Read MAASAI REVISED PROTESTANT Malaki 2 Bible Online

Malaki 2 - MAASAI REVISED PROTESTANT bible

Malaki 2

¹“Ore naa taata lo apolosak, eninyi ena kitanapata.

²Ti nimining'ining'i, tinimipikipiki atua iltauja linyi ninchosho enkitoo enkarna ai, ejo Olaitoriani loo lororani, kaae nairriu oldeket shumata intae nadek sii imayianat inyi. Nesipa ajo aidipa nanu atediaa ninche, tenkaraki mipikitata ntae ltauja linyi.

³Kaisikong nanu eishoi inyi, napik inkomomi inyi emodiei, nena modiok oo lasarri linyi, naitalamaa intae te dukuya nanu.

⁴Ore te nkaraki ina, niyiolouu aajo airriwua nanu ena kitanapata atua intae, pee etum olning'o lai lo sotua o Lawi aitasho, ejo Olaitoriani loo lororani.

⁵“Ore apa olning'o lai lo sotua o ninye, naa olning'o lo osotua le nkishui o eseriani, naishoo apa nanu ninye kuna peyie etum aturia; naaureyu ninye nanu, neitashe te nkanyit euriata e nkarna ai.

⁶Etii apa enkiteng'enata nasipa enkutuk enye, neitu etumi enkitapong'oto te enkutuk enye. Eshomo tenebo nanu te seriani o te nkitashoto nanare, neibelekenya ninye ilkumok metung'uai intorrok.

⁷Amu ore enkutuk olapolosani neishiaakino nerrip eng'eno, ore sii iltung'ana neishiaakino neing'oru enkiteng'enare te nkutuk enye, amu ore ninye naa olkilikuai lo Laitoriani loo lororani.

⁸“Kake imbelekenye iyie apaash enkoitoi, inchoo ilkumok errorro too nkiteng'enat inono, indurukie iyie olning'o lo sotua le Lawi, ejo Olaitoriani loo lororani

⁹naa kaisho nanu mikitemenuni nikintadouni te dukuya iltung'ana pooki, anaa ina neitu iyie imbung nkoitoi aainei, kake intodolua olkep too nkiteng'enat inono.”

¹⁰Aimikiaata iyiook pooki papa obo? Aime Enkai nabo naitobira iyiook? Kainyoo naa peyie mikisiliga iyiook maate, nikisarkionie olning'o loo loo papa lang?

¹¹Etaa iltung'ana le Yuda ilemeisiligayu, netaasaki embae o lminong te Israel o tiatua Yerusalem, amu eisarkionie Yuda ewueji sinyati o Laitoriani, teina natonyorra neyam entito e nkai oo loreren.

¹²Metudung'oi Olaitoriani aiwuang'ie too Siraeli tenebo oltung'ani oas ina, o loishakenoki, anaa olowal anaa oloyaki olasar Olaitoriani loo lororani!

¹³Niaasita ake sii ena. Imulumul olperere lo lasar to Laitoriani too lkiyio, te nkishirata o too nkigorot eshipakino te nkaina ino.

¹⁴Ninkilikuanu ajo, “Kainyoo doi pee meng'amaa ninye?” Enkaraki nataa Olaitoriani shakeni lo lning'o te rishata eina kitok niyama te kitisho, itaa iyie olemeisiligayu te ninye hoo duoo naa enkitok ino te naboisho o to lning'o.

¹⁵Aime Enkai nabo naitaa osesen obo o nkiyang'et nabo? Naa kainyoo ninye eyieu? Eyieu ninye eishoi naure Enkai. Metaa entagolie ate emincho obo linyi eaku olemeisiligayu teina kitok e kitisho enye.

¹⁶“Amu kaiba nanu, eoro o lpayian o enkitok ejo Olaitoriani Enkai e Israel naiba enkimulumulata o lkila le nkarruoisho, ejo Olaitoriani loo lororani. Metaa eng'ura ate, nimiakuku ilemeisiligayu.”

¹⁷Intanaura intae Olaitoriani too rorei linyi. Hoo nijojo, “Kaji doi kinkuna ti nikintanaur ninye?” Intanaura ninye te nijojo: “Aisupat pooki tung'ani oas intorrok too nkonyek o Laitoriani, naa keshipakino ninye ninche.” Anaa inkilikuanunu ijojo, “Koree doi Enkai oo sipat?”