Read MAASAI REVISED PROTESTANT Enkikena 10 Bible Online

Enkikena 10 - MAASAI REVISED PROTESTANT bible

Enkikena 10

¹Nejoki Olaitoriani Musa,

²“Intobira intarumpetani are e nkosholai te nkarriyiano ndong'u ninche, neaku ninche impotunye eumata[5], naa ninche egilieki ilng'oborri.

³Naa te nekuti pokira are, neiturrurrunye eumata pooki aapuonu enitii te kutukaji ilo ng'obor le ntumo.

⁴Kake tenaa nabo ake etukutaki, naa ilarikok, nena lukuny oo loshon loo Siraeli, likinturrurrokino.

⁵Naa ti niosh abuaku, ore lelo ng'oborri ootii enchoto o loosaen nedumunye,

⁶ore pee intoki aosh abuaku e niare, ore lelo ng'oborri ootii enchoto e kopikop nedumunye aaidur. Embuakunoto eoshi enkata naba anaa enadumunye ninche.

⁷Kake tenaa eumata eiturrurri te nebo, nikut, kake mipik embuakunoto.

⁸Ore lelo ayiok le Aron, lelo apolosak, nekut intarumpetani. Ore eoshoto oo sekekuani naa keaku te intae enkitanapata e anaake tiatua iishoritin inyi pooki.

⁹Naa tenipuopuo enjore te nkop inyi aagilunore ilo mang'atinta linyi oibooki intae enkop, nitumokiki taa aaitadara intarumpetani, pee edamuni intae te dukuya Olaitoriani Enkai inyi, neitajeuni intae too lmang'ati linyi.

¹⁰Ore sii too nkatitin e ng'ida - too siruai linyi lo lapa ng'ejuk o te kulikae siruai te sayiata e Nkai - tukuta nena tarumpetani ina kata intarasaa ilasarri linyi oopejori o lasarri linyi le seriani pee atum taa atareto intae: Kara nanu Olaitoriani Enkai ino.”

¹¹Ore to lari li are, to lapa li are te nkolong e tikitam o lapa nedumuni enkatampoi aailepie aaitung'uaa shumata ilo ng'obor le Nkai le shakenisho,

¹²nedumunye iltung'ana loo Siraeli anaa ntukusi aaidur aaing'uaa ong'ata e Sinai; nelo ina atampoi airrag tiong'ota e Paran.

¹³Nedumunye ninche aaidur te nkata e dukuya te nkitanapata o Laitoriani naimua Musa.

¹⁴Ilng'oborri loo ltung'ana le Yuda etang'asaki aaun too ntukusi enye, naa Nashon olayioni le Aminadab olarikoni lenye.

¹⁵Ore apa olarikoni lo losho loo ltung'ana le Isaakar naa Natanel olayioni le Suar.

¹⁶Ore apa olarikoni lo losho loo ltung'ana le Sebulon naa Eliab olayioni le Helon.

¹⁷Naa ore apa te nedotuni olng'obor le ntumo, naa ilayiok le Gershon o layiok le Merari laa ninche apa oonap ilo ng'obor le Nkai, nedumunye aaidur.

¹⁸Neitoki asuj olturrur loo lng'oborri le Ruben too ntukusi enye, ore olarikoni lenye naa Elisuri olayioni le Shedeur.

¹⁹Ore olarikoni lo losho loo ltung'ana le Simeon naa Shelumiel olayioni le Surishadai.

²⁰Ore olarikoni lo losho loo ltung'ana le Gad naa Eliasaf olayioni le Deuel.

²¹Neitoki ile Kohat aadumunye aaidur, enapita nena tokitin naasinya, neitasheyie ilo ng'obor le Nkai eton eitu ebau ninche.

²²Neitoki entukus oo lng'oborri loo ltung'ana le Efraim adumunye too lturrurri lenye; ore olarikoni lenye naa Elishama olayioni le Amihud.

²³Ore olarikoni lo losho loo ltung'ana le Manase naa Gamaliel olayioni le Pedasur.

²⁴Ore olarikoni lo losho loo ltung'ana le Benchamen naa Abidan olayioni le Gideon.

²⁵Neitoki enkereri oo lng'oborri loo ltung'ana le Dan aa ninche ootii siadi ilng'oborri pooki, aadumunye too lturrurri lenye; ore olarikoni lo lorora lenye naa Ahieser olayioni le Amishadai.

²⁶Ore olarikoni lo lorora loo ltung'ana lo losho le Asheri naa Pagiel olayioni le Okran.

²⁷Ore olarikoni lo lorora loo ltung'ana le Naftali naa Ahira olayioni le Enan.

²⁸Ena apa empukunoto e lototo oo ltung'ana loo Siraeli te risioroto oo lororani lenye, te nedumunye aaidur.

²⁹Nejoki Musa Hobab olayioni le Ruel ilo Midiani, aputani le Musa, “Eikidumunye iyiook aapuo ine wueji natejo Olaitoriani, ‘Kaisho nanu intae’, wootu te nebo iyiook, amu eikintaas iyiook intae esidai; amu eisiligie Olaitoriani Isiraeli embae sidai.”

³⁰Kake etiaaka apa Hobab Musa, “Malo nanu; kaorori nanu alo enkop ai makewan o lorere lai.”

³¹Neitoki Musa ajoki ninye, “Aatoomono, ming'uaa iyiook, amu iyiolo enikipuo aaiko kiun ilng'oborri ti ong'ata naa eilo iyie aaku nkonyek te iyiook.

³²Naa ti nilo iyie te nebo iyiook ore pooki toki sidai naba anaa enaitaas iyiook Olaitoriani, nikintaas iyiook iyie ina ake.”

³³Neaku etudumunye apa ninche aapuo to ldoinyo le Nkai elototo oo nkolong'i uni; ore ilo sanduku lo sotua lo Laitoriani nelo te dukuya ninche teina lototo oo nkolong'i uni, pee etum aing'uraki ninche ewueji nepuo aayeng'iyeng'are.

³⁴Netii apa enkatampoi o Laitoriani shumata ninche dama enkata ake naba anaa enadumunye ninche aaidur too lng'oborri.

³⁵Naa ore ake enkata naba anaa enadumuni ilo sanduku aaya, nejo Musa, “Tudumunye, iyie Olaitoriani, naa nchoo ilmang'ati linono eisardaka[6] naa inchoo lelo likimba iyie eilanyisho te dukuya iyie.”

³⁶Naa ore ake pee eirragieki, nejo ninye, “Torrinyokinoyu iyie Olaitoriani inkalifuni iip tomon oo Siraeli.”