Read MAASAI REVISED PROTESTANT Enkikena 20 Bible Online

Enkikena 20 - MAASAI REVISED PROTESTANT bible

Enkikena 20

¹Ore iltung'ana le Israel, ina umata pooki, nepuonu ina ong'ata e Sin, to lapa le dukuya, netoni lelo tung'ana te Kadesh; neye Miriam teine, nenukari ninye teine.

²Nemetii apa enkare naok ina umata; neiturrurro ninche maate aarare Musa nearare Aron.

³Neishankarrare lelo tung'ana Musa, nejoki, “Enaikash apa tenaa aikituata ina kata apa pee eye ilalashera lang te dukuya Olaitoriani.

⁴Kainyoo iyie pee iyaua ena umata o Laitoriani atua ena ong'ata, pee kipuonu aaye tene, iyiook o nkishu ang.

⁵Naa kainyoo pee ilepunye iyiook aitupuku te Misiri, ayau iyiook ene wueji torrono? Mme ewueji ene e nkurma, aashu ilng'abolo aashu isabibu aashu ilng'anayio ooji kukumanka; nemetii enkare naoki.”

⁶Nepuo Musa o Aron aaing'uaa ine netii eumata aapuo kutukaji eilo ng'obor le ntumo, nebatata too nkomomi enye. Neliooyu enkitoo o Laitoriani te ninche,

⁷nejoki Olaitoriani Musa,

⁸“Iwa ina ng'udi, nilo aiturrur ina umata, iyie o Aron ilo alashe lino, nijoki ina dapidapoi te dukuya inkonyek enye meishoru enkare; neaku iyau iyie enkare naing'uaa atua endapidapoi te nkaraki ninche; nincho metooko ina umata o nkishu enye.”

⁹Neya Musa ina ng'udi te dukuya Olaitoriani, anaa enaitanapa Olaitoriani ninye.

¹⁰Neiturrur Musa o Aron ina umata te nebo te dukuya ina dapidapoi nejoki ninche, “Entoning taata, intae iloogolongu; aikiyaki iyiook intae enkare naing'uaa ena dapidapoi?”

¹¹Neilepie Musa enkaina enye aosh ina dapidapoi teina ng'udi enye katitin are; nerukunye enkare te nkumoi, neok ina umata, o nkishu enye.

¹²Nejoki Olaitoriani Musa o Aron, “Ore te nkaraki neitu intae kirukuruku nanu, pee kintisinyinyi nanu too nkonyek e kulo tung'ana le Israel, miyauu naa ena umata aaitijing atua ina kop naishoo ninche.”

¹³Inkariak e Meriba nena, naa teine eishankarrare iltung'ana le Israel Olaitoriani, neitodolu ninye esinyatisho enye te ninche.

¹⁴Eirriwayie apa Musa ilkiliku te Kadesh meshomo enetii olaiguanani le Edom, nejoki, “Inji ejo olalashe linyi Israel: iyiolo iyie enyamali pooki nikinoto iyiook:

¹⁵enapa kata pee epuo loo papa Misiri nikibik iyiook te Misiri enkata naado; ore lelo le Misiri neitaas iyiook entorroni o loo papa;

¹⁶ore ake pee kinchiraki Olaitoriani, nening ninye oltoilo lang, neirriwaki iyiook olmalaika oilepunye iyiook aitupuku te Misiri, naa noolo iyiook ootii Kadesh, enkanasa natii olpolosie le nkop ino.

¹⁷Inchoo naa taata iyiook maima atua enkop ino. Mikiimaa iyiook inkurman aashu ilookeri loo sabibu, nimikiok enkare to lchorro; e nkoitoi nalala o laiguanani kiim. Mikimbelekenya iyiook aaim enkalo e tatene aashu enkalo e kedianye o metaba anaa nikimpang tiatua enkop ino.”

¹⁸Kake etiaaka apa Edom ninye, “Miim iyie enkop ai, maalotu ake aarare to lalem.”

¹⁹Nejoki iltung'ana le Israel ninye, “Eikipuo iyiook aaim enkoitoi nalala; naa ti nikiok iyiook enkare ino, nanu o nkishu aainei, nalak nanu; nchooki ake duoo maimai too nkejek, metii ae toki.”

²⁰Kake etejo apa ninye, “Mipuopuo intae aaim.” Nelotu Edom aarare ninche eeta iltung'ana kumok o enjore nagol.

²¹Neaku etanya apa Edom eisho Israel enkoitoi naaim te nkop enye, nerrinyo Isiraeli aaing'uaa ninye.

²²Nepuo ninche aaing'uaa Kadesh, ore lelo tung'ana le Israel ina umata pooki, nepuonu Oldoinyo le Hor.

²³Nejoki Olaitoriani Musa o Aron to ldoinyo le Hor, to lpolosie le nkop e Edom,

²⁴“Kelo Aron eneiturrurrore iltung'ana lenyena apa ootuata; amu mejing ninye atua ina kop naishoo nanu iltung'ana le Israel, amu etogolong'aka apa enkitanapata ai too inkariak e Meriba.

²⁵Iwa Aron o Eliesa olayioni lenye niyau ninche enchumata Oldoinyo le Hor;

²⁶nioru Aroni ilkilani lenyena ninchopoki Eliesa olayioni lenye; amu kelo Aron eneiturrurrokino iltung'ana lenyena, naa keye ninye teine.”

²⁷Neas Musa anaa enaitanapa Olaitoriani, neilep ninche aapuo enchumata Oldoinyo le Hor eing'orita ina umata pooki.

²⁸Neitayu Musa lelo kilani le Aron, neishopoki Eliesa olayioni lenye; neye Aron teine te nchumata o ldoinyo. Neitoki Musa o Eliesa aadou te ilo doinyo.

²⁹Ore ake pee edol ina umata pooki aajo etua Aron neishiraki enkaji pooki e Israel Aron inkolong'i tomoni uni.