Read MAASAI REVISED PROTESTANT Sakaria 8 Bible Online

Sakaria 8 - MAASAI REVISED PROTESTANT bible

Sakaria 8

¹Nelotu ororei lo Laitoriani loo lororani enatii aajoki,

²Inji ejo Olaitoriani loo lororani, ekaata olom sapuk oleng te nkaraki Sion, naata olom sapuk tenkaraki ninye te ngoro sapuk.

³Inji ejo Olaitoriani: Kashukokino Sion, naa kalotu amany atua Yerusalem, naa keitokini aaipot Yerusalem aajo enkanasa naisiligayu, oldoinyo lo Laitoriani loo lororani, ilo doinyo sinyati.

⁴Inji ejo Olaitoriani loo lororani: Ore ilpayiani kituaak o ntasati moruak, ekeitoki aatoni too nkoitoi naalala e Yerusalem, pooki ng'ae eeta entirma te nkaina enye tenkaraki enkitoo.

⁵Naa Ore inkoitoi naalala eina anasa, neiput inkayiok o ntoyie eiguran teine.

⁶Inji ejo Olaitoriani loo lororani: Amaa tenaa embae enking'asia te nduata e lelo lekunot tiatua lelo oreren ootung'uayioki te kuna olong'i, Keaku sii embae enking'asia too nkonyek aainei, Olaitoriani loo lororani ojo.

⁷Inji ejo Olaitoriani loo lororani: “Ng'ura, kaitajeu iltung'ana laainei te nkalo enkop oloosaen, o te nkalo enkop oloontoluo;

⁸naa kayau ninche metotoni tiatua Yerusalem; naa keaku ninche iltung'ana laainei naaku nanu Enkai enye, te dede o te sipata.”

⁹Inji ejo Olaitoriani loo lororani: “Enchoo inkaik inyi etum engolon, intae lelo te kuna olong'i ooning'ito kulo rorei oing'uaa enkutuk oo Loibonok le Nkai, eiteru ina olong apa nairragieki olkitamanyunoto le ina aji o Laitoriani loo lororani, nchere pee etumi aateshet enkaji e Nkai.

¹⁰Amu ore apa eng'or nena olong'i, meetae apa oltung'ani oidim aigero oltung'ani aashu eng'ues meitaiki esiaai. Nemeetae sii oltung'ani oserian too lmang'ati lenyena te pooki ng'ae oipang'a aashu olotijing'ua. Amu eibelekanyaka aitaar pooki tung'ani olelatia enye.

¹¹Kake ore naa tena kata, meekure aitaas ilekunot le kulo tung'ana anaa enaikuna too nkolong'i naatulusoitie, Olaitoriani loo lororani ojo.

¹²Naa keun ninche nkurman enye te seriani; naa keiu o sabibu ilng'anayio lenyena naa keiu enkop te nkumoi enye naa keishoru keper enkoileelio enye. Naa kaisho kulo lekunot le kulo tung'ana meitaa kuna tokitin pooki inkunenye.

¹³Ore apa anaa enira entoki naimakini aadiaare too loreren, Iyie na aji e Yuda o enkaji e Israel, kaitajeu nanu intae niakuku emanyianata. Emiureisho, kake enchoo egolu nkaik inyi.”

¹⁴Amu inji ejo Olaitoriani loo lororani: “Anaa enatonyorra apa aitaas intae intorrok aitame ina kata pee aaitagor iloo papaai linyi te ng'oro sapuk, neitu arriny endamunoto ai, ejo Olaitoriani loo lororani,

¹⁵neaku ore te kuna olong'i atipika endamunoto peyie eitaas esidai Yerusalem o enkaji e Yuda; metaa emiureisho.

¹⁶Kuna imbaa nayieu niasiasa: eroro esipata o likae o to likae, entayu too nchomito inyi inkiguanat naasipa nintayuyu sii osotua.

¹⁷Nimimpiru entorroni to ltau lino tenkaraki olikae. Niminyorru enkinosata olmumai le lejare, amu ore kuna tokitin pooki naa kaiba, Olaitoriani ojo.”

¹⁸Nelotu ororei lo Laitoriani loo lororani enatii aajoki,

¹⁹“Inji ejo Olaitoriani loo lororani: Ore ina enata nintupukoo ate to lapa liong'uan o enata enkitupukoroto nintupukoo ate to lapa le imiet, o ina enata enkitupukoroto o lapa liopishana, o enata nintupukoo ate to lapa le tomon, keaku ninche te nkaji e Yuda irishat e ng'ida o enchipai o sirua lo lkerempe. Metaa entonyor esipata o eseriani.”

²⁰Inji ejo Olaitoriani loo lororani: Ekelotu enkata naaku kepuonu olorere le kulie anas Yerusalem.

²¹Keaku kepuo olorere le ae anasa enkae anasa aajoki, “Emaape nabo kata aaomonu omom to Olaitoriani, niking'oru Olaitoriani loo lororani; aloito nanu!

²²Ore iloshon kumok o loreren oogol naa kepuonu aaserem Olaitoriani loo lororani te Yerusalem, neomonu omom to Laitoriani.

²³Inji ejo Olaitoriani loo lororani; ore te nena olong'i, keibung iltung'ana tomon ooing'uaa iloreren le pooki ng'ejep olkila lo Lyahudi, ejoki, ‘Maape tenebo aairiamari, amu kitoning'o aajo etii Enkai tenebo iyie.’ ”