Read MAASAI REVISED PROTESTANT Enkikena 32 Bible Online

Enkikena 32 - MAASAI REVISED PROTESTANT bible

Enkikena 32

¹Ore apa ilayiok le Ruben o layiok le Gad na keeta inkishu kumok oleng, nedol ninche enkop e Yaser o enkop e Gilead aajo kenyor apa ine wueji inkishu.

²Neaku eetuo apa lelo ayiok le Gad o lelo ayiok le Ruben aajoki Musa o Eliesa ilo apolosani o lelo arikok le umata,

³“Atorat o Dibon o Yaser o Nimra o Heshbon o Eliele o Sebam o Nebo o Beon,

⁴ore ena kop natara Olaitoriani te dukuya eumata e Israel, naa enkop nanyor inkishu, neeta isinkan linono inkishu.”

⁵Nejo ninche, “Tenaa eikinoto iyiook omon too nkonyek inono, nchoo naa isinkan linono meishori ena kop meitaa enenye; mintalang iyiook olkeju le Yordan.”

⁶Kake etiaaka Musa lelo ayiok le Gad o lelo ayiok le Ruben, “Kepuo ilalashera linyi enjore itonini intae tene?

⁷Kainyoo pee igiligili iltauja loo ltung'ana le Israel, aamitiki elang aapuo ina kop apa naishoo Olaitoriani ninche?

⁸Ina apa etaasa loo papaai linyi ina kata pee airriwaa nanu ninche te Kadesh-Barnea meshomo aadol ina kop.

⁹Amu ore apa pee epuo ninche oerata le Eshkol nepuo aadol ina kop, negil ninche iltauja loo ltung'ana le Israel aamitiki epuo ina kop apa naishoo Olaitoriani ninche.

¹⁰Neyupuyup apa engoro o Laitoriani teina olong, nenya ninye olmumai ejo,

¹¹‘Esipa meetae hoo obo le lelo tung'ana apa ooileputua aapuonu te Misiri, ebaiki ilarin tikitam neilep olo adol ina kop apa nainosie olmumai pee aisho Abraham o Isaak o Yakobo te nkaraki neitu ninche aaunokino aasuj nanu;

¹²meteleku ake Kaleb olayioni le Yefune ilo loo Lkenise o Yoshua olayioni le Nuni amu etusuja ninche Olaitoriani katukul.’

¹³Neyupuyup engoro o Laitoriani tialo Siraeli, neisho ninche metilimanata ti ong'ata ilarin artam o metaba anaa neishunye ina ishoi apa pooki nataasa entorroni te dukuya Olaitoriani.

¹⁴Naa ng'ura, itubulua ajing erishata oo loo minyi, entipat oo ltung'ana aing'okok, pee iponaa oleng ina goro o Laitoriani napi tialo Siraeli!

¹⁵Amu ti nimbelekenyanya aany isujusuju Olaitoriani, naa keigil ninye apalaa intae ti ong'ata, neidaikie intae kulo tung'ana pooki.”

¹⁶Neitoki ninche aanyikaki ninye nejoki, “Eikishetu iyiook imuatat tene te nkaraki nkerrai ang o nkanas te nkaraki inkera ang,

¹⁷kake eikidumu iyiook iruparen, nikinapa aapuo dukuya iltung'ana le Israel o metaba anaa nikintabau ninche ewueji enye; ore inkera ang kutiti netoni too nkanas naasheta sunta te nkaraki lelo oomanya ina kop.

¹⁸Mikirrinyunye iyiook aapuonu nkang'itie ang o metaba anaa nejung oltung'ani ake pooki le Israel enjung'ore enye.

¹⁹Amu mikijung iyiook te nebo ninche lido kekun le Yordan neito idia alo; amu ore enjung'ore ang neeuo ena shoto e Yordan neito enkalo oloosaen.”

²⁰Neaku etiaaka apa Musa ninche, “Ti niasiasa intae ena, tenaa eidumumu intae iruparen aapuo enjore te dukuya Olaitoriani,

²¹ore ake pooki tung'ani linyi oata ruparen nelang olkeju le Yordan alo te dukuya Olaitoriani o metaba anaa nearaa ilmang'ati lenyena aiwuang'ie te dukuya ninye,

²²neisulieki ina kop te dukuya Olaitoriani; ore naa te siadi ina nindimidimi aatorrinyoto, nimintokiki aatakinore to Laitoriani o te Israel; ore ena kop naa keaku eninyi te dukuya Olaitoriani.

²³Kake ti nimiasiasa ina, nitaasa naa eng'oki to Laitoriani; naa entayiolo nchere meeta nchere, esipa meinepu intae ina ng'oki inyi.

²⁴Enteshetu inkanas te nkaraki inkera inyi kutiti, o muatat te nkaraki nkerrai inyi; niasiasa ina nisiligishore.”

²⁵Ore ilayiok le Gad o lelo ayiok le Ruben nejoki Musa, “Keas isinkan linono anaa enaitanapisho olkitok lai.

²⁶Ore inkera ang kutiti o nkituaak ang o ntare ang o nkishu ang pooki, kebik te idie too nkanas e Gilead;

²⁷kake kegiroo isinkan linono aapuo, pooki tung'ani ake otanape alo enjore, nelo enjore te dukuya Olaitoriani, anaa enaitanapisho olkitok lai.”

²⁸Neisho Musa enkitanapata naipirta ninche Eliesa ilo apolosani, o Yoshua olayioni le Nuni, o lukuny oo nkajijik oo loo menye oo loshon loo ltung'ana le Israel.

²⁹Nejoki Musa ninche, “Te nelang ile Gad o ile Ruben, pooki ng'ae otanape alo enjore te dukuya o Laitoriani, nelang te nebo intae olkeju le Yordan neisulieki ina kop te dukuya intae, ninchosho taa ninche enkop e Gilead metaa enenye;

³⁰kake te nemelang ninche te nebo intae; etanapate, nepuo naa aatum enkop te nebo intae te nkop e Kanaan.”

³¹Newal lelo le Gad o lelo le Ruben aajo, “Ore anaa enatiaka Olaitoriani isinkan linono, ina kipuo aas.

³²Eikilang iyiook olkeju le Yordan kitanapate te dukuya Olaitoriani aapuo enkop e Kanaan, ore ina jung'ore ang niking'uaa te lido kekun le Yordan.”

³³Neisho Musa ninche, lelo le Gad o lelo ayiok le Ruben o lpisiai lo losho le Manase, olayioni le Yosef, enkitoria e Sihon olaiguanani le Amori, o enkitoria e Oog olaiguanani le Bashan, ina kop o nkanas enyena te nebo ilpolosien lenye, inkanas e ina kop tiatua enkop pooki.

³⁴Neshet lelo le Gad Dibon o Atorat o Aroen

³⁵o Atrot-shofan o Yaser o Yogebeha,

³⁶Bet-nimra o Bet-haran, inkanas naasheta sunta o muatat oo nkerrai.

³⁷Ore ile Ruben neshet Heshbon o Eleale o Kiriataim,

³⁸o Nebo o Baal-meon (eibelekenyaki inkarn enye) o Sibma, neisho ninche kulie arn nena anas naatesheta ninche.

³⁹Ore ilayiok le Makir o layiok le Manase nepuo Gilead neya aaitaa enenye.

⁴⁰Neisho Musa Makir olayioni le Manase Gilead, nemany ninye ine.

⁴¹Ore Yair olayioni le Manase nelo aya inkang'itie enye neisho ninche enkarna ajo Hafot-yair.

⁴²Nelo Noba aya Kenat o nkang'itie enye neisho ninye enkarna ajo Noba, aipotie kewan.