Read MAASAI REVISED PROTESTANT Sakaria 12 Bible Online

Sakaria 12 - MAASAI REVISED PROTESTANT bible

Sakaria 12

¹Ele ninye ororei lo Laitoriani oipirta Israel. Nji ejo Olaitoriani, ilo oisalaasha keper neitobir enkop, neisho tung'ani enkishui natii atua ninye,

²“Ng'ura, etaa nanu enajo pee aitotiu Yerusalem anaa enkikompe e naisho oo sabibu; ore lelo oshon oomanita ninye naa keok netiu epuo anaa oltung'ani otemere. Naa ore teneman Yerusalem, naa kemani sii nena anas e Yuda.

³Ore teina olong naa kaitaa Yerusalem osoit oiroishi too loreren pooki le nkop tenetem ninche aadumu ninye, naa keitame ate oleng. Naa kedumakino ninye iloreren pooki le nkop aarare ninye.

⁴Ore kenya teina olong Olaitoriani ojo, naa kaosh nanu pooki barta to lkirutoto, naosh olakedoni lenye to lmilo, kake ore tialo enkaji e Yuda, naa kamitu nanu ninche, ina kata aosh nanu pooki barta oo loreren te modoki.

⁵Ina pee ejokino ilgilat le Yuda maate, ‘Ore lelo oomanya Yerusalem eeta engolon tiatua Olaitoriani loo lororani, Enkai enye.’

⁶“Ore teina olong naa kaitotiu nanu ilgilat le Yuda anaa olmoti le nkima te mpolos entim, aashu enkima nayupuyup natii atua irridat le nkano; naa kemut ninche eiteru te tatene o metabaiki kedianye olorere pooki omanita ninche. Ore Yerusalem neton ake emanyae.

⁷“Naa keng'as Olaitoriani aisho enkisulata lelo ng'oborri le Yuda, pee eaku ore enkitoo e nkaji e Daudi o enkitoo e lelo oomanya Yerusalem, nemelus te nkitoo Yuda.

⁸Ore kenya teina olong, naa keitaman Olaitoriani elong'o lelo oomanya Yerusalem, metaa ore ninye oloshal aisul tiatua ninche teina olong netiu anaa Daudi. Ore enkaji e Daudi netiu anaa Enkai, netiu anaa olmalaika lo Laitoriani olo te dukuya ninche.

⁹Naa ore teina olong, naa kaing'oru amut lelo oshon pooki oopuonu aarare Yerusalem.

¹⁰ “Naa kabukoki nanu enkaji e Daudi o lelo oomanya Yerusalem enkiyang'et o lng'ur o esayiare, metaa, tenelo neing'or aakurraki ilo otaremo ninche, naa keishiraki ninye, anaa oltung'ani oishiraki ina kerai nabo naa ninye ake eeta. Neishir te mion sapuk oleng te ninye anaa ilo oishiraki olkikau lenye otua.

¹¹Ore teina olong, naa ketiu olkiyioi te Yerusalem anaa olkiyoi le Hadadrimon te nkisiashata e Megido.

¹²Ekeishir enkop pooki, neishir pooki marei openy; neishir ilo marei le Daudi openy, neishir inkituaak enye maate; neishir olmarei le Natan makewan, neishir inkituaak enye maate.

¹³Neishir olmarei le nkaji e Lawi makewan, neishir inkituaak enye maate; neishir olmarei le Shemeit makewan, neishir inkituaak enye maate;

¹⁴ore lelo marei ootelekutua, neishir ake olmarei makewan, neishir inkituaak enye maate.