Read MAASAI REVISED PROTESTANT Enkikena 9 Bible Online

Enkikena 9 - MAASAI REVISED PROTESTANT bible

Enkikena 9

¹Neirorie Olaitoriani Musa tiong'ata e Sinai, to lapa le dukuya lo lari liaare eidipa aatupuku te nkop e Misiri, nejoki,

²“Inchoo iltung'ana le Israel eibung Pasaka te rishata enye nategeluaki.

³Ore te nkolong e tomon oong'uan ele apa, teipa, nimbung'ubung'u te nkata enye nategeluaki te risioroto oo nkikoot pooki, o nkiguanat pooki ipuopuo intae aaibung.”

⁴Neaku etiaaka Musa iltung'ana le Israel pee eibung Pasaka.

⁵Neibung ninche Pasaka to lapa le dukuya, te nkolong e tomon oong'uan o lapa, teipa, tiongota e Sinai; te risioroto e nena pooki naaitanapa Olaitoriani Musa, neas iltung'ana le Israel ina.

⁶Netii apa ilkuti tung'ana lemesinya ooiseyie osesen lo ltung'ani otua, neaku meidim ninche aaibung'a Pasaka teina olong; nepuonu ninche dukuya Musa o Aron teina olong.

⁷Nejoki lelo tung'ana ninche, “Kira iyiook ilooiduruk amu kiseyie osesen lo ltung'ani otua; kainyoo pee etekepayioki iyiook eitu kinchooyo olasar lo Laitoriani te nkata nategeluaki tiatua iltung'ana le Israel?”

⁸Nejoki Musa ninche, “Entasho, pee atum atoning'o enaitanapisho Olaitoriani tialo intae.”

⁹Nejoki Olaitoriani Musa,

¹⁰Tiaaki iltung'ana le Israel, “Teneiduruk ake ninye oltung'ani tiatua intae aashu olayioni le ishoi inyi, eiseyie oltung'ani otua aashu elakua te lototo enye apa nashomo, naa keibung ake Pasaka o Laitoriani.

¹¹Ore to lapa liare, te nkolong e tomon oong'uan naa keibung ninche ilo sirua, nenya ninche tenebo imukateni neitu eisuishieki o lkeek oodua.

¹²Nemeleku ninche toki o mekenyu, nemegil oloito lenye; te risioroto oo nkikoot pooki e Pasaka eibung ninche.

¹³Kake ore ilo tung'ani oiduruk nemetii elototo, kake nekepari aany eibung Pasaka, ore ilo tung'ani neiwuang'ieki too ltung'ana lenyena amu eitu eishoru olasar lo Laitoriani te rishata enye nageluno; nenap ilo tung'ani eng'oki enye.

¹⁴Naa tenelotu oltung'ani omoni amanyisho tiatua intae, neibung Pasaka to Laitoriani, te risioroto oo nkikoot e Pasaka, metaa ninye ina. Enkikoo nabo intae ipupuo aata, to lomoni o to inoti.”

¹⁵Ore apa ina olong natuunoki olng'obor le Nkai, neimulumul enkatampoi ilo ng'obor le Nkai, ilo ng'obor le shakenisho; ore teipa netii ina atampoi shumata ilo ng'obor nelioo eikununo anaa enkima o mekenyu.

¹⁶Netiu neijia anaake, neimulumul enkatampoi ilo ng'obor dama, neliooyu anaa enkima kewarie.

¹⁷Naa ore ake te neiwuang'ieki ina atampoi te nchumata e ilo ng'obor, ore te siadi ina nedumunye iltung'ana loo Siraeli aaidur; naa ore ake ewueji nedoiki ina atampoi neun iltung'ana loo Siraeli ilng'oborri teine.

¹⁸Naa te nkitanapata o Laitoriani edumunye iltung'ana loo Siraeli aaidur, naa te nkitanapata o Laitoriani sii eun ninche ilng'oborri; ore te nkata naba anaa enabik enkatampoi te nchumata ilo ng'obor le Nkai, nebik ninche too lng'oborri.

¹⁹Ore duoo ninye tenaa nkolong'i kumok ebik enkatampoi te nchumata e ilo ng'obor le Nkai, neibung iltung'ana loo Siraeli enkitanapata o Laitoriani, nemedumunye ninche aaidur.

²⁰Ore apa kulie katitin na nkuti olong'i ake etii ina atampoi shumata ilo ng'obor le Nkai, naa ore te risioroto e nkitanapata o Laitoriani nebik ninche too lng'oborri, ore ake te risioroto e nkitanapata o Laitoriani nedumunye ninche aaidur.

²¹Ore ake sii apa kulie katitin etotona enkatampoi ebaiki teipa o mekenyu; naa ore ake pee edumuni aailepie enkatampoi tadekenya, nedumunye ninche aaidur aashu te netobiko enkolong nabo o enkewarie, ore ake pee eiwuang'ieki ina atampoi nedumunye ninche aaidur.

²²Tenaa inkolong'i are apa aashu olapa, aashu enkata naado, etobiko ina atampoi te nchumata ilo ng'obor le Nkai, neton teine, nebik iltung'ana loo Siraeli too lng'oborri, nemedumunye aaidur

²³kake te eyai aailepie, nedumunye ninche aaidur. Te nkitanapata o Laitoriani eun ninche ilng'oborri, naa te nkitanapata o Laitoriani edumunye ninche aapuo; eibung'a apa ninche enkitanapata o Laitoriani, ina kitanapata o Laitoriani naimua Musa.