Read MAASAI REVISED PROTESTANT Amos 4 Bible Online

Amos 4 - MAASAI REVISED PROTESTANT bible

Amos 4

¹“Entoning ele rorei, intae nakituaak e Samaria, nena naatopiro anaa nkishu e Bashan, nena naaibooki olaisinani enkop, neitorogony olomena, nena naajoki ilpayiani lenye, ‘Eyau enaisho matook!’

²Einosa Olaitoriani Enkai olmumai te sinyatisho enye, nchere, ng'ura kepuonu nkolong'i shumata intae, peyie eyau intae too lala ooloolo, netiu pooki ng'ae te ntae, anaa osinkiri oibung'aki to rreshet ooololo.

³Naa ipuopuo intae aaim esuntai nataaraki, neitashe pooki ng'ae te dukuya ninye, nepuoi aanang'aki intae Harmon,” Olaitoriani ojo.

⁴“Wou Betel, tigila nkitanapat, Wou Gilgal, toponai engilata oo nkitanapat; iyau ilasarri linono anaake tadekenya, o matuan inono e tomon te pooki olong e uni.

⁵Intayu olasar le nashe; eina naisuijieki, nimbalie inkishorunot e mpiris nilikioo ninche; amu inyorrinyorro aaikuna neijia, lo tung'ana le Israel!” Olaitoriani Enkai ojo.

⁶“Nanu oyaua olameyu atua nkanas inyi pooki, naiko endaa meishunye too nkajijik inyi pooki, ore ake eyia neitu intae kishukokinono nanu,” Olaitoriani ojo.

⁷“Naa nanu sii oibooyie enchan meshaiki intae, eton eng'or ilapaitin okuni le nkikesare nairriwaki; nanu enchan shumata e nkanasa nabo napal enkae anasa atashaikia ewueji nebo, ore ewueji neitu eshaiki netoyu;

⁸neaku ore iloo nkanas are aashu uni nepuo enkanasa nabo pee eok enkare, nemeishunye ninche enkure; ore eyia neitu intae kirinyokinono nanu,” Olaitoriani ojo.

⁹“Ataara indaiki inyi te nkeeya, naitomijoon inkurman inyi aitoi isabibu linyi; ore ilng'abolo o loirienito linyi nenya olmaati; ore eyia neitu kishukokinono nanu,” Olaitoriani ojo.

¹⁰“Airriwaka nanu atua intae olmeitai anaa apa enaikununo te Misiri; naar nanu ilbarnot linyi to lalem; naya nanu imbartan inji aiwuang'ie naya nanu olng'usil loo lng'oborri linyi apik nkumeishin inyi; ore eyia eitu intae kishukokinono nanu,” Olaitoriani ojo.

¹¹“Aidakie nanu ilkulikae te ntae, anaa apa pee eidaikie Enkai Sodom o Gomora, nitiuu apa anaa olmishire oitayioki tiatua enkima nayupuyup; ore eyia eitu intae kishukokinono nanu,” Olaitoriani ojo.

¹²“Neaku ena nanu aaitaas, iyie Israel; ore enkaraki naa kaas nanu ena, terretenayu pee itumore Enkai ino iyie Israel!”

¹³Amu ore ilo oitobira ildoinyo neitayu osiwuo, neibalakinye iltung'ana enaikununo endamunoto enye; ilo oitomisimis enkakenya neroro ineeika enkop — Olaitoriani, Enkai oo lororani, ninye enkarna enye!