Read MAASAI REVISED PROTESTANT Mika 5 Bible Online

Mika 5 - MAASAI REVISED PROTESTANT bible

Mika 5

¹Eitamanaki intae esuntai, etamanaki iyiook aamuat te ng'udi, etoosho ninche eseder o Laitoriani le Israel.

²Kake ore iyie Betlehem Efrata, iyie ora kiti too lgilat le Yuda, iyie epukunye ilo olotu te nkaraki nanu, ilo olo aaku Olaitoriani loo Siraeli; ilo laa ore enkiterunoto enye naa e niopa, ebaiki nkolong'i e moitie.

³Ore enkaraki ina, kepalaa ninye ninche ometabau ina kata, pee eiu ina nanuta ninye, netum taa ilalashera lenyena pooki aatorrinyokinoto iltung'ana le Israel.

⁴Naa keitashe ninye aitoti nkerra enyena te ngolon o Laitoriani te nkitoo e nkarna o Laitoriani Enkai enye.

⁵Naa kelo ninye ayau eseriani. Pee kitum iyiook aatudumakinoto ninye ilchekuti oopishana, o ltung'ana isiet kituaak loo ltung'ana.

⁶Kepuo ninche aaitore enkop e Asiria to lalem, neitore enkop e Nimrod te nchutati o lalem; naa kepuo ninche aakordu iyiook too le Siria, tenepuonu ninche enkop ang nepuonu aaituny ilpolosien lang.

⁷Netum taa ilo pisiai le Yakobo atijing'a empolos oo ltung'ana kumok, anaa enkoileelio naing'uaa Olaitoriani, anaa enchan nashaiki nkujit nemeanyu iltung'ana anaa nkera e tung'ana.

⁸Naa kelo ilo pisiai le Yakobo aaku tenebo iloshon, nejing empolos oo ltung'ana kumok netiu anaa olng'atuny otii atua ing'uesi e ntim, anaa olkuoo lo lng'atuny o tiatua eluaata oo nkerra, naa teneimaa atua nenang'ie enkop; neitaa ndung'udung'ot, nemeetae olokordu.

⁹Kepuoi aailepie enkaina ino te shumata ilmang'ati linono, ore ilmang'ati linono pooki naa keiwuang'ieki.

¹⁰Ore kenya teina olong Olaitoriani ojo, naa kaiwuang'ie nanu mbartan inyi aitung'uaa intae, naidaikie ngarrin inyi oo mbartan;

¹¹naa kaiwuang'ie nanu nena anas e nkop inyi nauroo lelo sempewueti linyi pooki;

¹²naiwuang'ie nanu esakutore te nkop inyi, niming'iligili aekata aata esakutore.

¹³Naa kaiwuang'ie nanu nkitanyaanyukot inyi, naiwuang'ie ng'apeta inyi te ntae, niming'iligili intae aairrugokino esiaai oo nkaik inyi;

¹⁴naa kadotu nanu Asherim inyi aiwuang'ie tiatua intae naidaikie nkanas inyi.

¹⁵Naa ore te ngoro o te ngoro napi naitalaku elap, te lelo oshon leitu ening'isho.