Read MAASAI REVISED PROTESTANT Enkikena 22 Bible Online

Enkikena 22 - MAASAI REVISED PROTESTANT bible

Enkikena 22

¹Neitoki iltung'ana le Israel aadumunye, nepuo aaun ilng'oborri teina kop naisiasha e Moab, te lido kekun le Yordan te mbata e Yeriko.

²Netoduaa apa Balak olayioni le Sipor nena pooki naaitaasa Isiraeli ile Amori.

³Neirut oleng Moab te nkaraki iltung'ana, amu eikumok apa oleng; eidimua apa Moab enkuretisho eure iltung'ana le Israel.

⁴Nejoki Moab lelo payiani le Midian, “Kemeju taata ele orora pooki toki namanita iyiook, anaa enameju olkiteng inkujit e ong'ata.” Neaku ore apa Balak olayioni le Sipor, laa ninye apa olaiguanani le Moab teina kata,

⁵neirriwaki Balak ilkiliku Balaam olayioni le Beor te Peter, apa aa ninye nataaniki Olkeju, tiatua enkop e Amawa pee eipotu ninye, ajoki, “Ng'ura, eileputua olorere te Misiri; oitoipo oriong olchoni le nkop, naaetuo aatalakinore te manyisho.

⁶Wou naa taata, tediaa kulo tung'ana te nkaraki nanu, amu aimagil ninche te nanu; pee ebaiki namir nanu ninche naidurrie nanu ninche tena kop; amu kayiolo nanu ajo ore ilo limayian iyie nemayiana, ore ilo lidek netediaaki.”

⁷Nepuo ilpayiani le Moab o lpayiani le Midian eibung'ita mpisai naalakieki enaibon too nkaik enye; nepuonu ninche enetii Balaam, neisho ninye olkilikuai le Balak.

⁸Nejoki ninye ninche, “Erraga ene ena kewarie, amu kayaki nanu intae olomoni anaa enaairorie nanu Olaitoriani;” neaku etotona apa lelo kituaak le Moab te nebo Balaam.

⁹Nelotu Enkai enetii Balaam nejoki, “Kakua tung'ana kulo ootii te nebo iyie?”

¹⁰Nejoki Balaam Enkai, “Balak olayioni le Sipor, olaiguanani le Moab ninye laairriwaka olkilikuai ejo,

¹¹‘Ng'ura eileputua olorere te Misiri neiput oriong olchoni le nkop; wou naa taata tediaa te nkaraki nanu; pee ebaiki naarare nanu ninche naidurrie ninche.’ ”

¹²Nejoki Enkai Balam, “Milo iyie te nebo ninche; midek iyie kulo tung'ana, amu kemayiana ninche.”

¹³Neinyototo Balam tadekenya, nejoki lelo kituaak le Balak, “Enchom enkop inyi, amu etanya Olaitoriani alo te nebo intae.”

¹⁴Neaku etudumunye lelo kituaak le Moab nepuo enetii Balak, nejoki. “Etanya Balaam elotu te nebo iyiook.”

¹⁵Neigil ake Balak airriwaa ilkituaak, iltung'ana kumok oyanyiti alang lelo le dukuya.

¹⁶Nepuonu ninche enetii Balaam nejoki ninye, “Nji ejo Balak olayioni le Sipor: ‘Mincho kimbooyo ae toki eitu ilotu enatii;

¹⁷amu kesipa kaaisho nanu iyie enkanyit kitok, ore entoki pooki naba anaa enikijoki iyie naa kaas; wou tediaa ele orere te nkaraki nanu.’ ”

¹⁸Kake etawala apa Balaam ajoki lelo sinkan le Balak, “Ore hoo naaji ninye tenaa kaaisho Balak enkaji enye ebore enkosholai o saabu, maidim nanu ashomo atogiroi enkitanapata o Laitoriani Enkai ai, aitodorropu aashu aitulus.

¹⁹Atoomono naa intae, enyaaki erraga ene ena kewarie, pee atum atayiolo enaaitoki Olaitoriani ajoki nanu.”

²⁰Nelotu Enkai enetii Balaam kewarie nejoki ninye, “Tenaa eikietuo lelo tung'ana aaipot iyie, inyo, shomo te nebo ninche; kake ina ake naajoki iyie, ninye taasa.”

²¹Neaku etudumunye apa Balaam tadekenya, neirot osikiria lenye, nelo te nebo lelo kituaak le Moab.

²²Kake eyupuyupo engoro e Nkai te nkaraki nashomo ninye; nelo olmalaika lo Laitoriani aitashe te nkoitoi anaa olmang'atinta lenye. Nekedito apa Balaam osikiria, netii isinkan lenyena oaare te nebo ninye.

²³Nedol ilo sikiria olmalaika lo Laitoriani eitashe te nkoitoi eeta enchutati olalem te nkaina enye; neibelekenya ilo sikiria apaash enkoitoi, nelo ong'ata; neosh Balaam ilo sikiria aboiniki enkoitoi.

²⁴Neitoki ilo malaika lo Laitoriani alo aitashe to lgos le nkoitoi napirik, te rishata oo sabibu, netii ake esuntai pooki shoto.

²⁵Ore ake pee edol ilo sikiria ilo malaika lo Laitoriani, nelo arepaa esuntai, nepudaki enkeju e Balaam esuntai; neitoki ninye aosh.

²⁶Neitoki ilo malaika lo Laitoriani aigut alo dukuya, nelo aitashe te wueji ronkai te nkoitoi, nemetii ewueji neibelekenyakino te nkalo e tatene aashu te nkalo e kedianye.

²⁷Ore ake pee edol ilo sikiria olmalaika lo Laitoriani, neirrag te nkop ti abori Balaam; neyupuyup engoro e Balaam, neosh ninye ilo sikiria te ng'udi enye.

²⁸Nebol Olaitoriani enkutuk e ilo sikiria, nejoki ninye Balaam, “Kainyoo nanu aaitaasa iyie, pee kitoosho iyie nanu katitin uni?”

²⁹Nejoki Balaam ilo sikiria, “Te nkaraki nikigira iyie aiguranie nanu. Kenyor naji naa kaata olalem, pee aatum atara iyie tua.”

³⁰Nejoki ilo sikiria Balaam, “Emara nanu osikiria lino, naa ninye itakedo te nkishui ino pooki o metabaiki ena olong? Katamoo nanu aaitaas iyie ena?” Nejoki Balaam, “A'a.”

³¹Nebol Olaitoriani nkonyek e Balaam, nedol ninye ilo malaika lo Laitoriani eitashe te nkoitoi eeta enchutati o lalem te nkaina enye; neirrug Balaam endukuya enye, nebatata te nkomom.

³²Nejoki olmalaika lo Laitoriani ninye, “Kainyoo iyie pee itoosho osikiria lino kuna katitin uni? Ng'ura, aewuo nanu pee aaibooyo amu ore enkoitoi ino naa kepaashare enkoitoi ai;

³³natoduaa nanu ele sikiria, naaibelekenya apaash nanu kuna katitin pokira uni. Te neme kaaibelekenye ninye apaash, esipa, anaata aatara iyie tua napal ninye eishu.”

³⁴Neitoki Balaam ajoki ilo malaika lo Laitoriani, “Ataasa nanu eng'oki, amu eitu nanu ayiolou ajo itii enkoitoi pee kimbooyo nanu. Ore naa taata, tenaa embae torrono ena too nkonyek inono, karrinyo nanu alo.”

³⁵Nejoki ilo malaika lo Laitoriani Balaam, “Shomo iyie te nebo kulo tung'ana; kake ilo rorei ake laaliki ninye shomo iroro.” Neaku eshomo apa Balaam te nebo lelo kituaak le Balak.

³⁶Ore ake pee ening Balak inchere eewuo Balaam, neipang ninye alo anang'are ninye te nkanasa e Moab, te ilo polosie oitayu olkeju te Arnon, te ilo polosie kewan.

³⁷Nejoki Balak Balaam, “Keitu nanu airriu ilkiliku pee kimpoti iyie? Kainyoo pee eitu iyie ilotu enatii? Eimaaidim nanu ayanyita iyie?” Nejoki Balaam Balak, “Oi, aewuo nanu enitii?

³⁸Keton nanu aata ae golon nairorie ai toki? Ilo rorei opik Enkai enkutuk ai, ninye nanu airo.”

³⁹Nelo Balaam te nebo Balak, nepuonu Kariat-husot.

⁴⁰Nepolos Balak ilmong'i o ntare, neyaki Balaam o lelo kituaak ootii te nebo ninye.

⁴¹Ore pee ekenyu nerik Balak Balaam o metabaiki Bamotbaal; ore teine nedol ninye emurte nataaniki oo ltung'ana.