Read MAASAI REVISED PROTESTANT Mika 4 Bible Online

Mika 4 - MAASAI REVISED PROTESTANT bible

Mika 4

¹Ore too nkolong'i e siadi, ore ilo doinyo le nkaji o Laitoriani neitasheyieki anaa oldoinyo ooado aisul neilepieki aaitulusoo too ldoinyo nepuo iltung'ana kumok ine.

²Naa kepuonu iloshon kumok nejo: “Wootu mailepa aapuo oldoinyo lo Laitoriani, maape enkaji e Nkai e Yakobo; pee etum ninye aiteng'ena iyiook nkoitoi enyena, nikipuo iyiook too rrekiei lenyena.” Amu Sion epukunye enkitanapata, neing'uaa ororei lo Laitoriani Yerusalem.

³Keiguanare ninye iloreren kumok nedung'oki enkiguana iloshon oogol oo lakua; neidong ninche ilalema lenye aaitaa ntokitin naaturishoreki neitaa iremeta enye ntokitin naasilieki enkurma; nemeitoki olosho adumaki olosho olalem, nemeigil aekata aaitamok ate olarrabal.

⁴Kake kelo ake pooki tung'ani oton tiabori osabibu lenye o tiabori olng'aboli lenye, nemeetae oloiture ninche; amu enkutuk o Laitoriani loo lororani nairoro.

⁵Amu epuoito iltung'ana pooki, oltung'ani ake te nkarna e Nkai enye. Kake eikipuo iyiook te nkarna o Laitoriani Enkai ang ntarasi o ntarasi.

⁶Ore kenya teina olong Olaitoriani ojo, naa kalo nanu aiturrur ilmaiman, naiturrur lelo apa ootarayioki o lelo apa laaisilisilo.

⁷Ore lelo maiman naitaa nanu olpisiai oleku; ore lelo apa ooiturrayioki, naitaa olorere ogol; nelo Olaitoriani aitore ninche to ldoinyo le Sion; ebaiki ena kata o ntarasi.

⁸Naa ore iyie lo talet loo ntare, na doinyo e Yerusalem, iyie kenya epukunye, iyie epukunye enkitoria nalotu, ina kitoria e ntito e Yerusalem.

⁹Kainyoo naa pee inchir abuaku? Aimetii olaiguanani atua iyie keidaa olautaroni lino, eji metaa kitijing'a emion anaa enkitok nasaisai?

¹⁰Temerregelayu ning'or aishir, Yerusalem, anaa enkitok nasaisai; amu ore taata naa ilo aing'uaa ena anasa, nilo abik teinakop naisiaja ilo iyie Babilon. Naa teine kipuoi aakordu, teine kilo Olaitoriani alaku iyie aitung'uaa nkaik oo lmang'ati linono.

¹¹Eiturrurrote taata iloshon kumok, pee kigilunore iyie ejo, “Nchoo ninye eisarkionieki, naa nchoo nkonyek ang eing'or Sion.”

¹²Kake meyiolo ninche ndamunot o Laitoriani, mening'u ninche nkitobirat enyena nchere eiturrurro ninche anaa suut to lkurroto oidong'ishoreki.

¹³Tudumunye ndong'o ninche Yerusalem, amu kaitaa nanu emowuo ino esekenkei, naitaa iloisotok linono osuyai; iar iyie iloreren kumok aitaa mpurdat, ore imasaa enye nintisinyaki Olaitoriani. Ore enkarsisisho enye nintisinyaki Olaitoriani le nkop pooki.