Read MAASAI REVISED PROTESTANT Enkikena 7 Bible Online

Enkikena 7 - MAASAI REVISED PROTESTANT bible

Enkikena 7

¹Ore apa teina olong pee eidip Musa atuuno olng'obor le Nkai, nebukoki eilata neitisiny ninye te nebo imasaa enyena, nebukoki eilata neitisiny olperere lo lasar, te nebo imasaa pooki.

²Ore ilarikok le Israel, ilukuny oo nkajijik oo loo menye ilarikok loo loshon otii shumata lelo apa ooikenaki,

³neyau inkishoorot enye dukuya Olaitoriani, ingarrin ile naaimulumula o lmong'i tomon o aare, ore ake engarri netii ilarikok oaare, ore ake olarikoni neeta olkiteng, nepolos ninche te dukuya ilo ng'obor le Nkai.

⁴Neitoki Olaitoriani ajoki Musa,

⁵“Tang'amai kuna kishoorot naaing'uaa ninche pee etumi aataasishore ninche te nkisiaayiare e ilo ng'obor le ntumo, nincho ninche lelo le Lawi, oltung'ani ake te risioroto e nkisiayiare enye.”

⁶Neaku etang'amayie apa Musa nena garrin o lelo mong'i neisho ninye ile Lawi.

⁷Ore ingarrin are o lmong'i oong'uan neisho ilayiok le Gershon te risioroto e nkisiaayiare enye.

⁸Ore ingarrin ong'uan o lmong'i isiet neisho ilayiok le Merari, te risioroto e nkisiayiare enye erikoo Ltamar olayioni le Aron ilo apolosani.

⁹Kake ore too layiok le Kohat neitu eishori ninche toki, te nkaraki naitanapaki apa ninche meing'ura nena tokitin naasinya naanapi too iloilila[3].

¹⁰Ore ilarikok neishooyo ilasarri te nkaraki enkitisinyata o lperere lo lasar teina olong apa natubukokoki eilata aaitisiny, neishooyo lelo arikok ilasarri lenye te dukuya olperere lo lasar.

¹¹Nejoki Olaitoriani Musa, “Keishori ninche ilasarri lenye, olarikoni ake te nkolong enye, te nkaraki enkitisinyata o lperere lo lasar.”

¹²Ore apa ilo otang'asa aitayu olasar lenye te nkolong e dukuya naa Nashon olayioni le Aminadab, lo losho le Yuda;

¹³ore olasar lenye naa esaani e nkosholai naa shekeli iip nabo o tomoni uni enkiroishi enye o embakuli nabo e nkosholai e shekeli ntomoni naapishana te risioroto e shekeli e nkaji e Nkai, ebore pokira are entapa napuyiapui naipurjaki te ilata aaitaa olasar le ntapa;

¹⁴o enkijiko nabo e saabu e shekeli tomon nabore enkorropil

¹⁵o loing'oni obo oti o lmeregesh obo o lkuo obo le ker sitima lo lari obo te nkaraki olasar opejori;

¹⁶o lkine obo oaku olasar loo ng'ok.

¹⁷Naa ore to lasar loo nkishoorot le seriani, naa ilmong'i oaare o lmeregeshi imiet o lkineji imiet o lkerra imiet lo lari obo. Ele apa olasar le Nashon olayioni le Aminadab.

¹⁸Ore te nkolong e are neitayu Natanel olayioni le Suar, ilo arikoni le Isaakar olasar;

¹⁹neitayu ninye to lasar lenye esaani nabo e nkosholai naa ore enkiroishi enye naa shekeli iip o tomoni uni o embakuli nabo e nkosholai e shekeli ntomoni naapishana, te risioroto e shekeli e nkaji e Nkai, nebore pokira entapa napuyiapui naipurja te ilata pee eaku olasar le ntapa.

²⁰O enkijiko nabo e saabu e shekeli nabore enkorropil;

²¹o loing'oni obo oti o lmeregesh obo o lker obo lo lari obo oaku olasar opejori;

²²o lkine obo oaku olasar loo ng'ok.

²³Ore to lasar le seriani naa ilmong'i oaare o lmeregeshi imiet o lkineji imiet o sitiman le kerra imiet lo lari obo. Ele ninye olasar le Natanel olayioni le Suar.

²⁴Ore te nkolong e uni naa Eliabu olayioni le Helon, ilo arikoni loo ltung'ana le Sebulon oyaua olasar lenye:

²⁵ore olasar lenye naa esaani nabo e nkosholai, naa ore enkiroishi enye naa shekeli iip nabo o tomoni uni, o embakuli nabo e nkosholai e shekeli intomoni naapishana, te risioroto e shekeli e nkaji e Nkai nebore pokira are entapa napuyiapui naipurjaki te ilata metaa olasar le ntapa;

²⁶o enkijiko nabo e saabu e shekeli tomon nabore enkorropil;

²⁷o loing'oni obo oti o lmeregesh obo o sitima le ker lo lari obo, oaku olasar opejori

²⁸o sitima obo le kine oaku olasar le ng'oki,

²⁹naa ore to lasar le seriani naa ilmong'i o aare o lmeregeshi imiet, isitiman imiet le kineji o sitiman imiet le kerra lo lari obo. Ele apa ninye olasar le Eliab olayioni le Helon.

³⁰Ore te nkolong e ong'uan naa Elisuri olayioni le Shedeur, olarikoni loo ltung'ana le Ruben.

³¹Ore olasar lenye naa esaani nabo e nkosholai naa ore enkiroishi enye naa shekeli iip nabo o tomoni uni o embakuli nabo e nkosholai e shekeli intomoni naapishana, te risioroto e shekeli e nkaji e Nkai nebore pokira entapa napuyiapui naipurjaki te ilata pee eaku olasar le ntapa;

³²o enkijiko e saabu naata enkiroishi e shekeli tomon, nabore nkorropil;

³³o loti oing'oni obo o lmeregesh obo o sitima le ker lo lari obo oaku olasar opejori;

³⁴o sitima obo le kine oaku olasar le ng'oki;

³⁵ore to lasar le seriani, naa ilmong'i oaare o lmeregeshi imiet o sitiman imiet le kineji o sitiman imiet le kerra lo lari obo. Ele ninye olasar le Elisuri olayioni le Shedeur.

³⁶Ore te nkolong e imiet naa Shelumiel olayioni le Surishadai, olarikoni loo ltung'ana le Simeon oyaua olasar lenye:

³⁷ore olasar lenye naa esaani nabo e nkosholai, naa ore enkiroishi enye naa shekeli iip nabo o tomoni uni, o embakuli nabo e nkosholai e shekeli ntomoni naapishana, te risioroto e shekeli e nkaji e Nkai, nebore pokira are entapa napuyiapui naipurjaki te ilata pee eaku olasar le ntapa;

³⁸o embakuli nabo e saabu naa ore enkiroishi enye naa shekeli tomon, nabore enkorropil,

³⁹o loti oing'oni obo o lmeregesh obo o sitima obo le ker lo lari obo te nkaraki olasar opejori;

⁴⁰o sitima obo le kine te nkaraki olasar le ng'oki;

⁴¹ore to lasar le seriani naa ilmong'i oaare o lmeregeshi imiet o sitiman le kineji imiet o sitiman imiet le kerra lo lari obo. Ele apa ninye olasar le Shelumiel olayioni le Surishadai.

⁴²Ore te nkolong e ile naa Eliasaf olayioni le Deuel olarikoni loo ltung'ana le Gad:

⁴³ore olasar lenye naa esaani nabo e nkosholai, ore enkiroishi enye naa shekeli iip nabo o tomoni uni, o embakuli nabo e nkosholai e shekeli intomoni naapishana, te risioroto e shekeli e nkaji e Nkai, nebore pokira entapa napuyiapui naipurjaki te ilata pee eaku olasar le ntapa;

⁴⁴o embakuli nabo e saabu naata enkiroishi e shekeli tomon nabore enkorropil;

⁴⁵o loti oing'oni obo o lmeregesh obo o sitima obo le ker lo lari obo oaku olasar opejori;

⁴⁶o sitima obo le kine oaku olasar le ng'oki;

⁴⁷ore olasar le seriani naa ilmong'i oaare o lmeregeshi imiet o sitiman imiet le kineji o sitiman imiet le kerra lo lari obo. Ele apa ninye olasar le Eliasaf olayioni le Deuel.

⁴⁸Ore te nkolong e naapishana naa Elishama olayioni le Amihud ninye olarikoni loo ltung'ana le Efraim:

⁴⁹ore olasar lenye naa esaani nabo e nkosholai naa ore enkiroishi enye naa shekeli iip nabo o tomoni uni o embakuli nabo e nkosholai naata enkiroishi e shekeli intomoni naapishana, te risioroto e shekeli e nkaji e Nkai, nebore pokira are entapa napuyiapui naipurjaki te ilata pee eaku olasar le ntapa;

⁵⁰o embakuli nabo e saabu e shekeli tomon nabore enkorropil;

⁵¹o loti oing'oni obo o lmeregesh obo o sitima obo le ker lo lari obo oaku olasar opejori;

⁵²o sitima obo le kine oaku olasar le ng'oki;

⁵³ore olasar le seriani naa ilmong'i oaare, o lmeregeshi imiet o sitiman imiet le kineji o sitiman imiet le kerra lo lari obo. Ele apa ninye olasar le Elishama olayioni le Amihud.

⁵⁴Ore te nkolong e isiet naa Gamaliel olayioni le Pedasur, ninye olarikoni loo ltung'ana le Manase:

⁵⁵ore olasar lenye naa esaani nabo e nkosholai, naa ore enkiroishi enye naa shekeli iip nabo o tomoni uni o embakuli nabo naa ore enkiroishi enye naa shekeli intomoni naapishana, te risioroto e shekeli e nkaji e Nkai, nebore pokira entapa napuyiapui naipurjaki te ilata pee eaku olasar le ntapa;

⁵⁶o enkijiko nabo e saabu naa ore enkiroishi enye naa shekeli tomon, nabore enkorropil;

⁵⁷o loti oing'oni obo o lmeregesh obo o sitima obo le ker lo lari obo, oaku olasar opejori;

⁵⁸o sitima obo le kine oaku olasar le ng'oki;

⁵⁹ore olasar le seriani naa, ilmong'i oaare o lmeregeshi imiet o sitiman imiet le kineji o sitiman imiet le kerra lo lari obo. Ele apa ninye olasar le Gamaliel olayioni le Pedasur.

⁶⁰Ore te nkolong e naaudo naa Abidan olayioni le Gideon olarikoni loo ltung'ana le Benchamen oyaua olasar lenye:

⁶¹ore olasar lenye naa esaani e nkosholai naa ore enkiroishi enye naa shekeli intomoni naapishana, te risioroto e shekeli e nkaji e Nkai, nebore pokira entapa napuyiapui naipurjaki te ilata pee eaku olasar le ntapa;

⁶²o enkijiko nabo e saabu naa ore enkiroishi enye naa shekeli tomon nabore enkorropil;

⁶³o loti oing'oni obo o lmeregesh obo o sitima obo le ker lo lari obo, oaku olasar opejori;

⁶⁴o sitima obo le kine oaku olasar le ng'oki;

⁶⁵ore olasar le seriani naa ilmong'i oaare o lmeregeshi imiet o sitiman imiet le kineji o sitiman imiet le kerra lo lari obo. Ele apa ninye olasar le Abidan olayioni le Gideon.

⁶⁶Ore te nkolong e tomon naa Ahieser olayioni le Amishadai ninye olarikoni loo ltung'ana le Dan:

⁶⁷ore olasar lenye, naa esaani nabo e nkosholai, naa ore enkiroishi enye naa shekeli iip o tomoni uni o embakuli e nkosholai e shekeli ntomoni naapishana, te risioroto e shekeli e nkaji e Nkai, nebore pokira entapa napuyiapui naipurja te ilata pee eaku olasar le ntapa;

⁶⁸o embakuli nabo e saabu naa ore enkiroishi enye naa e shekeli tomon nabore enkorropil,

⁶⁹o loti oing'oni obo o lmeregesh obo o sitima obo le ker lo lari obo, oaku olasar opejori,

⁷⁰o sitima obo le kine oaku olasar loo ng'ok,

⁷¹ore olasar le seriani naa ilmong'i oaare, o lmeregeshi imiet, o sitiman imiet lkineji sitiman imiet le kerra lo lari obo. Ele apa ninye olasar le Ahieser olayioni le Amishadai.

⁷²Ore te nkolong e tomon oobo naa Pagiel olayioni le Okran, ninye olarikoni loo ltung'ana le Asheri oyaua olasar lenye:

⁷³ore olasar lenye naa esaani nabo e nkosholai, naa ore enkiroishi enye naa shekeli intomoni naapishana te risioroto e shekeli e nkaji e Nkai, nebore pokira are entapa napuyiapui naipurjaki te ilata pee eaku olasar le ntapa;

⁷⁴o enkijiko nabo e saabu e shekeli tomon nabore enkorropil;

⁷⁵o loti oing'oni obo o lmeregesh obo o sitima obo le ker lo lari obo, oaku olasar opejori;

⁷⁶o sitima obo le kine oaku olasar le ng'oki;

⁷⁷ore olasar le seriani naa ilmong'i o aare o lmeregeshi imiet o sitiman imiet le kineji o sitiman imiet le kerra lo lari obo. Ele apa ninye olasar le Pagiel olayioni le Okran.

⁷⁸Ore te nkolong e tomon o are naa Ahira olayioni le Enan, ninye olarikoni loo ltung'ana le Naftali:

⁷⁹ore olasar lenye naa esaani nabo e nkosholai, naa ore enkiroishi enye naa shekeli iip o tomoni uni o embakuli nabo e nkosholai naa ore enkiroishi enye naa shekeli intomoni naapishana, te risioroto e shekeli e nkaji e Nkai, nebore pokira are entapa napuyiapui naipurja te ilata pee eaku olasar le ntapa;

⁸⁰o enkijiko nabo e saabu e shekeli tomon nabore enkorropil;

⁸¹o loti oing'oni obo o lmeregesh obo o sitima obo le ker lo lari obo oaku olasar opejori

⁸²o sitima obo le kine oaku olasar loo ng'ok;

⁸³ore olasar le seriani naa, ilmong'i, o aare o lmeregeshi imiet o sitiman imiet le kineji o sitiman imiet le kerra lo lari obo. Ele apa ninye olasar le Ahira olayioni le Enan.

⁸⁴Ele apa olasar le nkitisinyata te nkaraki olperere lo lasar, teina olong apa natubukokoki eilata aaitisiny, oing'uaa ilarikok le Israel: isaanini tomon o aare e nkosholai o mbakulini tomon o are e nkosholai o nkijikoni tomon o are e saabu,

⁸⁵ore ake esaani e nkosholai nabo te ninche naa ore enkiroishi enye naashekeli intomoni naapishana, ore enkosholai pooki e kuna masaa naa shekeli inkalifuni are o iip ong'uan te risioroto e shekeli e nkaji e Nkai,

⁸⁶ore nena kijikoni tomon o aare e saabu naabore enkorropil, eeta ake nabo enkiroishi e shekeli tomon, te risioroto e shekeli e nkaji e Nkai, ore saabu pooki e nena kijikoni naa ore enkiroishi enye naa shekeli iip o tikitam.

⁸⁷Ore inkishu pooki o lasar opejori naa iloing'ok tomon o are o lmeregeshi tomon oaare o sitiman tomon o are le kerra lo lari obo te nebo olasar lenye le ntapa; o sitiman tomon o aare le kineji lo lasar le ng'oki.

⁸⁸Ore inkishu pooki o lasar le seriani naa iloing'ok tikitam oo ng'uan o lmeregeshi intomoni ile o sitiman le kineji intomoni ile, ore isitiman le kerra lo lari obo naa intomoni ile. Ele apa ninye olasar le nkitisinyata lo lperere lo lasar eidipaki aatubukoki eilata aaitisinya.

⁸⁹Ore apa pee elo Musa atua ilo ng'obor le ntumo airorie Olaitoriani, nening ninye oltoilo eirorie ninye eing'uaa shumata ilo orika lo lng'ur apa otii shumata osanduku le shakenisho, eimu erishata e lelo kerubi pokira o aare; neirorie ninye.