Read MAASAI REVISED PROTESTANT Sakaria 10 Bible Online

Sakaria 10 - MAASAI REVISED PROTESTANT bible

Sakaria 10

¹“Entoomon Olaitoriani enchan te nkata oloirujuruj, Olaitoriani ninye oitobiru olkutati o nkatampo, naa ninye oisho iltung'ana enkirujuruj e nchan, neitonyorij pooki toki tiong'ota.

²Eikilikuanishore iltung'ana nkitanyaanyukot o laitumusumusok kake ore iwalat naatum naa elejare o emodai. Eibelekeny kulikae nkidetidetat neitapong'oo intae. Enepesho enkikoo enye. Neaku kelimana iltung'ana anaa ntare naaimina. Etii ninche atua enyamali amu meeta olarikoni.

³“Eirowuaja engoro ai tenkaraki lelo shekuti, naa kaitame nanu lelo arikok; amu kegolie Olaitoriani loo lororani eluaata enye ina aji e Yuda. Eketiu ninche anaa imbartan aainei naagol o larrabal.

⁴Atua ninche epukunye ilaitoriak, o larikok o lkituaak ooitore iltung'ana laainei.

⁵Ore pooki tenebo naa keaku iltung'ana magil to larrabal, eitunyoki ilmang'ati lenye atua esarng'ab[3] oo nkoitoi naalala; naa kearisho ninche amu etii Olaitoriani tenebo ninche, naa kemir ninche lelo akedok loo mbartan.

⁶“Ekaitagol iltung'ana le Yuda; naa kaitajeu enkaji e Yosef. Ekashuku ninche amu aata olng'ur te ninche, naa ketiu ninche anaa keitu aekata ang'as aany ninche: Amu are nanu Olaitoriani Enkai enye, naa kawaliki ninche.

⁷Ketiu Efraim anaa olmorrani magilani, neshipa iltauja lenye anaa iltung'ana ootooko enaisho oo sabibu. Edol inkera enye ina naa keshipa, neshipakino ina mirata naishoo Olaitoriani ninche.

⁸“Kaipot iltung'ana laainei aiturrurr tenebo, amu atokordua nanu ninche, naa keaku ninche kumok anaa apa te moitie.

⁹Ore hoo naidapashaka nanu ninche atua iloreren, kake ore too nkuapi naalakua naa kaadamu ninche, nanu, neaku ore ninche tenebo inkera enye naa kepok nerrinyunye ang tenebo.

¹⁰Ayau ninche aitung'uaa Misiri o Asiria enkang enye nalotu aitamany ninche enkop enye. Ekaitamany sii ninche enkop e Gilead o Lebanon, o metaa meekure eeta enkop enemanyi te nkumoi o lorere.

¹¹Naa keeim ninche enaiposha e Misiri ore ilopir le naiposha naa kepuoi aaishie ore eng'uton pooki olkeju le Nail naa keitoi. Ore olwuasa le Asiria naa keitadoyiori aaitobor, ore engolon e Misiri nelo aing'uaa ninye.

¹²Ekaitagol ninche tiatua Olaitoriani, naa kepuo ninche tiatua enkitoo e nkarna enye, Olaitoriani ojo.”