Read MAASAI REVISED PROTESTANT Enkikena 18 Bible Online

Enkikena 18 - MAASAI REVISED PROTESTANT bible

Enkikena 18

¹Nejoki Olaitoriani Aron, “Ore iyie o layiok linono, o enkaji e papaai lino te nebo iyie, iyaya intae entorroni tialo ine wueji sinyati; ore iyie o layiok linono niyaya entorroni tialo empolosare.

²Naa ore te nebo iyie toshoru sii ilalashera linono, ilo osho le Lawi, ilo osho le papaai lino, pee kitum ninche aatushulare, nikisiaai iyie ina kata itii iyie o layiok linono dukuya ilo ng'obor le shakenisho.

³Eikisiaai ninche iyie neas enkisiaayiare pooki e ilo ng'obor; kake menyikaki ninche nena masaa e ine wueji sinyati aashu enyiku aapuonu olperere lo lasar, pee meye ake ninche niye sii iyie.

⁴Inchoo kishulare ninche, nejing'u atua ilo ng'obor le ntumo, teina kisiaayiare pooki e ilo ng'obor; nemeetae likae tung'ani hoo obo likilotu anyikaki.

⁵Nijing iyie enkisiaayiare e ine wueji sinyati o enkisiaayiare o lperere lo lasar pee meitoki alotu engoro shumata iltung'ana le Israel.

⁶Naa ng'ura, aawa nanu ilalashera linono lelo le Lawi aitung'uaa atua iltung'ana le Israel, enkishooroto ninche te iyie, naaishooki Olaitoriani pee eas enkisiaayiare e ilo ng'obor le ntumo.

⁷Ore iyie o layiok linono te nebo iyie nijing'ijing'i empolosare te pooki naipirta olperere lo lasar o ina natii atua olodung'oro; nisiaisho iyie. Aaishoo nanu empolosare ino metaa enkishooroto, ore pooki ng'ae olotu anyiku neari metua.”

⁸Neitoki Olaitoriani ajoki Aron naa, “Ng'ura, aaishoo nanu iyie pooki toki naba anaa enatushumaki too nkishoorot naaitakiaiki nanu o nena tokitin pooki naaitisinyaki oo ltung'ana le Israel; aaisho nanu iyie ninche metaa erubata oo layiok linono metaa erubata enye e anaake.

⁹Keaku enino ina nasinya aisul naiteng'elaki neitu epejori te nkima; ore pooki kishooroto enye o lasar, o pooki asar lenye le ng'oki laaisho ninche nanu naa keaku kesinya oleng te iyie o too layiok linono.

¹⁰Te wueji nesinya oleng inya iyie ina naa keidim pooki lee ainosa, kesinya ina te iyie.

¹¹Enino sii ena, ilo asar loo nkishorunot enye, ore lelo asarri pooki ooyuki loo ltung'ana le Israel; aaishoo nanu iyie ninche o layiok linono o ntoyie inono te nebo iyie, metaa erubata ino e anaake. Ore pooki ng'ae lemeeta entioto otii atua enkaji ino neidim ainosa.

¹²Ore ina ilata sidai aisul o ina aisho pooki sidai o entapa o lelo ng'anayio le dukuya ooisho ninche Olaitoriani, aaishoo nanu iyie.

¹³Ore lelo ng'anayio oong'as aaku te pooki naatii atua ina kop, ooyaki ninche Olaitoriani, naa keaku ilkulinyi; ore pooki ng'ae lemeeta entioto otii atua enkaji ino neidim ainosa.

¹⁴Ore pooki naiteng'elakaki Olaitoriani tiatua Siraeli naa keaku eninyi.

¹⁵Ore pooki kikau aa olayioni le tung'ani aashu olee le ng'ues, ilo oishori Olaitoriani naa keaku olinyi, ore ake eyia olkikau le tung'ani tokordu inyang'u, ore olkikau pooki le ng'ues lemesinya inyang'u tokordu.

¹⁶Ore enkinyang'a e nkordunoto enye (aa te mbotoro o lapa obo ikordu ninche) tipika shekeli imiet e nkosholai, te risioroto e shekeli e ine wueji sinyati.

¹⁷Kake ore olkikau le nkiteng, aashu olkikau le nker aashu olkikau le nkine, mikordu ainyang'u; kesinya ninche. Isuaaki osarge lenye shumata olperere lo lasar, nipejoo eilata enye metaa olasar opejori te nkima, esong'ouna narropil to Laitoriani;

¹⁸kake ore inkiri enye naa keaku nkuninyi, anaa ilo oikulu[10] oyukoki o anaa ina muro enkalo e tatene naara ininono.

¹⁹Ore nena tokitin pooki naasinya naaisho iltung'ana le Israel Olaitoriani, aaishoo nanu iyie o layiok linono o ntoyie inono naatii te nebo iyie, metaa erubata e anaake. Osotua le munyan ele intarasi te dukuya Olaitoriani, te iyie o te ishoi ino natii te nebo iyie.”

²⁰Neitoki Olaitoriani ajoki Aron, “Miata iyie enjung'ore tiatua enkop enye, nimiata erubata tiatua ninche; kara nanu erubata ino nara enjung'ore ino tiatua iltung'ana le Israel.

²¹“Ore ile Lawi aishoo nanu ninche pooki ematua e tomon tiatua Isiraeli metaa enjung'ore enye, pee eaku ole rrinyore teina kisiaayiare enye naisiaaisho tiatua ilo ng'obor le ntumo.

²²Ore naa ebaiki taata mepuonu iltung'ana le Israel aanyikaki ilo ng'obor le ntumo, menap ake ng'ok neye.

²³Kake lelo le Lawi oas enkisiaayiare e ilo ng'obor le ntumo, naa kenap ninche ina ng'oki enye; keaku ena enkitanapata nadamuni tiatua iishoritin inyi pooki; ore tiatua iltung'ana le Israel meeta ninche enjung'ore.

²⁴Amu ore ina rubata e tomon oo ltung'ana le Israel naitarasaki ninche Olaitoriani anaa olasar, aishoo nanu ile Lawi metaa enjung'ore enye; metaa atejo nanu tialo ninche inchere metum enjung'ore tiatua iltung'ana loo Siraeli.”

²⁵Nejoki Olaitoriani Musa,

²⁶“Ore ake sii, shomo tiaaki ile Lawi, ‘Ti niyaya too ltung'ana le Israel ina matua e tomon naishoo nanu intae te ninche pee eaku enjung'ore inyi nintokiki naa sii intae aaitayu olasar teina aaisho Olaitoriani, ematua e tomon napukunye ematua e tomon.

²⁷Naa keikenari ilo asar linyi anaa entapa o soit oiutuutishoreki aashu anaa enaisho naing'uaa enkironyet.

²⁸Neaku intarasakiki sii intae Olaitoriani olasar oing'uaa nena matuan inyi e tomon, ning'amumu too ltung'ana le Israel. Naa ore te nena ninchosho ilo asar lo Laitoriani Aron ilo apolosani.

²⁹Ore tiatua nena kishoorot inyi pooki, entarasai pooki kishoroto naipirakinore Olaitoriani, ina naisul pooki, ninchooyoyo ina naisul pooki.’

³⁰Metaa tiaaki iyie ninche, ‘Ti nindipidipi aaishooi ilo asar, ina naisul, ore ina naleku neikenakini ile Lawi anaa entoki naing'uaa olkurroto oidong'ishoreki anaa entoki naing'uaa enkironyet oo sabibu;

³¹nindim iyie ainosa te pooki wueji, iyie o enkaji ino, amu enkishooroto ino te nkaraki enkisiaayiare ino tiatua ilo ng'obor le ntumo.

³²Niminap iyie eng'oki te nkinosata e ina, indipa iyie aishooi enaisul kake emisarkionie nena tokitin naasinya oo ltung'ana le Israel, pee miyeye ake.’ ”