Read MAASAI REVISED PROTESTANT Mika 7 Bible Online

Mika 7 - MAASAI REVISED PROTESTANT bible

Mika 7

¹Woi nanu, amu atotiwuo anaa enkata naiturrurri ilng'anayio le nkata e nkirowuaj anaa enkata naikesi isabibu, eitu eleku toki naidimi aainosa meetae nkimarrimarrat oo lng'abolo le nkiterata ooshipakino oltau lai.

²Eidaayie oltung'ani le Nkai te nkop, nemeetae oltung'ani supat too ltung'ana eirragita pooki aanyu embukoroto o sarge, nerresh ake pooki tung'ani olalashe to rreshet.

³Kaarriyiak pooki too mbaa e ntorroni,, eikilikuanu olkitok o ladung'oni le nkiguana eropare, ore oltung'ani kitok neimaiki ntorrok naang'uar oltau lenye; nena ninche eas tenebo.

⁴Ore ilo supat aisul te ninche netiu anaa enkaitubului nemeeta tipat, ore ilo lenye oji olasipani netiu anaa olpaashe loo lkiku. Etabawua enkata naitame Enkai iltung'ana anaa enaikoo too larripok lenye. Etataana taata olmilo lenye.

⁵Mipik osiligi lino ole latia, niming'arakino olchore; torripo enkutuk ino teina nikilej etii olgoo lino;

⁶amu keitaas olayioni menye mbaa e sulare, nedumakino entito ng'otonye, nedumakino entito nayamaki enkaputani; ore ilmang'ati lo ltung'ani naa lelo le nkaji enye makewan.

⁷Kake ore nanu, kaing'or Olaitoriani naanyu nanu Enkai e njeunoto ai; kaaning nanu Enkai ai.

⁸Mikishipakino nanu, lo mang'atinta lai; tenabatata nanu naa kadumunye; tenaton nanu te naimin, neaku Olaitoriani ewang'an te nkaraki nanu.

⁹Kang'iri nanu engoro o Laitoriani, amu ataasa nanu eng'oki tialo ninye, ometaba anaa naamitu ninye, naadung'oki ninye nanu enkiguana. Kaayau ninye nanu enetii ewang'an naa kaing'or nanu enkordunoto enye.

¹⁰Nedol taa olmang'atinta lai, neiput enkurruna teina naatiaaka nanu, “Koree Olaitoriani Enkai ino?” Neing'or nkonyek aainei ninye; naa kepuoi aaitunyoki ninye enkop, anaa esarng'ab e nkoitoi.

¹¹Enkolong nashetieki isunta inono! Ore teina olong naa kepuoi aaitalala ilpolosien aaponaa.

¹²Ore teina olong naa kepuonu enitii eing'uaa Asiria o metabaiki Misiri, o ebaiki enaiposha ometabaiki enaiposha, o ebaiki oldoinyo ometabaiki oldoinyo.

¹³Kake keaku enkop mijooni te lelo oo manya, te nkaraki ilng'anayio loo nkiaasin enye.

¹⁴Taramata iltung'ana linono te ng'udi ino, ina luaata e njung'ore ino, oobik maate tiatua entim, te mpolos e nkurma eina kop. Nchoo ninche edaa te Bashan o te Gilead, anaa apa too nkolong'i e apa.

¹⁵Anaa apa too napa olong'i nitupukunye te Misiri, kaitodol nanu ninche mbaa e nking'asia.

¹⁶Kedol iloshon nekurru te nkidimata enye pooki; neibung ninche nkutukie enye too nkaik, neming'anu nkiyiaa enye;

¹⁷nemej ninche enterit anaa olasurai, anaa nkeenta e nkop; nepuonu ninche eikirikira eing'uaa isempewueti lenye; neibelekenyakino ninche to lkirutoto Olaitoriani Enkai ang, neureishoyu ninche te nkaraki iyie.

¹⁸Kaa Ai natiu anaa iyie, apalaki ntorrok, negiroo nkitarruorrot te nkaraki olpisiai le njung'ore enye? Meibung ninye engoro enye ntarasi amu keshipakino ninye enyorrata nauno.

¹⁹Keigil ninye atum olng'ur te nkaraki iyiook, neitunyoo ninye ntorrok ang too nkejek enyena. Inturraa iyie ing'ok ang, anang'aki enguton e naiposha.

²⁰Intodolu iyie esupatisho o enkisiligata te Yakobo, nintodolu enyorrata nauno te Abraham anaa apa eninosa olmumai too loo papa ebaiki nkolong'i e apa moitie.