Read MAASAI REVISED PROTESTANT Mika 1 Bible Online

Mika 1 - MAASAI REVISED PROTESTANT bible

Mika 1

¹Ororei lo Laitoriani ele oibalakinyeki Mika le Moreshet, too nkolong'i e Yotam o Ahas o Hesekia, lelo aiguanak le Yuda. Etoduaa apa ninye kuna baa naaipirta Samaria o Yerusalem.

²Entoning intae, lo oreren pooki; toning'o na kop o pooki naatii atua, naa nchoo Olaitoriani Enkai eaku olchakeni tialo intae, Olaitoriani oiro teina aji enye Sinyati.

³Amu ng'ura, kelotu Olaitoriani aipang'u teine wueji enye, nedou alotu aituny iwuejitin neeika e nkop.

⁴Neshola ildoinyo tiabori ninye, neaku ierat iwululuni, netiu anaa suut te dukuya enkima, netiu anaa nkariak naatubukokoki enegut.

⁵Ore ena pooki naa te nkaraki enkitapong'oto e Yakobo, o ng'ok e nkaji e Israel. Kainyoo enkitapong'oto e Yakobo? Aime Samaria? Naa kainyoo eng'oki e nkaji e Yuda? Aime Yerusalem?

⁶Ore enkaraki ina kaitaa nanu Samaria osototi te nkop naisiaja, ewueji neunieki isabibu; naa kabukoki nanu isoito lenyena atua oearata, nanuk ilkitamanyunot lenyena.

⁷Ore nena kitanyaanyukot enyena oo nkaitin neidong'i aaitaa mbelibelat, ore nena tokitin e marmalisho nepejori te nkima. Ore nena kitanyaanyukot enyena oo nkaitin neirrag te mijoonisho. Amu too mpisai e mulayoi etasotuo ninye ninche, naa nena pisai e mulayoi errinyokino ninye.

⁸Ore te nkaraki ena kayietu nanu aishir; kalo nanu maishopo nemaata namuka; kaitayu nanu enkishirata anaa mbariak, naishir anaa isidan.

⁹Amu meishiunoyu olbae lenye neewuo Yuda, etabawua kishomi oo ltung'ana laainei, eewuo Yerusalem.

¹⁰Milimu ena te Gat minchir aitasim ore tiatua Betlefara mperiperayu te nterit.

¹¹Eima enkoitoi inyi iloomanya Shafir, te masipaisho o te nkurruna; mepuonu lelo oomanya Saanan emipuonu aaipang'u; Ore enkishirata e Betesel naa kaiwuang'ie te iyie enkitashoto enye.

¹²Amu ore lelo oomanya Marot neanyisho te yieunoto oleng amu etoduaa entorroni eing'uaa Olaitoriani nelotu nchomito e Yerusalem.

¹³Enteen ingarrin oo mbartan iloomanya Lakish; intae apa enkiterunoto oo ng'ok nirikokiki Yerusalem, amu tiatua iyie enotoki inkitarruorrot e Israel.

¹⁴Ore enkaraki ina ilo iyie aisho nkishoorot ole sere Moreshetgat; ore nkajijik e Akisib naa keaku entoki nalejisho, too laiguanak le Israel.

¹⁵Kaigil nanu ayau oloisulie shumata intae, iloomanya Maresha; ore enkitoo oo Siraeli nelotu Adulam.

¹⁶Entabarn ilukuny inyi inchirakiki nena kera ninyorrinyorro; nchoo esipayu ilukuny inyi, anaa ilkurragoso, amu kepuo inkera inyi eyararoto.