Read MAASAI REVISED PROTESTANT Hagai 2 Bible Online

Hagai 2 - MAASAI REVISED PROTESTANT bible

Hagai 2

¹Ore tiatua olari li are le nkitoria e Dario ilo aiguanani, to lapa li opishana, te nkolong e tikitam o obo o lapa, eeuo ororei lo Laitoriani enetii Hagai ilo oiboni le Nkai

²ejo, “Irorie taata Serubabel olayioni le Shealtiel ilo balusui le Yuda, o Yoshua olayioni le Yehosadak, ilo apolosani kitok, o nena lekunot pooki oo ltung'ana, nijoki,

³‘Kaing'ae etung'uayioki te intae, apa ootodua ena aji e Nkai te nkishiaa e nkitoo enye? Aidolitata taata intae etiu aja? Ae me pesho taata too nkonyek inyi?

⁴Ore etiu neijia entagoluoto, iyie Serubabel, Olaitoriani ojo, ntagoluoyu, iyie Yoshua, olayioni le Yehosadak, ele olapolosani kitok, intagoluoyu intae lo tung'ana pooki lena kop, Olaitoriani ojo; entaasisho, amu atii nanu te nebo intae; Olaitoriani loo lororani ojo,

⁵te risioroto oo nkisiligat apa naisiligie intae ipukuku te Misiri. Etii Enkiyang'et ai te nebo intae; emiureisho.

⁶Amu nji ejo Olaitoriani loo lororani: Ore ake sii, te nkiti rishata, naa kaikirikirie keper o enkop o enaiposha o enkop natoyio,

⁷naikirikirie nanu iloreren pooki, ore ilchumat lenye neyauni ene neiput enkaji e Nkai esikar, Olaitoriani loo lororani ojo.

⁸Enaai enkosholai naa enaai saabu, Olaitoriani loo lororani ojo.

⁹Ore ina sikar nayooki alotu ena aji naa keaku kitok alang enapa, e dukuya Olaitoriani loo lororani ojo, naa tiatua ene wueji aaishooyo nanu dupoto, Olaitoriani loo lororani ojo.’ ”

¹⁰Ore te nkolong e tikitam o ong'uan, o lapa li oudo to lari li are le nkitoria e Dario, eeuo ororei lo Laitoriani aimu Hagai ilo oiboni le Nkai, ejo,

¹¹“Nji ejo Olaitoriani loo lororani: Nkilikuana lelo apolosak metolimu ewalata ena kikilikuanata,

¹²‘Amaa te nenap oltung'ani enkiring'o nasinya to lcholoi lo lkila lenye, neiseyie te ilo sholoi lenye emukate, aashu enkurma, aashu enaisho oo sabibu, aashu eilata, aashu ae pukunoto e ndaa, keaku ina sinyati?’ ” Newal ilapolosak aajo, “A'a.”

¹³Neitoki Hagai ajo, “Amaa oltung'ani oiduruk te nkaraki neiseyie olmeneng'ani, te neiseyie nabo e kuna daiki, keiduruku?” Newal ilapolosak, aajo “Keaku keiduruk.”

¹⁴Neitoki Hagai ajo, “Neijia sii etiu kulo tung'ana, o kulo oshon ootii dukuya nanu ejo Olaitoriani; naa neijia sii etiu pooki siaai oo nkaik enye; ore ina kishorunoto naishoru ninche teine keiduruk naa.

¹⁵“Asai naa taata intae, entadamu ina nayooki aaku ebaiki ena olong neito idia alo. Amaa eton eitu eiteleikini osoit olikae soit tiatua enkaji o Laitoriani, kainyoo intae inotito?

¹⁶Tenelotu oltung'ani orupati loo mboreitin tikitam, tomon ake etum; te nelotu oltung'ani olchumati le naisho oo sabibu, ajo aaoku mboreitin onom, tikitam ake naatii.

¹⁷Atoosho nanu intae o lng'anayio pooki le nkinyinyiret inyi to lasai o te mpurukunyi o te nchan oo soito, neitu ake kishukokinono nanu, ejo Olaitoriani.

¹⁸Entadamu ebaiki ena olong neito idia alo, ebaiki enkolong e tikitam o ong'uan o lapa li oudo. Ebaiki ina olong apa natipikaki olkitamanyunoto le nkaji o Laitoriani, entadamu:

¹⁹Amaa keton etii olantererai hoo obo atua olkompe, keton eiu osabibu o lng'aboli, o kukumanka, o loirien hoo toki? Ore ebaiki ena olong neito idia alo, kaamayian nanu iyie.”

²⁰Enyaaka ororei lo Laitoriani alotu enetii Hagai enkata e are te nkolong e tikitam o ong'uan o lapa, ejo,

²¹“Irorie Serubabel, olgafanai le Yuda, tiaaki, etaa enkiti kata pee aikirikirie nanu keper o enkop,

²²naibelekeny ilorikan le nkitoo loo nkitoriat; etaa enkiti kata pee ainyal nanu engolon oo nkitoriat oo loreren, naibelekeny nena garrin oo mbartan o lakedok lenye; ore mbartan o lelo ookedito nedoyio, o ltung'ani ake to lalem lo likae.

²³Ore kenya teina olong, ejo Olaitoriani loo lororani, naa kaaya nanu iyie, Serubabel osinka lai, olayioni le Shealtiel, naaitotiu nanu iyie anaa olgisoi oata olmishire; amu aategelua nanu iyie, ejo Olaitoriani loo lororani.”