkima nanya isuut, anaa enjore nagol, natoluaakine olarrabal.

⁶Ore te dukuya ninche neirut olorere, neipusu inkomomi enye.

⁷Nerasaa ninche anaa ilmurran, neked isunta anaa sikarini, nepuo ninche dukuya oltung'ani ake te nkoitoi enye, meibelekenya ninche aapaash nkoitoi enye.

⁸Meetae olorruesh olikae, enkoitoi enye ake eibung pooki ng'ae, neim erishata o masaa o larrabal, nemeibooroyu.

⁹Neipid ninche te nchumata eina anasa, nekuet too nchumat oo sunta; neked nkajijik, neim ilusien anaa ilapurrok.

¹⁰Neikirikira enkop te dukuya ninche, neikirikira shumata. Neitomisimisi enkolong o lapa, nemeitokini aata ewang'an oo lakir.

¹¹Neitayu Olaitoriani oltoilo lenye, te dukuya enjore enye, amu aikitok oleng olorora lenye ore ilo olimu ororei lenye neeta engolon. Amu ore ina olong o Laitoriani naa kitok neitureisho oleng, aing'ae oidim ating'iriakinoyu?

¹²“Ore ake sii o taata,” Olaitoriani ojo, “Torrinyunye wou enatii to ltau lino pooki, te enata e mpukoroto o te nkishirata o to sina.

¹³Nipolososo iltauja linyi, mme ilkilani linyi.” Torrinyokinoyu Olaitoriani Enkai ino, amu aisupat ninye neeta olng'ur, mesioki agoro, neeta enyorrata nauno, neirridu entorroni.

¹⁴Kalo oyiolo tenaa keibelekenya ninye neirridu, neing'uaa emayianata etulusoyie ninye, olasar le ntapa o lasar ooki, te nkaraki Olaitoriani Enkai ino?

¹⁵Entoosh esekekua te Sion. Entisinya eenata e mpukoroto; empotu eumata nasinya;

¹⁶enturrurro iltung'ana. Entisinya eumata; enturrurro ilpayiani; enturrurro nkera ometabaiki nkutiti naanakita. Nchoo oloyamisho eing'uaa olgilata lenye neing'uaa ina nayami olgilata lenye.

¹⁷Ore te rishata e kutukaji o lperere lo lasar, nchoo ilapolosak lelo aisiaayiak lo Laitoriani eishir, nejo, “Teleku iltung'ana linono, Olaitoriani, nimintaa enjung'ore ino enkurruna, entoki naimakini tiatua iloreren. Kainyoo pee ejo ninche tiatua iloreren, ‘Koree Enkai enye?’ ”

¹⁸Neitoki Olaitoriani atum olom te nkaraki enkop enye, neing'urrie iltung'ana lenyena.

¹⁹Newal Olaitoriani nejoki iltung'ana lenyena, “Kairriwaki nanu intae entapa o enaisho oo sabibu o eilata. Naa ipuopuo intae aaraposho; nemaigil aekata nanu aitaa intae enkurruna too loreren.

²⁰“Kaiwuang'ie nanu ilo maati le moikuape aitung'uaa intae, nareu nanu ninye empusel mitil. Ore lelo lenye le lukunya nepuo enaiposha o loosaen, ore lelo le siadi nepuo atua enaiposha o loo ntoluo; ore olng'usil o eng'uan enye nedumunye, amu etaasa ninye mbaa sapuki.

²¹“Miureishoyu iyie na kop tishipayu iyie ning'ida, amu etaasa Olaitoriani mbaa sapuki.

²²Emiureishoyu intae ing'uesi e ong'ata, amu kenyori ndaat e ong'ata; eiu olchani ilng'anayio lenyena, neiu olng'aboli o sabibu ilng'anayio lenye te nkumoi.

²³“Entishipata intae ilayiok le Sion, ning'idakinono Olaitoriani Enkai inyi; amu eitasiekuo ninye enchan te nkaraki intae. Eitashaikia ninye intae olari seur; eirriwua enchan naituruku o ene siadi anaa apake.

²⁴“Keiput entapa ilkurrot ooidong'ishoreki, nedooyo enaisho oo sabibu o eilata too lbenia.

²⁵Kaarrinyoki nanu iyie, ilarin apa ooinosie emus olmaati enkop, o ntargeet, o enamutisho, o enadung'isho ina jore ai kitok o lmaat nairriwua nanu atua intae.

²⁶“Inya iyie endaa, sapuk nikiraposh, nilo aisis Olaitoriani Enkai ino, ilo laa ninye otaasa inenking'asia te nkaraki iyie. Maigil aekata aaitukurru iltung'ana laainei.

²⁷Iyiolouu intae nchere atii nanu atua Israel, naa nanu Olaitoriani Enkai inyi nemetii likae. Nemeigili aekata aaitukurru iltung'ana laainei.

²⁸“Naa kepuonu inkolong'i te siadi ena, naa kabukoki nanu enkiyang'et ai pooki tung'ani; ore ilayiok linyi o ntoyie inyi neibonisho, ore ilpayiani linyi neidetidet ore ilbarnot linyi nedol induaat.

²⁹Ore isinkan linyi lewa o sinkan inyi ng'oruou, kenya te nena olong'i, naa kabukoki nanu enkiyang'et ai.

³⁰“Naa kaishoru nanu nkikoot te keper o te nkop, osarge o enkima, o empuruo nairrusha.

³¹Keitomisimisi enkolong, nedoru olapa anaa osarge, eng'or ina olong kitok o Laitoriani naitureisho.

³² Naa keaku ore pooki ng'ae oipot enkarna o Laitoriani, nekorduni. Amu ore to ldoinyo le Sion o te Yerusalem netii lelo oopuo aaimisho, anaa enatejo Olaitoriani; ore te lelo ooleku, ninche netii lelo ooipot Olaitoriani.