Read MAASAI REVISED PROTESTANT Matayo 1 Bible Online

Matayo 1 - MAASAI REVISED PROTESTANT bible

Matayo 1

¹Ena entipat e Yesu Kristo enkerai e Daudi, enkerai e Abraham.

²Etoiwuo Abraham Isaak, neiu Isaak Yakobo, neiu Yakobo Yuda o lalashera lenyena;

³neiu Yuda o enkitok enye Tamar Peres o Sera; neiu Peres Hesron; neiu Hesron Aram;

⁴neiu Aram Aminadab; neiu Aminadab Nashon; neiu Nashon Salmon;

⁵neiu Salmon Boas te Rahab; neiu Boas o enkitok enye Rusi Obed; neiu Obed Yese;

⁶neiu Yese olaiguanani Daudi. Neiu Daudi o enkitok e Uria Solomon;

⁷neiu Solomon Rehoboam; neiu Rehoboam Abiya; neiu Abiya Asa;

⁸neiu Asa Yehoshafat; neiu Yehoshafat Yoram; neiu Yoram Usia;

⁹neiu Usia Yotam; neiu Yotam Ahas; neiu Ahas Hesekia;

¹⁰neiu Hesekia Manase; neiu Manase Amon; neiu Amon Yosia;

¹¹neiu Yosia Yekonia o lalashera lenyena te nkata e yararoto e Babilon.

¹²Ore te siadi e yararoto e Babilon, neiu Yekonia Shealtiel; neiu Shealtiel Serubabel

¹³neiu Serubabel Abiud; neiu Abiud Eliakim; neiu Eliakim Asor;

¹⁴neiu Asor Sadok; neiu Sadok Akim; neiu Akim Eliud;

¹⁵neiu Eliud Eleasar neiu Eleasar Matan; neiu Matan Yakobo;

¹⁶neiu Yakobo Yosef, ilo payian le Mariamu natoiwuo Yesu oji Kristo.

¹⁷Metaa era iishoritin ebaiki Abraham o metabaiki Daudi iishoritin tomon o ong'uan; ore ebaiki Daudi o metabaiki eyararoto e Babilon era iishoritin tomon o ong'uan; ore ebaiki eyararoto e Babilon o metabaiki Yesu Kristo nera iishoritin tomon o ong'uan.

¹⁸Inji eikununo einoto e Yesu Kristo; ore eidipa Yosef atisira Mariamu ng'otonye Yesu, eton eitu eboitare, nedoli enuta, enutai e Nkiyang'et Sinyati.

¹⁹Ore amu oltung'ani apa loo sipat Yosef, olpayian lenye, nemeyieu nesul Mariamu, neyieu neleliari aing'uaa.

²⁰Ore eton eiguanare kuna baa, neipang'aki olmalaika lo Laitoriani te nkidetidet, nejoki, “Yosef, olayioni le Daudi, miureyu irik esiankiki ino Mariamu, amu ore enutai enye, naa ene Nkiyang'et Sinyati.

²¹Naa keiu enkayioni, nijo enkarna enye Yesu, amu ninye oyooki aitajeu iltung'ana lenyena too ng'ok enye.”

²²Etaasate kuna pooki pee ebaya inaatejo Olaitoriani to lkilikuai lo loiboni le Nkai otejo,

²³“Kenutayu entito neiu enkayioni; neji enkarna enye Immanuel;” naa eji, “Enkai te nebo iyiook.”

²⁴Ore pee eputunye Yosef too njio neas anaa enaitanapa olmalaika lo Laitoriani nerik esiankiki enye ang;

²⁵neitu eboitare ninye o metoiu enkayioni, nejo enkarna enye Yesu.