Read MAASAI REVISED PROTESTANT Enkikena 24 Bible Online

Enkikena 24 - MAASAI REVISED PROTESTANT bible

Enkikena 24

¹Ore ake pee edol Balaam nchere keitiship Olaitoriani te nemayian ninye Israel, neitu ninye elo, anaa te kulie katitin, aing'oru intaleng'o, kake eipirie ninye enkomom enye olpurkel.

²Neshumu Balaam inkonyek enyena, nedol Israel etii ilng'oborri, anaa loshon. Nelotu Enkiyang'et e Nkai shumata ninye,

³neraposhoki[12] ninye, nejo, “Irorei le Balaam olayioni le Beor, irorei le ilo tung'ani otaboloki enkong'u enye,

⁴irorei le ilo oning irorei le Nkai, ilo odol enduata o Laidimani, otabatate, kake meimulumul inkonyek enyena:

⁵kebaa esidano oo lng'oborri linono, iyie Yakobo, o emanyisho ino, iyie Israel!

⁶Eikununo anaa ierat oopuo eniaado, anaa nkurman naatii embata e wuaso, enyaanyukie osuguroi otuno Olaitoriani, eikununo anaa iltarakua ootii embata e nkare.

⁷Kedooyo enkare too ltooi lenyena, ore olantererai lenye neaku inkariak kumok etii, ore olaiguanani lenye naa ninye olusoo alang Agag, ore enkitoo enye naa kebul.

⁸Eyawua Enkai ninye aitupuku te Misiri; netiu ninye anaa oloata mouarak o losokuan, kelo ninye aijoo lelo oshon mang'ati lenyena, negil iloik lenye aitaa mbelibelat, neng'or ninche too mbaa enyena.

⁹Eirraga ninye anaa olng'atuny, naa amaa, amu eikununo anaa elipong o lng'atuny, aing'ae olo ainyeyie ninye? Kemayiana pooki ng'ae likimayian iyie, nediaa pooki ng'ae likidek iyie.”

¹⁰Neyupuyup engoro e Balak tialo Balaam, neosh ninye inkaik, neitoki Balak ajoki Balaam, “Aaipotuo nanu iyie pee ilotu adek ilmang'ati laainei, naa ng'ura, itamayiana iyie ninche kuna katitin pokira uni.

¹¹Ore naa taata isika shomo ewueji ino; atejo apa nanu, ‘Kaayanyit iyie,’ kake kimboo Olaitoriani amitiki enkanyit.”

¹²Nejoki Balaam Balak, “Keitu apa nanu ajoki lelo kiliku linono likirriwaka nanu,

¹³‘Tenaa naaji ninye kaaisho Balak enkaji enye ebore enkosholai o saabu, nemaidim ake ashomo atapaasha ororei lo Laitoriani, aas esidai aashu entorrono te yieunoto ai makewan, ore ina najo Olaitoriani naa ina nanu airo?’

¹⁴“Ore naa, kalo nanu enetii iltung'ana laainei; wou, pee aaliki nanu enepuo kulo tung'ana aaitaas iltung'ana linyi, too nkolong'i e siadi.”

¹⁵Neitoki ninye araposhoki, nejo, “Irorei le Balaam olayioni le Beor, irorei lo ltung'ani otaboloki enkong'u enye,

¹⁶irorei le ilo oning irorei le Nkai, neyiolo eng'eno e Ilo otii shumata Aisul ilo odol enduata o Laidimani, ilo obatata, kake eitu eimulumul inkonyek enyena.

¹⁷Adolita nanu ninye, kake mme tena kata; adolita ninye, kake metaana; eipang'ua olakira tiatua Yakobo, naa keilepu eng'udi enkitoo te Israel; kedany ninye olpura le nkomom le Moab. Negiligil ilayiok pooki le Sheti.

¹⁸Kepuoi aaya Edom, ore Seir o ilmang'ati lenyena naa kepuoi aaya, ore Israel neisulu,

¹⁹Te Yakobo easisho engolon e nkitoo, ore lelo aishirak too nkanas neidaikieki!”

²⁰Neitoki ninye aing'or Amalek, neraposhoki ajo, “Amalek apa olayioni le dukuya loo loshon, kake ore te siadi naa keidaikieki.”

²¹Neitoki aing'or ile Kain, neraposhoki, nejo, “Kegol neserian ina manyisho ino, ore enkaji netipikaki enchumata endapidapoi;

²²Kake ore ake eyia, keidaikieki Kain. Ke nkata kenya nabaa kiyaita Ashur aaraya?”

²³Neitoki araposhoki ajo, “Amaa, kaing'ae kenya elekuni te neas Enkai ena?

²⁴Kake kepuonu imelin naaing'uaa Kitim, naa kepuonu aaisilisil Ashur o Eber; kake kelo ake sii ninye aidak.”

²⁵Neitoki Balaam adumunye nelo ewueji enye; nelo sii Balak te nkoitoi enye.