Read MAASAI REVISED PROTESTANT Enkikena 2 Bible Online

Enkikena 2 - MAASAI REVISED PROTESTANT bible

Enkikena 2

¹Nejoki Olaitoriani Musa o Aron,

²“Inchoo iltung'ana le Israel emanyisho te mbata e nanka enye, to lmonekie loo nkajijik oo loo menye, nchoo eun ilng'oborri aaipirie ilo ng'obor le ntumo te pooki shoto.

³Ore lelo oomanyisho te nkalo o loosaen - te nkalo e nkilepunoto e nkolong naa keaku enanka o lng'obor le Yuda too lturrurri lenye, aa ore olarikoni lo lturrur le Yuda naa Nahashon olayioni le Aminadab;

⁴ore esiana o lorora anaa enaikenaki naa inkalifuni ntomoni naapishana oong'uan o iip ile.

⁵Ore lelo ooitoki aaun ilng'oborri aatashare ninye naa olosho le Isaakar, ore olarikoni loo ltung'ana le Isaakar naa Natanel olayioni le Suar.

⁶Ore esiana o lorora lenye anaa enaikenaki naa nkalifuni onom o ong'uan o iip ong'uan.

⁷Nesuju olosho le Sebulon, naa Eliab olayioni le Helon olarikoni loo ltung'ana le Sebulon.

⁸Ore esiana o lorora lenye anaa enaikenaki naa inkalifuni onom oopishana o iip ong'uan.

⁹Ore esiana nalulung'a e lelo ng'oborri le Yuda, too lturrurri lenye naa inkalifuni iip nabo o ntomoni isiet o ile o iip ong'uan. Ninche oong'as aapuo.

¹⁰“Ore te nkalo e kopikop naa enanka oo lng'oborri le Ruben too lturrurri lenye, ore olarikoni loo ltung'ana le Ruben naa Elisur olayioni le Shedeur.

¹¹Ore esiana o lorora lenye anaa enaikenaki naa inkalifuni artam o ile o iip imiet.

¹²Ore lelo ooun ilng'oborri aasujaki ninche naa olosho le Simeon, ore olarikoni loo ltung'ana le Simeon naa Shelumiel olayioni le Surishadai.

¹³Ore esiana o lorora lenye anaa enaikenaki naa inkalifuni onom o oudo o iip uni.

¹⁴Nesujaki olosho le Gad, ore olarikoni loo ltung'ana le Gad naa Elisaf olayioni le Reuel.

¹⁵Ore esiana o lorora lenye anaa enaikenaki naa inkalifuni artam o imiet o iip ile o onom.

¹⁶Ore esiana pooki oo lng'oborri le Ruben, too lturrurri lenye naa inkalifuni iip o onom o obo o iip ong'uan o onom. Ninche oaku ili aare.

¹⁷“Neitokini aaitusuj olng'obor le ntumo, nepiki ilo ng'obor loo Lawi empolos oo lng'oborri; ore anaa enamanyisho ninche inchoo eiko neijia, aapik ake olng'obor erishata enye, enanka ake o enanka.

¹⁸“Ore te nkalo o loo ntoluo naa enanka oo lng'oborri le Efraim, too lturrurri lenye, ore olarikoni loo ltung'ana le Efraim naa Elishama olayioni le Amihud.

¹⁹Ore esiana o lorora lenye anaa enaikenaki naa inkalifuni artam o iip imiet.

²⁰Ore olosujaki ninche naa olosho le Manase, ore olarikoni loo ltung'ana le Manase naa Gamaliel olayioni le Pedasur,

²¹ore esiana o lorora lenye anaa enaikenaki naa inkalifuni tomoni uni o aare o iip are.

²²Neitoki asuju olosho le Benchamen, ore olarikoni loo ltung'ana le Benchamen naa Abidan olayioni le Gideon.

²³Ore esiana o lorora lenye anaa enaikenaki naa inkalifuni tomoni uni o imiet o iip ong'uan.

²⁴Ore esiana pooki oo lng'oborri le Efraim, too lturrurri lenye naa inkalifuni iip nabo o ntomoni isiet o iip nabo. Ninche oaku ili okuni.

²⁵“Ore te nkalo e moikuape naa enkereri oo lng'oborri le Dan too lturrurri lenye, ore olarikoni loo ltung'ana le Dan naa Ahi-eser olayioni le Amishadai.

²⁶Ore esiana o lorora lenye anaa enaikenaki naa inkalifuni ntomoni ile o aare o iip naapishana.

²⁷Ore lelo oosujaki ninche too lng'oborri naa olosho le Asheri, ore olarikoni loo ltung'ana le Asheri naa Pagiel olayioni le Okran.

²⁸Ore esiana o lorora lenye naa inkalifuni artam o obo o iip imiet.

²⁹Neitoki asuju olosho le Naftali, ore olarikoni loo ltung'ana le Naftali naa Ahira olayioni le Enan.

³⁰Ore esiana o lorora lenye anaa enaikenaki naa inkalifuni onom o okuni o iip ong'uan.

³¹Ore esiana pooki oo lng'oborri le Dan naa inkalifuni iip nabo o onom o opishana o iip ile. Ninche oobayie anaa too nankan.”

³²Kulo ninche iltung'ana le Israel anaa enaikenaki too nkajijik oo loo menye; ore lelo pooki apa ootii ilng'oborri ooikenaki too lturrurri lenye naa inkalifuni iip ile o okuni o iip imiet o onom.

³³Kake eitu apa eikeni ile Lawi te nebo iltung'ana le Israel, anaa apa enaitanapa Olaitoriani Musa.

³⁴Neijia apa eikuna iltung'ana le Israel. Ore te risioroto e ina pooki naitanapa Olaitoriani Musa, neiko ninche neijia aaun ilng'oborri too nkererin, oltung'ani ake to lmarei lenye te risioroto e nkaji e papaai lenye.