Read MAASAI REVISED PROTESTANT Enkikena 28 Bible Online

Enkikena 28 - MAASAI REVISED PROTESTANT bible

Enkikena 28

¹Nejoki Olaitoriani Musa,

²“Ntanapa iltung'ana le Israel, tiaaki ninche, ‘Ore olasar lai, endaa ai too lasarri laainei le nkima, esong'ouna ai narropil, embung'a pee kintarasakiki nanu te rishata enye.’

³Naa tiaaki iyie ninche, Olasar le nkima ele linchosho intae Olaitoriani: isitiman oaare le kerra lo lari obo lemeeta entibili, anaake, pee eaku olasar loo nkolong'i pooki.

⁴Ore olkuoo obo nipolososo tadekenya, ore olikae kuo nipolososo teipa;

⁵ore ematua e tomon e efa e ntapa napuyiapui nintayuyu pee eaku olasar le ntapa, naipurjaki te matua e ong'uan e hini e ilata naidong'oki.

⁶Olasar ele opejori anaake apa oitanapishoteki to ldoinyo le Sinai, te nkaraki esong'ouna narropil, olasar le nkima oishori Olaitoriani.

⁷Ore olasar ooki naa erubata nabo e ong'uan e hini to sitima ake obo; teine wueji sinyati shomo tipika ilo asar ooki oirrusha nchoo Olaitoriani.

⁸Ore olikae kuoo shomo topolosa teipa, anaa ilo asar le ntapa le tadekenya o anaa ilo asar ooki, shomo nchooi anaa olasar le nkima, esong'ouna nerropil te nkaraki Olaitoriani.’”

⁹“Ore te nkolong e Sabato, enchooi isitiman oaare le kerra lo lari obo lemeeta entioto o ematua e are e tomon e Efa e ntapa napuyiapui pee eaku olasar le ntapa, eipurjaki te ilata o ilo asar lenye ooki:

¹⁰ele ninye olasar opejori le pooki olong e Sabato, te nebo ilo asar opejori le anaake o ilo asar ooki.

¹¹“Ore too nkiterunot oo lapaitin linyi ninchooyoyo olasar opejori aaisho Olaitoriani: iloing'ok oaare ooti o lmeregesh obo o sitiman oopishana le kerra lo lari obo lemeeta entioto;

¹²o matuan uni e tomon e efa e ntapa napuyiapui pee eaku olasar le ntapa, naipurjaki te ilata, te pooki oing'oni o matuan are e tomon e ntapa napuyiapui naipurja te ilata to lmeregesh obo;

¹³o ematua nabo e tomon e ntapa napuyiapui naipurjaki te ilata anaa olasar le ntapa to lkuoo ake obo le ker; pee eaku olasar opejori le song'ouna narropil; olasar le nkima oishori Olaitoriani.

¹⁴Ore olasar lenye ooki naa keaku olpisiai le hini le naisho oo sabibu to loing'oni ake obo o entemata e uni e hini to lmeregesh, naa entemata e uni e ong'uan e hini to lkuoo le ker; ele ninye olasar opejori te pooki apa too lapaitin pooki lo lari

¹⁵o sitima obo sii le kine te nkaraki olasar le ng'oki oishori Olaitoriani; keitayuni ninye te nebo ilo asar opejori le anaake o ilo asar lenye ooki.

¹⁶“Ore te nkolong e tomon o ong'uan olapa le dukuya naa Pasaka o Laitoriani.

¹⁷Naa ore te nkolong e tomon o imiet ele apa naa enkolong o sirua; nkolong'i naapishana einosi imukateni neitu eisuishieki.

¹⁸Ore te nkolong e dukuya naa keaku eumata sinyati: mias esiaai e sinkaisho,

¹⁹kake enchooi olasar le nkima, olasar opejori te nkaraki Olaitoriani: iloing'ok oaare ooti o lmeregesh obo o sitiman oopishana le kerra lo lari obo; toduaa nchere meeta entioto;

²⁰o lasarri sii lenye le ntapa napuyiapui naipurja te ilata; imatuan uni e efa te tomon nchooi to loing'oni obo o matuan are e tomon to lmeregesh;

²¹nchooi ematua nabo e tomon te pooki meregesh le lelo oopishana;

²²o sitima obo le kine pee eaku olasar le ng'oki pee eitayunyeki olning'o lo sotua te nkaraki iyie.

²³Nchooi iyie kuna te nebo olasar opejori le tadekenya, laa olasar le mpejoroto le anaake.

²⁴Naa teina oitoi ake inchooi anaake, too nkolong'i naapishana, ina daa o lasar opejori te nkima, esong'ouna narropil to Laitoriani; keitarasari ninye te nebo ilo asar le anaake o ilo asar lenye ooki.

²⁵Naa ore te nkolong e naapishana nimbung'ubung'u eumata nasinya; nimiasiasa esiaai nagol.

²⁶“Ore te nkolong oo lng'anayio le dukuya, ti ninchooyo iyie olasar le ntapa te nkaraki entapa ng'ejuk naishori Olaitoriani, te ilo sirua linyi loo wikii, ninturrurrorro aaibung eumata sinyati; nimiasiasa esiaai nagol,

²⁷kake entarasai olasar opejori, esong'ouna narropil to Laitoriani: iloing'ok oaare ooti o lmeregesh obo, isitiman oopishana le kerra lo lari obo;

²⁸o lasar le ntapa napuyiapui, naipurja te ilata o matuan uni e tomon e efa to loing'oni ake obo o matuan are e tomon e efa to lmeregesh,

²⁹o ematua nabo e tomon te pooki ake ninye sitima le ker le lelo oopishana;

³⁰te nebo o sitima obo le kine, pee eitobir osotua lo lning'o te nkaraki intae.

³¹Ore te nebo ilo asar opejori le anaake o lasar lenye le ntapa, ntarasai iyie ninche te nebo o ilo asar lenye ooki. Toduaa nchere meeta ninche entioto.