Read MAASAI REVISED PROTESTANT Nahum 1 Bible Online

Nahum 1 - MAASAI REVISED PROTESTANT bible

Nahum 1

¹Olkilikuai ele oipirta Ninawi. Embuku ena oo nduaat e Nahum le Elkosh.

²Ore Olaitoriani naa Enkai o lom neitalaku elap, eitalaku Olaitoriani elap neeta engoro napi, eitalaku Olaitoriani elap too lmang'ati lenyena, negorokino ilmang'ati lenyena.

³Mesioki Olaitoriani agoro neeta enkidimata kitok, nemeeta kata nemeitalaku Olaitoriani entorroni. Ore enkoitoi enye naa olkutati o siwuo, ore nkatampo naa enterit oo nkejek enyena.

⁴Eisikong ninye enaiposha neitoi, eitoi ninye ilkejek pooki neitoi Bashan o Karmel, ore ina kishiaa e sikar e Lebanon netoyu.

⁵Eikirikira ildoinyo te dukuya ninye, neshola ndoinyo; neirrag enkop eitomijoonoki te dukuya ninye, o enkop o pooki namanya atua ninye.

⁶Kaing'ae oidim aitasho te dukuya engoro enye? Kaing'ae oidim ating'iriakiyu enkirowuaj e ngoro enye? Etubukuoki engoro enye napi anaa enkima, netebelaki ndapidapo aaidapash te dukuya ninye.

⁷Aisupat Olaitoriani osempewuet ninye te nkolong e nyamali; eyiolo ninye lelo oosaru ninye.

⁸Kake to loirrag le nkare nadooyo eishie ninye tukul ilmang'ati lenyena, nemir ilmang'ati lenyena amiraki enaimin.

⁹Kainyoo iyie irreshie Olaitoriani? Eikindaikie ninye iyie, meetae hoo obo ogilunore ninye katitin are.

¹⁰Kemuti ninche anaa orrarrati loo lkiku, anaa olkujita otoyio.

¹¹Keitu elotu obo oing'uaa atua iyie Ninawi, oitobira entorroni tialo Olaitoriani, neitobir ilosekin loo ntorrok?

¹²Nji ejo Olaitoriani, “Ore hoo negol ninche naa kumok keiwuang'ieki ninche neitarasari. Ore hoo naaisilisilo nanu iyie maaigil nanu aisilisil iyie.

¹³Kagil taata nanu enchata enye oo murto aiwuang'ie te iyie nadung inkeenta nikiteenieki iyie aidapash.”

¹⁴Eishorua Olaitoriani enkitanapata nikimpirta iyie: “Meigili aekata aadumu enkarna ino; kaiwuang'ie nanu te nkaji oo nkaitin inono, enkitanyaanyukoto e nkai naguetuno o ina nasholuno. Kaitobir nanu enkurare ino amu ira iyie arruoni.”

¹⁵Ng'ura roruat enyena too ldoinyo, eilo oyau ilomon supati, ilo olimu eseriani! Imbung'a isiruai linono iyie, Yuda, intabai ilmuma linono, amu mikingil aekata olarruoni agilunore iyie, eiwuang'ieki ninye tukul.