Read MAASAI REVISED PROTESTANT Enkikena 6 Bible Online

Enkikena 6 - MAASAI REVISED PROTESTANT bible

Enkikena 6

¹Neitoki Olaitoriani ajoki Musa,

²“Tiaaki iltung'ana le Israel, te nelo nenya oltung'ani olmumai, olee aashu enkitok, te dukuya Olaitoriani, pee eaku sinyati to Laitoriani, neiteng'elaki kewan o Laitoriani,

³inchoo eiteng'el kewan te naisho oo sabibu o te naisho napi, meok ninye ae toki naironyuaki too sabibu aashu enaisho napi; nemenya isabibu ooshal aashu ilootoito.

⁴Ore te nena olong'i pooki e nkiteng'elata enye nemenya ninye ae toki naitobiruaki too sabibu o metabaiki ninye ilanterera lenyena aashu inkabobok enyena.

⁵“Ore inkolong'i pooki e ilo mumai lenye le nkiteng'elata meiseyie olmurunya endukuya enye; o metaba anaa neishunye ina kata apa naiteng'elaka ninye kewan Olaitoriani. Keaku ninye sinyati; keisho ninye iyenat oo lpapit lenyena metoodorito.

⁶“Ore te nena olong'i pooki naaiteng'elaki ninye kewan Olaitoriani nemenyikaki olmeneng'ani[2].

⁷Aa olayioni le menye aashu olayioni le ng'otonye, aashu olo lalashe aashu enkanashe, te neye ninche. Kepik ninye kewan eleyiata; te nkaraki natii enkiteng'elata naiteng'elaka kewan Enkai shumata endukuya enye.

⁸Ore too nkolong'i pooki naaiteng'elaka ninye kewan Olaitoriani naa kesinya ninye to Laitoriani.

⁹“Naa te neye oltung'ani nabo kata etashare ninye, nepik eleyiata ina dukuya enye naiteng'elakaki Olaitoriani, nelo ninye abarn endukuya enye te nkolong e nkitukuo; te nkolong e naapishana elo ninye abarn.

¹⁰Ore te nkolong e isiet, neyau ninye nturkuluoni are aashu imotonyi are kutiti ayaki olapolosani te kutuk aji e ilo ng'obor le ntumo,

¹¹nepolos olapolosani nabo te nkaraki olasar loo ng'ok, nepolos enkae te nkaraki olasar opejori, neitobir olning'o lo sotua te nkaraki ninye, te nkaraki nataasa ninye eng'oki aiseyie ilo meneng'ani. Neitisiny ninye endukuya enye ina olong ake,

¹²neiteng'elaki kewan Olaitoriani too nkolong'i enyena e nkiteng'elata, neyau olkuoo le ker sitima lo lari obo te nkaraki olasar le nkitarruoroto; kake ore enaduoo kata e dukuya neaku pesho, amu ore enkiteng'elata enye neidurukieki.

¹³“Naa ena enkitanapata e ilo lo lmumai, te nelulung'ayu enkata enye e nkiteng'elata: neyauni ninye kutuk aji e ilo ng'obor le ntumo.

¹⁴Neitarasaki ninye enkishooroto enye Olaitoriani, olkuoo obo le ker sitima lemeeta entioto te nkaraki olasar opejori o esupen nabo e ker o lari obo nemeeta entioto naaku olasar loo ng'ok, o lmeregesh obo lemeeta entioto oaku olasar le seriani

¹⁵o lbene loo mukateni neitu eisuishieki o mukateni e ntapa napuyiapui naaipurjaki te ilata o mukateni naapejo naaelieki eilata o lasar lenye le ntapa o lasar lenye ooki.

¹⁶Neitarasaa olapolosani ninche te dukuya Olaitoriani, neitayu olasar lenye le ng'oki o lasar lenye opejori.

¹⁷Neitayu ninye olmeregesh metaa olasar le seriani to Laitoriani, tenebo o lbene loo mukateni neitu eisuishieki, neyau sii olapolosani olasar le ntapa o lasar ooki.

¹⁸Ore ilo lo lmumai nebarn ina dukuya enye naitisinyaki te kutuk aji e ilo ng'obor le ntumo, neya ninye lelo papit le ndukuya enye naitisinyaki nelo apik enkima ti abori ilo asar le seriani.

¹⁹Neitayu olapolosani orony le ilo meregesh eidipaki aaitokitokie, neitayu emukate nabo neitu eisuishieki tiatua o lbene o emukate nabo napejo neitu eisuishieki nepik ninche aiteleiki inkaik e ilo lo lmumai. Ore ake pee eidip ninye atabarna ilpapit le nkitisinyata enye,

²⁰neyuk olapolosani ninche metaa olasar oyuki te dukuya Olaitoriani, neaku kuna daiki erubata nasinya to lapolosani te nebo oloikulu oyuki o ina muro naishoruaki; ore te siadi ina neidim ilo lo lmumai atooko enaisho oo sabibu.

²¹“Ena ninye enkitanapata eilo onya olmumai. Ore olasar lenye oishori Olaitoriani neitorisiokini olmumai lenye anaa olonya olmumai te nebo pooki toki ake ninye naba anaa enaata ninye te risioroto e ilo mumai onya ninye, neiko ninye neijia te risioroto e nkitanapata e nkiteng'elata enye olmumai eitisinyaki kewan Olaitoriani.”

²²Nejoki Olaitoriani Musa, “Tiaaki Aron o layiok lenyena,

²³Inji enkuna ti nimayianana iltung'ana le Israel entejo,

²⁴Mikitamayiana Olaitoriani nikigolie:

²⁵Mikintawang'aki Olaitoriani enkomom enye, niking'urrie:

²⁶Miking'urrie Olaitoriani, nikincho eseriani.

²⁷“Naa inchoo ninche metipika enkarna ai shumata lelo tung'ana le Israel pee amayian nanu ninche.”