Read MAASAI REVISED PROTESTANT Enkikena 13 Bible Online

Enkikena 13 - MAASAI REVISED PROTESTANT bible

Enkikena 13

¹Nejoki Olaitoriani Musa, “Irriwai iltung'ana meshomo aaikitalan[7] ina kop e Kanaan, naisho nanu iltung'ana loo Siraeli;

²ore ake te pooki osho loo loo menye irriwai oltung'ani, ore ake oltung'ani naa olarikoni tiatua ninche.”

³Neaku eirriwayie apa Musa ninche ti ong'ata e Paran, te risioroto e nkitanapata o Laitoriani o lelo tung'ana pooki aa lukuny oo ltung'ana le Israel.

⁴Naa kuna apa nkarn enye: Ore to losho le Ruben naa Shamua olayioni le Sakuri;

⁵ore to losho le Simeon naa Shafat olayioni le Hor;

⁶ore to losho le Yuda, naa Kaleb olayioni le Yefune;

⁷ore to losho le Isaakar naa Igal olayioni le Yosef;

⁸ore to losho le Efraim naa Hoshea olayioni le Nuni;

⁹ore to losho le Benchamen, naa Palti olayioni le Rafu,

¹⁰ore to losho le Sebulon, naa Gadiel olayioni le Sodi;

¹¹ore to losho le Yosef aa taa to losho loo olayioni le Manase, naa Gad olayioni le Susi;

¹²ore to losho le Dan naa Amiel olayioni le Gemali;

¹³ore to losho le Asheri naa Setur olayioni le Mikael;

¹⁴ore to losho le Naftali na Nahabi olayioni le Fopsi;

¹⁵ore to losho le Gad naa Geuel olayioni le Maki.

¹⁶Kuna apa inkarn e lelo tung'ana ooirriwayie Musa meshomo aaikitalan ina kop e Kanaan. Neisho apa Musa Hoshea olayioni le Nuni enkarna, nejo Yoshua.

¹⁷Neirriwaa apa Musa ninche meshomo aaikitalan ina kop e Kanaan, nejoki ninche, “Elepa enchom Negeb te idie, nilepilepe aapuo ina kop oo ldoinyo.

¹⁸Entodol aajo kaji eikununo ina kop, tenaa kegol iltung'ana oomanya aashu tenaa keshal,

¹⁹aashu tenaa ae kuti anaa aikumok aashu sii tenaa eisidai ina kop namanya ninche anaa eitorrono aashu sii tenaa ore nena anas naamanya ninche naa ilng'oborri aashu isempewueti.

²⁰Entayiolo sii tenaa kepir enkop tenaa aimepir, ketii ilkeek anaa aimetii. Entonyok eyautu embata oo lng'anayio le ina kop.” Ore apa ina kata naa erishata oo sabibu le dukuya ooto.

²¹Neaku etudumunye apa lelo aikitalak aapuo aaikitalan enkop ebaiki ong'ata e Sin o metabaiki Rehob; embata e nejing'ieki Hamat;

²²nepuo apa ninche Negeb, neitoki aapuonu Hebron; o Ahiman o Sheshai o Talmai ore apa lelo le ishoi e Anak naa ine etii. (Eteshetaki apa Hebron ilarin oopishana te dukuya Soan te Misiri.)

²³Neitoki ninche aapuonu oerata le Eshkol, nedung'u ninche teine olng'osila oimarrimarr too lng'anayio loo sabibu, nenap iltung'ana oaare te nchata; eyautua sii ilng'anayio ooji kukumanka[8] o lng'abolo.

²⁴Keji apa ine wueji oerata le Eshkol, te nkaraki ina kimarrimarrati natudung'utuo iltung'ana le Israel.

²⁵Ore te siadi inkolong'i artam neshukunye ninche eing'uaa ina leenore e ina kop.

²⁶Nepuonu ninche enetii Musa o Aron o ina umata pooki oo ltung'ana le Israel ti ong'ata e Paran, te Kadesh; neyaki ninche olomoni o ina umata pooki, neitodol ninche ilng'anayio le ina kop.

²⁷Nejoki ninche Musa, “Kitabaitie iyiook ina kop apa nirriwayie iyiook; keruko kule o naishi, naa kulo ilng'anayio lenyena.

²⁸Kake ore eyia kegol iltung'ana oomanya ina kop, naa kesheta inkanas enye nelala oleng; ore te nebo ina kitoduaa eishoi e Anak[9] teine.

²⁹Ore Ilmaleki nemanya enkop e Negeb, ore ile Hiti o Iyebusi o le Amori nemanya ina kop oo ndoinyo, netii ile Kanaan embata e naiposha, olkeju le Yordan.”

³⁰Kake eitigira apa Kaleb olorere te dukuya Musa, nejo ninye “Mailepa iyiook aapuo nabo kata, pee kipuo aamany, amu eikindim iyiook aaibung'a ina kop.”

³¹Ore apa lelo tung'ana ooshomo te nebo Kaleb nejo, “Mikindim iyiook aashom aairisha ilo orere; amu kegol ninche aalang iyiook.”

³²Neaku eyakita apa ninche iltung'ana le Israel olomoni torrono le ina kop nashomo aaikitalan, ejo, “Ore ina kop nikishomo iyiook aaikitalan naa enkop nanya lelo oomanya, ore lelo tung'ana pooki likitoduaa teina kop naa adoru naa iltung'ana sapuki oleng.

³³Ore teine nikitoduaa intiamasin, nikitiu iyiook anaa ilmaat, neijia iyiook kitotiutuo te ninche.”