Read MAASAI REVISED PROTESTANT Enkikena 14 Bible Online

Enkikena 14 - MAASAI REVISED PROTESTANT bible

Enkikena 14

¹Neyietu ina umata pooki aaishir, neishir iltung'ana ina kewarie.

²Ore iltung'ana pooki le Israel neing'unyung'unyaki Musa o Aron; nejoki ina umata pooki ninche, “Aimeikash apa tenaa ekituata te nkop e Misiri aashu tenaa aikituata tena ong'ata!

³Kainyoo pee eyaua iyiook Olaitoriani ena kop, pee kipuonu aabatata to lalem? Ore inkituaak ang o nkera ang kutiti naa keaku inaari metuata; aimeikash naaji te iyiook te nikirrinyo aapuo Misiri?”

⁴Nejokino ninche maate, “Mategelu iyiook olarikoni pee kirrinyo aapuo Misiri.”

⁵Neitoki Musa o Aron aabatata too nkomomi te dukuya ina umata e ilo turrur loo ltung'ana le Israel.

⁶Ore Yoshua olayioni le Nuni o Kaleb olayioni le Yefune apa ootii te nebo lelo ooshomo aaikitalan enkop, nepolos ilkilani lenye,

⁷nejoki ina umata pooki oo ltung'ana le Israel, “Ore ina kop nikishomo iyiook aaikitalan naa enkop sidai oleng.

⁸Tenaa keshipakino iyiook Olaitoriani, naa keyau iyiook atua ena kop neisho iyiook, ena kop naruko kule o naishi.

⁹Emigolong'aki ake duoo intae Olaitoriani, nimiureyuyu lelo tung'ana le ina kop, amu ekimir ninche aasioki, eiwuang'ieki erripoto enye aaitung'uaa ninche netii Olaitoriani te nebo iyiook; emiureyu ninche.”

¹⁰Kake etejo olturrur pooki pee enang ninche too soito. Nelioyu enkitoo o Laitoriani to lng'obor le ntumo too ltung'ana pooki le Israel.

¹¹Nejoki Olaitoriani Musa, “Kaamenu kenya kulo tung'ana o anu? Ketoni ninche eitu aairuk nanu o anu, aasita kuna kitoduaat pooki nataasa nanu tiatua ninche?

¹²Kaosh nanu ninche to lmeitai nemaitujung ninche, naa kaitayu nanu te iyie olosho kitok naa magilani alang ninche.”

¹³Kake etiaaka Musa Olaitoriani, “Ekening naa ile Misiri ina, amu intayio iyie ele orere te ngolon ino aitung'uaa ile Misiri,

¹⁴naa kepuo ninche aaliki kulo oomanya ena kop. Etoning'o apa ninche nchere, ore iyie Olaitoriani itii atua ele orere; amu ore iyie Olaitoriani nitoduare ninche too nkonyek, neitashe enkatampoi ino te shumata ninche nilo iyie te dukuya ninche, te ng'ape e nkatampoi dama o te ng'ape e nkima kewarie.

¹⁵Ore taata te niar ele orere metuata anaa oltung'ani obo, ore apa lelo oshon ootoning'o enkisisa ino nejo,

¹⁶‘Te nkaraki nemeidim Olaitoriani ayau ele orere atua ina kop nainosie olmumai pee eisho ninche, neaku etaara ninche metuata ti ong'ata.’

¹⁷Ore naa taata, aatoomono nanu, inchoo engolon o Laitoriani eaku kitok anaa apa enisiligie ninche pee ijo,

¹⁸‘Mesioki Olaitoriani agoro, neton ninye te nyorrata nauno, nepalaki iltung'ana te ntorroni o te ngolon e nkong'u, kake meeta ninye nchere pee eiwuang'ie eng'oki eitu eitabaiki entorroni oo loo menye shumata inkera enye, shumata e ishoi e uni o shumata eishoi e ong'uan.’

¹⁹Tapaliki entorroni e kulo tung'ana, aatoomono nanu iyie, te risioroto e nkitoo e nyorrata ino, o te risioroto e mpalikino ino nitapalikia iyie ele orere, ebaiki apa te Misiri o taata.”

²⁰Neitoki Olaitoriani ajo, “Atapalikia nanu ninche te risioroto o rorei lino;

²¹kake esipa ore anaa enaishu nanu o anaa sii enabore enkop pooki enkitoo e nkisisa o Laitoriani,

²²meetae obo le kulo tung'ana ootoduaa enkitoo e nkisisa ai o nkitoduaat aainei nataasa te Misiri o tiong'ota, naatetema katitin tomon neitu ening oltoilo lai

²³olo adol ina kop apa nainosie nanu olmumai pee aisho iloo menye; nemeetae obo le lelo laatemenaitie nanu olo adol ina kop.

²⁴Kake ore osinka lai Kaleb, te nkaraki naata ninye oltau opaashaa naatusuja ninye nanu tukul, kayau nanu ninye atua ina kop apa nashomo,

²⁵ore eishoi enye naa kepuo aaya ina kop. Ore taata amu emanya Ilmaleki o lkanaani iyerat, tayooki imbelekenyayu shomo ong'ata aim enkoitoi Enaiposha Nanyokie.”

²⁶Neitoki Olaitoriani ajoki Musa o Aron,

²⁷“Kaaing'unyung'unyaki kenya ena umata torrono o anu? Atoning'o nanu enking'unyung'uny oo ltung'ana le Israel aaing'unyung'unyaki nanu.

²⁸Tiaaki ninche, ore anaa enaishu, Olaitoriani ojo, ‘Ore ina nitejo intae too nkiyiaa aainei kaitaas nanu intae.

²⁹Ore impopoki inyi kepuo aairragaa tena ong'ata, ore te siana inyi pooki ebaiki ilarin tikitam neilep, le lelo laaing'unyung'unyakitia nanu,

³⁰meetae obo olo atua ina kop apa nainosie olmumai inchere kaisho intae entamany, meteleku ake Kaleb olayioni le Yefune o Yoshua olayioni le Nuni.

³¹Kake ore nena kera inyi apa nitejo kearari, kaitijing nanu ina kop, naa kepuo ninche aayiolou ina kop apa nitemenaitie.

³²Kake ore intae keiput mpopoki inyi ena ong'ata.

³³Naa keaku inkera inyi ilchekuti loo ntare to lpurkel ilarin artam netum ninche osina te nkaraki nimisiligayuyu o metaba anaa neirrag impopoki olobayie linyi tiong'ata.

³⁴Te risioroto e siana oo nkolong'i apa nishomo aikitalan enkop, inkolong'i artam, te nkolong ake to lari, inapinapa intae entorroni inyi, ilarin artam, naa ipuopuo intae aayiolou engoro ai.’

³⁵Nanu, Olaitoriani oiroro; kesipa ena nanu ayooki aitaas ele turrur torrono pooki laaiturrurrokine nanu: ore tena ong'ata naa kepuonu ninche enkiting'oto enye tukul, naa teine epuo aaye.”

³⁶Ore lelo tung'ana apa ooirriwayie Musa meikitalana ina kop, lelo apa ootushukunye neisho olturrur meing'unyung'unyaki ninye neyau olkilikuai torrono ina kop,

³⁷lelo tung'ana apa ooyautua olkilikuai torrono le ina kop, neye ninche to lmeitai te dukuya o Laitoriani.

³⁸Kake ore Yoshua olayioni le Nuni o Kaleb olayioni le Yefune neitu eye, te nebo lelo tung'ana apa ooshomo aaikitalan enkop.

³⁹Nejoki Musa kulo rorei iltung'ana pooki le Israel neishir iltung'ana eisinanuo oleng.

⁴⁰Neyooki ninche aainyototo tadekenya oleng nepuo eneika e ina kop oo ldoinyo ejoito, “Ng'ura kitii iyiook ene, eikilep iyiook aapuo ine wueji apa neisiligie Olaitoriani iyiook; amu kitaasa iyiook eng'oki.”

⁴¹Kake etejo Musa, “Kainyoo naa taata pee igolong'akiki intae enkitanapata o Laitoriani? Measayu ina niyieuu?

⁴²Milepilepe intae aapuo, pee meari intae aairragie te dukuya ilmang'ati linyi, amu metii Olaitoriani te nebo intae.

⁴³Amu ore te idie netii Ilmaleki o Lkanaani dukuya intae, naa ipuopuo intae aabatata to lalem, te nkaraki nimbelekenyate intae aaing'uaa esujata o Laitoriani, meitoki Olaitoriani atii te nebo intae.”

⁴⁴Kake eshomo ake duoo ninche eneika teina kop oo ldoinyo, hoo neitu eipang osanduku lo sotua lo Laitoriani o Musa aaing'uaa ilng'oborri.

⁴⁵Neitoki Ilmaleki o Lkanaani apa oomanya ina kop oo ldoinyo aadou aapuonu, nemir ninche, nesujaa ninche, o metabaiki Horma.