Read MAASAI REVISED PROTESTANT Matayo 11 Bible Online

Matayo 11 - MAASAI REVISED PROTESTANT bible

Matayo 11

¹Ore pee eidip Yesu aitanapa lkipaareta lenyena tomon o are, neing'uaa ine nelo aiteng'enisho, nelikioo ororei too nkang'itie naamanita ine.

²Nening Yohana eena te jila nkiasin e Kristo, neirriwaki lkipaareta lenyena nejoki,

³“Ai yie olapa olotu ana keetae likae likiaanyu?”

⁴Newaliki Yesu ajoki, “Enchom entoliki Yohana imbaa nining'itoto o nidolitata.

⁵Etodolishote ilmodook, nepuo ilmaiman, neishiunyeki le nkeeya oo lbolot, nening'ishoyu lming'anta, neitopiuni ilootuata, ore ilaisinak, nelikini Ororei Supat le Nkai.

⁶Nemayiana olemetum olkob te nanu.”

⁷Ore epuoito lkipaareta le Yohana neimaki Yesu Yohana to lorere ajoki, “Kainyoo ishomo intae aadol ti ong'ata? Ke olperesi oyuk osiwuo?

⁸Kake aainyo pee impang'a aapuo? Ke oltung'ani oishopito nkilani naapuyiapui ishomo aadol? Ore ilo oishop inkilani naapuyiapui nkajijik oo laiguanak etii.

⁹Kake ainyoo pee impang'a aapuo? Ke oloiboni le Nkai ishomo aadol? Ee pae olkitok olang oloiboni le Nkai Yohana.

¹⁰Amu ninye eimakaki pee etisiraki aajo, ‘Kairriwaa olkipaaret lai aiturukie te iyie, likintobiraki enkoitoi ino.’

¹¹Kesipa ajoki intae, eitu etumi aekata too ltung'ana ooiu nkituaak, olkitok olang Yohana Olaibatisani. Kake ore oloti aisul te nkitoria e keper naa kitok te ninye.

¹²Ore ebaiki nkolong'i e Yohana Olaibatisani o taata eisimitai te ngolon enkitoria e keper, neisimaa ilo ogol.

¹³Amu eibonutuo loibonok pooki le Nkai nkitanapat ometabaiki Yohana;

¹⁴naa te naa iyieuu ning'amumu ena, ele doi Eliya, olapa olotu.

¹⁵Oloata nkiyiaa toning'o.

¹⁶“Kainyoo aitanyaanyukie ltung'ana le na kata? Etiu anaa nkera naatoni too neemirishoreki, neipot inkulie nejoki,

¹⁷‘kitooshokito intae ndulen neitu iranyiranya; nikinchirakita intae neitu nchirishiri.’

¹⁸Amu eewuo Yohana nemedaa, nemeokisho, nejo ltung'ana, ‘Keeta oloirirua.’

¹⁹Ore Enkerai e Tung'ani neewuo nedaa, neokisho, nejo ninche, ‘Eng'ura oltung'ani oulu, olaokoni le naisho naa olchore loo loosotu kodi o laing'okok!’ Kake too nkiasin etokorduaki kulo tiatua ltung'ana, pee eaku ilng'anayio le dukuya le Nkai o lo Lkuoo le Ker.”

²⁰Neiteru Yesu aisikong nkang'itie naataasie siaaitin enyena e nking'asia, amu eitu eirridu ng'ok enye,

²¹“Ee kake ayia Korasin, ee kake ayia Betsaida, amu te naa ketaasaki inenking'asia naataasaki tiatua intae, te Tiro o te Sidon anaata eirridutua apa te musano, neishop ilkuniyiani neelare nkuruon.

²²Kake ajoki intae, keikashieki Tiro o Sidon te nkolong e nkiguana aaitalang intae.

²³Oi iyie Kapernaum aa ijo eikisisi aailepie shumata? Ae kintadouni tabaiki enemeneng'a. Amu ore isiaaitin naataasaki tiatua iyie, te naa ketaasaki apa te Sodom anaata eton eetae ina ang o tene.

²⁴Amu esipa ajoki intae, keikashieki enkang e Sodom te nkolong e nkiguana aaitulusoo te iyie.”

²⁵Neitoki Yesu ajo teina kata, “Aaisho iyie enashe, Papa Olaitoriani le keper o enkop, amu isudorie kuna baa iltung'ana ng'eni niboloki nkera.

²⁶Ee neijia etiu Papa amu ina nikintishipa iyie.

²⁷“Aaishoo Papa pooki toki, nemeetae hoo obo oyiolo ina Kerai leme Papa ake, nemeetae hoo obo oyiolo Papa leme ina Kerai ake o pooki ng'ae ogelu Enkerai aboloki.

²⁸“Wootu enatii intae pooki oonyamal niatata ilolan ooiroshi, pee ayeng'iyeng'ie intae.

²⁹Enteleiki ate enchata ai oo murto, enteng'ena ate te nanu, amu kabor nemawuasa to ltau, naa itumutumu intae enkiyeng'iyeng'ata to nkorroki inyi;

³⁰amu kelelek enchata ai oo murto naa keneneng olola lai.”