Read MAASAI REVISED PROTESTANT Enkikena 16 Bible Online

Enkikena 16 - MAASAI REVISED PROTESTANT bible

Enkikena 16

¹ Ore apa Kora olayioni le Ishar, olayioni le Kohat olayioni le Lawi o Datan o Abiram ilayiok le Eliabu o Oni olayioni le Pelet, olayioni le Ruben

²neya iltung'ana, negolong'aki Musa, te nebo esiana oo ltung'ana le Israel, iltung'ana iip are o onom arikok le ilo turrur ootegeluaki teina umata, iltung'ana yiolot oleng.

³Neiturrurro ninche maate te nebo aagilunore Musa o Aron, nejoki ninche, “Ishomo intae aalus! Amu ore ele turrur pooki kesinya pooki ng'ae lenye, netii Olaitoriani atua ninche; kainyoo naa pee ilepiepie intae ate aaitulus te umata o Laitoriani?”

⁴Ore ake pee ening Musa ena, nebatata ninye te nkomom enye;

⁵nejoki ninye Kora o ina sholiek enye pooki, “Ore tadekenya keyooki Olaitoriani aitodolu ajo kalo olenye, naa kalo osinya, neisho meeu anyikaki ninye, ore ilo olo ninye agelu naa keisho meeu anyikaki ninye.

⁶Taasa iyie ena, ewaita embakuli e nkima, Kora o encholiek ino pooki,

⁷entipik enkima atua ninche nipikipiki enkorropil shumata ninche te dukuya Olaitoriani taaisere, ore ilo tung'ani oyooki Olaitoriani agelu neaku ilo sinyati. Ishomo aaitulus ilayiok le Lawi!”

⁸Nejoki Musa Kora, “Entoning taata, intae ilayiok le Lawi!

⁹Kentoki kiti ena te intae inchere etegelayie intae Enkai oo Siraeli aitung'uaa olturrur le Israel, pee eitataaniki intae kewan, pee iasiasa enkisiaayiare te ilo ng'obor lo Laitoriani, nintasheshe te dukuya olturrur aaisiaai ninche;

¹⁰amaa amu kiyaua ninye aitinyikaki kewan o lalashera linono lelo ayiok le Lawi te nebo iyie, ing'oruru sii intae empolosare?

¹¹Ore naa meitiship Olaitoriani ena inchere ore iyie o encholiek ino pooki inturrurrote te nebo; Kainyoo pee ing'unyung'unyakiki Aron?”

¹²Neirriwaa Musa olkilikuai aipotu Datan o Abiram lelo ayiok le Eliab; nejo ninche, “Mikipuonu iyiook.

¹³Ke mbae kiti ena inchere iyaua iyiook ailepunye teina kop naruko kule o naishi pee ilotu aar iyiook matuata tiong'ota, pee itumoki sii aitaa kewan kitok te shumata iyiook?

¹⁴Ore ninye, eitu iyie iyau iyiook ina kop naruko kule o naishi, neitu incho iyiook enjung'ore e nkop o nkurman oo lng'anayio. Ikurtu iyie inkonyek e kulo tung'ana? Mikipuonu iyiook.”

¹⁵Negoro apa Musa oleng, nejoki Olaitoriani, “Mishilaa iyie olasar lenye. Eitu ninye nanu aya osikiria lenye neitu ainyal obo lenye.”

¹⁶Nejoki Musa Kora, “Wou taaisere dukuya Olaitoriani, iyie o encholiek ino o Aron.

¹⁷Naa inchoo ake oltung'ani eya embakuli enye oo nkuk o lasar, nepik enkorropil shumata ninye, neyau ake pooki ng'ae te intae dukuya Olaitoriani embakuli enye, imbakulini iip are o onom; ore sii iyie o Aron neyau ake oltung'ani embakuli enye.”

¹⁸Neaku ewa apa oltung'ani ake embakuli enye, nepik nkimaitie atua neiteleiki enkorropil shumata, neitashe te kutuk aji ilo ng'obor le ntumo te nebo Musa o Aron.

¹⁹Neitoki Kora aiturrur ilo turrur pooki aipirakinye ninche kutukaji e ilo ng'obor le ntumo. Neliooyu enkitoo enkisisa o Laitoriani teina umata pooki.

²⁰Neitoki Olaitoriani ajoki Musa o Aron,

²¹“Entoorunye ewuang'a tena umata, pee atum nanu aidaikie ninche nabo kata.”

²²Nebatata ninche too nkomomi enye, nejo, “Na Ai, na Ai oo ltauja le pooki naishu, keas oltung'ani obo eng'oki nigorokino eumata pooki?”

²³Nejoki Olaitoriani Musa,

²⁴“Tiaaki ena umata, ‘Ewuang'a tena manyisho e Kora o Datan o Abiram.’ ”

²⁵Neitoki Musa adumunye alo enetii Datan o Abiram; nesujaa ilpayiani le Israel ninye.

²⁶Nejoki ninye ina umata, “Ewuang'a, atoomono intae enchom, entung'uai ilng'oborri le kulo tung'ana arruok, nimimbung'ubung'u hoo ae toki enye pooki pee memuti ake intae tenebo nena ng'ok enye pooki.”

²⁷Neaku eipang'a apa ninche aaing'uaa emanyisho e Kora o Datan o Abiram; neipang'u Datan o Abiram nepuonu aaitashe te kutukaji oo lng'oborri lenye, te nebo inkituaak enye o layiok lenye o nkera enye kutiti.

²⁸Nejo Musa “Tena taa iyiolouu inchere Olaitoriani laairriua mataasa kuna siaaitin pooki neme te nkaraki kewan ai.

²⁹Te neye kulo tung'ana enkeeya e oshiaake oo ltung'ana pooki aashu te neinepu entaboi oo ltung'ana pooki, neaku naa eitu aairriu Olaitoriani.

³⁰Kake te neitobiru Olaitoriani entoki ng'ejuk, nebol enkop enkutuk enye, neijoo ninche tenebo imasaa enye pooki aapuo enemeneng'a eishu, niyiolouu taa inchere Olaitoriani etemenaitie kulo tung'ana.”

³¹Ore enaidipie airoro kulo rorei pooki, ore enkop ti abori ninche neiperra; nebol enkop enkutuk enye

³²neijoo ninche o lmareita lenye o lelo tung'ana pooki le Kora o masaa enye.

³³Neaku ore ninche o nena pooki naara inkunenye nedoyio eishu aapuo enemeneng'a neikeno enkop te shumata ninche, neidaaya ninche te mpolos e ina umata.

³⁴Ore lelo Siraeli pooki oomanita ninche, neisik to lkiyioi lenye, amu etejo ninche, “Eji pee meijoo iyiook enkop.”

³⁵Nedou enkima naing'uaa Olaitoriani, nemut lelo tung'ana iip are o onom apa oopejito enkorropil.

³⁶Neitoki Olaitoriani ajoki Musa,

³⁷“Tiaaki Eliesa olayioni le Aron ilo apolosani, pee eitayu nena bakulini naapejieki enkorropil te nkima; neitalamaa enkima neidapashaa. Amu kesinya ninche.

³⁸Ore nena bakulini e kulo tung'ana ootaasa eng'oki aainosie enkishui enye, inchoo ninche eidong'unyeki imbakulini naaiteleikini olasar, amu eishorutua apa ninche te dukuya Olaitoriani; metaa kesinya ninche. Neaku kepuo ninche aaku enkitanyaanyukoto too ltung'ana le Israel.”

³⁹Neaku ewa apa Eliesa ilo apolosani nena bakulini o suyai, apa naaishorutua lelo ootapejoyioki, neidong'i aaitaa entoki naimulumulieki olperere lo lasar,

⁴⁰pee eaku enkitadamunoto too ltung'ana le Israel pee metii hoo obo leme olapolosani, leme olayioni le ishoi e Aron, onyiku alotu apej enkorropil te dukuya Olaitoriani, metiu ake anaa Kora o encholiek enye - anaa apa enatiaaka Olaitoriani Eliesa aimunye Musa.

⁴¹Ore pee ekenyu neing'unyung'unyaki eumata pooki oo ltung'ana le Israel Musa o Aron, ejo, “Itaara intae metuata iltung'ana lo Laitoriani.”

⁴²Ore ake pee eiturrurrokino ina umata Musa o Aron, neibelekenya ninche aaing'or olng'obor le ntumo; naa ing'ura, neimulumul enkatampoi ilo ng'obor, neliooyu enkitoo enkisisa o Laitoriani.

⁴³Nelotu Musa o Aron dukuya ilo ng'obor le ntumo,

⁴⁴nejoki Olaitoriani Musa,

⁴⁵“Enchom entung'uai atua ena umata, pee atum nanu aidaikie ninche nabo kata.” Nebatata ninche too nkomomi enye.

⁴⁶Nejoki Musa Aron, “Intayu embakuli ino e nkorropil, nipik enkima atua naing'uaa olperere lo lasar, nipik enkorropil shumata ninye, ninap aitasiooyo ine netii eumata, nintobir olning'o lo sotua te nkaraki ninche; amu etupukuo engoro naing'uaa Olaitoriani, neiterua alotu olmeitai.”

⁴⁷Kaae neyau Aron anaa enatiaaka Musa nekuet alo empolos eumata naa ing'ura, eidipa aiteru olmeitai tiatua iltung'ana; neinok ninye enkorropil, neitobir olning'o lo sotua o ltung'ana.

⁴⁸Neitashe ninye te rishata oo lootuata o looishu; neitasheyieki olmeitai.

⁴⁹Ore apa lelo ootuata to lmeitai naa inkalifuni tomon oong'uan o iip naapishana, metii lekua ootuata te siaai e Kora.

⁵⁰Nerrinyokino Aron Musa te kutuk aji e ilo ng'obor le ntumo, ina kata pee eitasheyieki olmeitai.