Read MAASAI REVISED PROTESTANT Habakuk 2 Bible Online

Habakuk 2 - MAASAI REVISED PROTESTANT bible

Habakuk 2

¹Kaitashe nanu te rishata ai arripisho. Naton nanu to ltalet orripishoreki naing'orisho nanu, pee adol ina naajoki ninye, o ina nawalu nanu tialo enking'unyung'uny ai.

²Naawaliki nanu Olaitoriani ejo, “Ngero ena duaata; ngero mbalie too soito dapashi, pee etum oltung'ani aisuma elakua.

³Amu eton ake eanyu enduaata enkata enye; kesieku ninye alotu erishata enye - nemelejisho ninye. Tenelioo ninye aa yietut, taanyu ninye, esipa kelotu ninye nemeimutie.

⁴Ng'ura ajo ore ilo leme sidai oltau lenye, nemetum puaan, kake ore ilo asipani neishu te nkirukoto nairuk Enkai.”

⁵Ore ake sii enkalejani enaisho; mebikoo ilo tung'ani oitokoos nelala olorok lenye eba anaa enemeneng'a; etiu anaa keeya meraposho aekata. Eiturrurroki ninye kewan iloshon pooki neiturrur iloreren pooki anaa iltung'ana lenyena makewan.

⁶Aimeibelekenyakino kulo pooki ninye, neitalaku elap, nesukeny ninye ejo, “Woi ninye ilo osot ntokitin neme nenyena - ae te nkata nabaa ilo asotoki kewan elaakinoto oo silen?”

⁷Aimedumunye lelo lintalak isilen nabo kata, ore lelo oodumunye nikinkirikirie iyie? Nilo iyie aaku oloyaruno te ninche.

⁸Ore te nkaraki nimbung'a araya iloshon kumok, eikimbung iyie aaraya ilo pisiai oleku loo ltung'ana te nkaraki osarge loo ltung'ana o larrabal te nkop, too nkanas e lelo pooki oomanya atua.

⁹Woi ninye ilo otum tumoto e ntorroni te nkaji enye, ilo oilepunye orreshet lenye, pee medoiki entorroni!

¹⁰Mpiraka iyie enkaji ino enkurruna, ore teine niwuang'ie iloreren kumok ninturrayie enkishui ino makewan.

¹¹Amu keishir osoit te suntai, neng'amaa iloom.

¹²Woi ninye ilo oshetu enkang to sarge, neitayu enkanasa te ntorroni.

¹³Aime Olaitoriani loo lororani eing'uaa, nchere pee easisho iltung'ana te nkaraki enkima, neitanaur iloshon ate te mpesho?

¹⁴Amu keyookini aaiput enkop, te ng'eno e nkitoo o Laitoriani, anaa enaibulua enkare enaiposha.

¹⁵Woi ninye ilo oitook ile latia enye, enkikompe e ngoro enye, neitemer ninche, pee etum atishila enkurruna enye!

¹⁶Eikipuoi iyie aaishopoki esulare te rishata e nkitoo, tookisho iyie, nimerrimerrari. Ore enkikompe natii enkaina e tatene o Laitoriani, naa keitamanuni aayau enitii, nelotu enkurruna shumata enkitoo ino!

¹⁷Ore olarrabal oitayioki te Lebanon naa eikimisie iyie; Ore enkidaata oo ng'uesi naa eikirutie iyie, te nkaraki ilo sarge loo ltung'ana o larrabal te nkop, nejing'aki nkanas o lelo pooki oomanya atua.

¹⁸Kaa dupoto eeta enkitanyaanyukoto e nkai, teneidip olaitobirani lenye aitobiru, enkitanyaanyukoto e nkai e sekenkei, olaiteng'enani le lejare? Amu keisilig oloasisho ina kitobirunoto naitobirua ninye, nemeitobiru ninye nkitanyaanyukot nemeiro!

¹⁹Woi ninye ilo ojoki enchata, inyo; nejoki osoit lemeiro, tudumunye! Ng'ura ajo etumuraki ninye te saabu o te nkosholai, kake metii enkiyang'et tukul atua ninye.

²⁰Kake etii Olaitoriani atua enkaji enye Sinyati; nchoo enkop pooki eitirring'a te dukuya ninye.