Read MAASAI REVISED PROTESTANT Amos 2 Bible Online

Amos 2 - MAASAI REVISED PROTESTANT bible

Amos 2

¹Nji ejo Olaitoriani: “Ore te nkaraki nkitarruorrot kumok e Moab, maiwuang'ie nanu enkitamioto enye, amu etapejo ninye aitaa nkuruon iloik lo laiguanani le Edom.

²Neaku kairriwaa nanu enkima shumata Moab, naa kenya isempewueti le Keriot, naa keye Moab te mpolos e enkishirata te mpolos e mbuaata o to ltoilo le ntarumpeta.

³Kaiwuang'ie nanu olaiguanani te mpolos e Moab, naar metuata ilkituaak lenyena te nebo ninye Olaitoriani ojo.”

⁴Nji ejo Olaitoriani: “Ore te nkaraki nkitarruorrot kumok e Yuda, maiwuang'ie nanu enkitamioto enye, amu etanyaita ninche nena kitanapat o Laitoriani, neitu eibung nkiguanat enyena, kake eitapong'oiyie ninche elejare enye, naa ninye etusuja iloo menye.

⁵Neaku kairriwaki nanu enkima shumata Yuda, naa kenya isempewueti le Yerusalem.”

⁶Nji ejo Olaitoriani: “Ore te nkaraki nkitarruorrot kumok e Israel, maiwuang'ie nanu enkitamioto enye; amu kemir ninche ilo asipani te nkosholai, nemir ilo omena aainosie inamuka are.

⁷Ninche lelo ooitunyoki endukuya o laisinani enterit e nkop, neibelekeny enkoitoi eilo oibookoki enkop; nelo olayioni o menye ayiaya enkitok nabo, neidurukie ninche enkarna ai sinyati.

⁸Neirrag ninche te mbata e pooki perere lo lasar, too nkilani naalakieki isilen; naa ore tiatua enkaji e Nkai enye neok ninche enaisho oo sabibu e lelo ooitalaaki esile.

⁹“Ore eyia aidaikie apa nanu Ilamori te dukuya ninche, ooba enkadoro enye anaa enkadoro oo ltarakua negol oleng anaa ilkeek sapuki; aidaikie nanu ilng'anayio lenyena te shumata, o ntona enyena te kop.

¹⁰Ayaua sii nanu intae aitayu te nkop e Misiri, narik intae ilarin artam tiong'ota, pee ipuonunu aaya enkop oo Lamori.

¹¹Aitaa nanu embata oo layiok linyi iloibonok le Nkai, ore embata oo lbarnot linyi Ilnasari, aimesipa ena, lo tung'ana le Israel?” Olaitoriani ojo.

¹²“Kake intooko intae Ilnasari enaisho oo sabibu, nintanapinapa iloibonok le Nkai aajoki ‘Emimbonisho’.

¹³“Karogonyaki nanu intae enkop te wueji inyi, anaa enarogony enkop engarri nabore lolan.

¹⁴Keimin enkuetata te ilo oneneng, ore ilo ogol nemeitoki aata engolon enye; nemeitoki ilo magilani aidim aitajeu enkishui enye.

¹⁵Ore ilo oibung enkawuo nemeitashe, ore ilo oneneng too nkejek nemeitajeu kewan, nemeitajeu ilo oked embarta enkishui enye;

¹⁶naa ore ilo ogol tau tialo lelo magil naa keyooki aisik ailanyisho meeta nareta o larrabal teina olong.” Olaitoriani ojo.