Read MAASAI REVISED PROTESTANT Amos 7 Bible Online

Amos 7 - MAASAI REVISED PROTESTANT bible

Amos 7

¹Ena nanu aaitoduaa Olaitoriani Enkai, ng'ura, eitobirita ninye olmaati te nkiterunoto embulunoto e ndaa natuunoki to loirujuruj, naa ng'ura embulunoto e are eidipa olaiguanani atudung'o.

²Ore pee eidip ilo maati ainosa inkujit e ina kop, najo nanu, “Olaitoriani Enkai, tapalaki ninche, aatasayia iyie! Kaji naa eiko pee eitashe Yakobo? Eikiti ninye oleng!”

³Neirridu Olaitoriani ena bae; Meekure eaku, Olaitoriani ojo.

⁴Ena nanu aaitoduaa Olaitoriani Enkai, neipotu Olaitoriani Enkai enkiguana e nkima, nenya ina kima ineegut oleng, nenya sii enkop.

⁵Naitoki nanu ajo, “Olaitoriani Enkai, tapala, aatasayia iyie! Kaji naa eiko pee eitashe Yakobo? Eikiti ninye oleng!”

⁶Neirridu Olaitoriani ena; “Meitoki sii ena atiu,” Olaitoriani Enkai ojo.

⁷Aaitoduaa ninye ae duaata: nadol eitashe Olaitoriani te mbata e suntai nateshetaki te ntemet e nkitorioroto, eibung'ita entemet te nkaina enye.

⁸Naajoki nanu Olaitoriani, “Amos, kainyoo iyie idolita?” Najoki nanu: “Entemet e nkitorioroto.” Neitoki Olaitoriani ajo. “Ng'ura, kapik nanu entemet e nkitorioroto empolos oo ltung'ana laainei Israel; maigil aekata nanu agiroo ninche;

⁹ore iwuejitin neeika e Isaak naa keitomijooni, ore iwuejitin e Israel neeseremishoreki neitomijooni, naa kadumakino nanu enkaji e Yeroboam to lalem.”

¹⁰Neitoki Amasia olapolosani le Betel airriwaki olkilikuai Yeroboam olaiguanani le Israel, ejoki, “Eitobirita Amos entorroni tialo iyie te mpolos e nkaji e Israel; meidimaa ena kop ilomon lenyena pooki.

¹¹Amu nji apa etejo Amos, ‘Keye Yeroboam to lalem, nemeeta nchere pee melo Israel eyararoto aing'uaa enkop enye.’ ”

¹²Nejoki Amasia Amos, “Iyie oladuaani shomo, isika shomo enkop e Yuda, inosa endaa teine, nimbonisho teine;

¹³kake mingil aekata aibonisho te Betel, amu enkaji o laiguanani naseremishore naa enkaji e nkitoo naseremieki Enkai.”

¹⁴Neitoki Amos awaliki Amasia ejo, “Mara nanu oloiboni le Nkai olaakini nemara olayioni lo loiboni, kake kara olairritani o laitobirani loo lkeek oonyaanyukie ilng'abolo,

¹⁵naaya apa nanu Olaitoriani aitung'uaa esujata oo ntare, naajoki nanu Olaitoriani, ‘Shomo, mbonoki iltung'ana laainei Israel.’

¹⁶“Ore naa taata toning'o ororei lo Laitoriani. Ijo iyie ‘Mimbonoki Israel, niminosu ilomon le nkikoo tialo enkaji e Isaak?’

¹⁷Nji naa ejo Olaitoriani: ‘Keaku enkitok ino enaiborrie onyek tiatua ena anasa, ore ilayiok linono o ntoyie inono naa kebatata to lalem, ore olokeri lino naa kedung'i aaorrior to lgosoi, ore iyie makewan naa iye te nkop nemesinya, nemeeta nchere pee melo Israel eyararoto aing'uaa enkop enye.’ ”