Read MAASAI REVISED PROTESTANT Yoel 3 Bible Online

Yoel 3 - MAASAI REVISED PROTESTANT bible

Yoel 3

¹“Ore kenya te nena olong'i, o teina kata, tenarrinyu nanu lelo ootarayioki le Yuda o le Yerusalem,

²naa kaiturrur nanu iloreren pooki, nayau ninche aitadou oerata le Yehoshafat, naiguanare nanu ninche te nkaraki iltung'ana laainei o enjung'ore e Israel amu eidapashakaki apa ninche atua iloreren, netooro ninche enkop ai.

³Netooshokito ninche iltung'ana laainei enkukuo, neishooyo ninche enkayioni aainosie emulayoi, nemir entito aainosie enaisho oo sabibu, netooko ninche ina aisho.

⁴ “Ira iyie nyoo te nanu iyie Tiro o Sidon, o kulo kirinen le Filistia? Kaa toki kirrinyoki nanu alaaki? Tenaa eikilaaki iyie nanu, naitalaku nanu enkias ino te nchumata endukuya ino makewan, te wuapunoto o te nkisarrisar.

⁵Amu iwa iyie enkosholai ai o saabu ai, nitanapa iyie ilchumat laainei le karsisisho atua nkajijik oo nkaitin inyi.

⁶Itimiraka iyie iltung'ana le Yuda o le Yerusalem Ilgiriki, niya ninche aitalamaa oleng to lpolosie lenye.

⁷Kake ore taata kaputu nanu ninche teine wueji nitimiraka ninche, naitalaku nanu enkias ino te ndukuya ino makewan.

⁸Kamir nanu ilayiok linono o ntoyie inono apik nkaik oo layiok le Yuda, naa kepuo ninche aamiraki lelo oshon le Sabea, oolakua, amu Olaitoriani oiroro.”

⁹Entolimu ena embalie tiatua iloshon: entobira olarrabal, entuputu iltung'ana magil. Nchoo iltung'ana pooki lo larrabal enyiku, nchoo ninche epuonu aailepu.

¹⁰Endong'o ilchempei linyi metaa lalema, nintaa ilalema linyi oodung'ishoreki iremeta; nchoo ilo oshal ejo, “Kara nanu olmurrani.”

¹¹Entasieku ootu, intae iloreren pooki ootaana, enturrurro ate teine. Ntadou ilmurran linono, iyie Olaitoriani.

¹²Nchoo iloreren eputu ate, nepuonu oerata le Yehoshafat; amu teine nanu alo aton adung'oki enkiguana, lelo oreren pooki ootaana.

¹³Tudumu olalem oololo amu eo enkikesare. Entijing'u entunyo amu eipute enkironyet. Eilogilog iltooi aadooyo, amu aikitok entorroni enye.

¹⁴Etii olorora, olorora kitok, oerata odung'ieki enkiguana. Amu etinyikua enkolong o Laitoriani tiatua ilo erata odung'ieki enkiguana.

¹⁵Keitomisimisi enkolong o lapa nemeitoki atii ewangan oo lakir.

¹⁶Neikurrukur Olaitoriani te Sion neitayu oltoilo lenye te Yerusalem, ore keper o enkop neikirikira. Kake Olaitoriani esarunoto too ltung'ana lenyena, osempewuet too ltung'ana lenyena le Israel.

¹⁷“Metaa ilo iyie ayiolou ajo kara nanu Olaitoriani Enkai ino, ilo obik te Sion, to ldoinyo lai sinyati. Naa keaku Yerusalem sinyati, nemeigil aekata iltung'ana omon aaim atua ninye.

¹⁸“Ore kenya teina olong neitong'u ildoinyo enaisho oo sabibu namelok, neruko ndoinyo te kule, ore inong'ot pooki e Yuda neruko enkare; nerukunye enchorro e nkare naing'uaa enkaji o Laitoriani, neiput oerata le Shitim enkare.

¹⁹“Kelo Misiri aaku olmuaate, neaku Edom ong'ata mitil te nkaraki enkarruoisho apa naitaasaki iltung'ana le Yuda, amu eibukoitie apa osarge lemeeta entioto te nkop enye.

²⁰Kake kemanyi Yuda ntarasi nememanyi Yerusalem too iishoritin pooki.

²¹Kaitalaku nanu osarge lenye, naiwuang'ie nanu entorroni enye, amu Kebik Olaitoriani te Sion.”