Read MAASAI REVISED PROTESTANT Enkikena 23 Bible Online

Enkikena 23 - MAASAI REVISED PROTESTANT bible

Enkikena 23

¹Neitoki Balaam ajoki Balak, “Teshetakaki nanu ilpereren oopishana lo lasar tene, nikincho nanu iloing'ok oopishana o lmeregeshi oopishana.”

²Neas Balak anaa ina natejo Balaam; ore Balak o Balaam neishoru ake to lperere lo lasar oloing'oni o lmeregesh.

³Neitoki Balaam ajoki Balak, “Intasho te mbata o lasar lino opejori, mashomo nanu amu keidimayu naalotu nanu Olaitoriani atumore; naa ore pooki naba anaa enaaitodol nanu naaliki iyie.” Neilep ninye alo ewueji neisiasha neika.

⁴Netumore Enkai Balaam; nejoki Balaam ninye, “Aitobira ilpereren lo lasar oopishana, naishorua nanu te nchumata e pooki perere, oloing'oni o lmeregesh.”

⁵Nepik Olaitoriani ororei enkutuk e Balaam, nejoki ninye, “Torrinyoyu iyie shomo enetii Balak, naa inji shomo tiaaki.”

⁶Nerrinyo ninye alo enetii ninye, nedol eitashe ninye te nebo ilkituaak pooki le Moab te mbata e ilo asar lenye opejori.

⁷Neraposhoki Balaam ajo, “Te Aram aaipoto nanu Balak, ilo aiguanani le Moab oing'uaa ildoinyio lo loosaen: ‘Wou tediaa Yakobo te nkaraki nanu, naa wou ilepilepaki Israel!’

⁸Kaji nanu aiko te nadek ilo leitu edek Enkai? Kaji nanu aiko te nailepilepaki ilo leitu eilepilepaki Olaitoriani?

⁹Amu ore too nchumat oo ldoinyo nadol nanu ninye, te nchumata oo ndoinyo aing'or nanu ninye; nadol olorere ootoni o openy, nemeshulare ninche kulikae oreren!

¹⁰Kaing'ae naidim aikena inkera e Yakobo naaba anaa enterit, aashu ematua e ong'uan e Israel? Intasho matua nanu keeya o ltung'ani supat, naa nchoo enkiting'oto ai etiu anaa enenye!”

¹¹Nejoki Balak Balaam, “Kainyoo ena nikintaasa iyie nanu? Aayawua iyie pee ilotu adek ilmang'ati laainei, naa ng'ura, meeta ae nitaasa itamayiana ake.”

¹²Newal ninye ajo, “Eimaning nanu nairo ina natipika Olaitoriani atua enkutuk ai?”

¹³Nejoki Balak Balaam, “Wou te nebo nanu maape ae wueji, nindimie iyie atodolie ninche; idol iyie emurte nabayie te ninche, kake midol ninche pooki; pee itum iyie atediaa ninche te nkaraki nanu teine.”

¹⁴Nerik ninye ong'ata e Sifim o meitabaiki enchumata e Pisga, neshet ilpereren oopishana lo lasar neishoru ake oloing'oni o lmeregesh to lperere ake pooki lo lasar.

¹⁵Nejoki Balaam Balak, “Ntasho tene te mbata o lasar lino opejori, mashomo atumore Olaitoriani te idie.”

¹⁶Netumore Olaitoriani Balaam, nepik ororei enkutuk enye, nejo ninye, “Torrinyokinoyu Balak, naa inji shomo tiaaki.”

¹⁷Nelo enetii ninye, nedol Balak eitashe ninye te mbata o lasar lenye opejori, o lkituaak le Moab te nebo ninye. Nejoki Balak ninye, “Kainyoo etejo Olaitoriani?”

¹⁸Neitoki Balaam araposhoki, nejo, “Inyo, Balak, toning'o; toning'oki nanu ara Sipor:

¹⁹Mme oltung'ani Enkai, eji metaa kelejisho, aashu enkerai e tung'ani eji metaa keirridu. Amaa, keiro ninye nemeitabaya? Aashu kelimu ninye nemeas?

²⁰Ng'ura, atang'amua nanu enkitanapata pee amayianisho; etamayianishe ninye, nemalak nanu.

²¹Eitu ninye eing'or olbuket le Yakobo; neitu ninye edol entorroni te Israel. Etii Olaitoriani Enkai enye te nebo ninche, ore embuakunoto o laiguanani netii te nebo ninche.

²²Eyawua Enkai ninche aitung'uaa Misiri, netiu apa ninche anaa iloata imowuarak o losokuan.

²³Meetae eushei tialo Yakobo, metii esakut tialo Israel; kepuoi taata aajo tialo Yakobo o Israel, ‘Kaa etaasa Enkai!’

²⁴Ng'ura, ele orere! Eilepa anaa elipong o lng'atuny, edumunye anaa olng'atuny odumunye; nemeirrag ninye o metaba anaa nenya ina ng'ues narreshito, neok osarge le ina natasesekuanaki.”

²⁵Nejoki Balak Balaam, “Midek ninche katukul, nimimayian ninche katukul.”

²⁶Kake etawalikia Balaam Balak ajoki, “Keitu nanu aajoki iyie inchere, ‘Ore pooki naajoki Olaitoriani, naa ina ake aas?’ ”

²⁷Nejoki Balak Balaam, “Wou taata maatoriko nanu ae wueji; amu ebaiki neitiship ine Enkai pee idek iyie ninche te nkaraki nanu.”

²⁸Nerik Balak Balaam enchumata o ldoinyo le Peor ine netalita olpurkel.

²⁹Nejoki Balaam Balak, “Teshetakaki nanu tene ilpereren oopishana lo lasar, nikincho nanu tene iloing'ok oopishana o lmeregeshi oopishana.”

³⁰Neas Balak anaa enatiaka Balaam, neishooyo ninye oloing'oni o lmeregesh te pooki perere lo lasar.