Read MAASAI REVISED PROTESTANT Matayo 12 Bible Online

Matayo 12 - MAASAI REVISED PROTESTANT bible

Matayo 12

¹Ore teina kata nelo Yesu te nkolong e nkiyeng'iyeng naji Sabato aim atua nkurman e nkano, netir esumash lkipaareta lenyena, neitayu enkano aanya.

²Ore pee edol Ilfarisayo nejoki, “Ng'ura enaasita lkipaareta linono, nemeishiaa te neasi te nkolong e nkiyeng'iyeng'ata.”

³Nejoki Yesu, “Keitu isumusumu enataasa apa Daudi o looboitare etotiro esumash?

⁴Etijing'a enkaji e Nkai nenya emukate nasinya nemeishoruno too nkitanapat meinosa ninye o lelo ooboitare, ilapolosak ake oonya.

⁵Ana keitu isumusumu too nkitanapat inchere kegil ilapolosak le nkaji e Nkai enkolong e nkiyeng'iyeng naji Sabato nemeikeni aajo eisarkionie ninche nemeji eitarruoitie ninche?

⁶Kake ajoki intae, etii ene entoki kitok alang enkaji e Nkai.

⁷Kake te naa itayioloito eneikununo ele rorei ojo, ‘Olng'ur ayieu mme olasar.’ Naa anaata mipikipiki entioto ilemeeta.

⁸Amu Olaitoriani le nkolong e nkiyeng'iyeng'ata Enkerai e Tung'ani.”

⁹[4] Nelo Yesu aing'uaa ine alo ajing enkaji e ntumo

¹⁰Netii ine oltung'ani oikaole enkaina. Neikilikuan ninche aajoki, “Inyorriki keishoruno too nkitanapat te nebakishoe te nkolong e nkiyeng'iyeng naji Sabato?” Aa kejo taa pee etum aaitang'oro ninye.

¹¹Nejoki ninche, “Kalo tung'ani linyi oata enker nabo, naa te nedoiki ina ker engumoto te nkolong e kiyeng'iyeng'ata, nemeibung aitayu?

¹²Kebaa naa elusoo oltung'ani te nker! Te nkaraki e ina keishoruno metaasi mbaa supati te nkolong e nkiyeng'iyeng'ata.”

¹³Nejoki Yesu ilo tung'ani, “Intorioi enkaina ino!” Neitorioo neishiu atiu anaa enkae.

¹⁴Kake eipang'a ake Ilfarisayo nepuo aaiguanare aaing'oru eneiko pee ear ninye metua.

¹⁵Neyiolou Yesu ilo rorei nelo teine, nesuj iltung'ana kumok neishiunye ninche pooki.

¹⁶Neitanap ajoki, pee melikioo,

¹⁷ejo pee etum atabai enatejoki te nkutuk o loiboni le Nkai oji Isaya pee ejo,

¹⁸“Osinka lai ele, lategelua, olanyor lai, oshipakino oltau lai; naa kapik Enkiyang'et ai shumata ninye, olaa ninye odung'oki loreren enkiguana te sipata

¹⁹nemeilepilep ninye nemebuak; nemening'i oltoilo lenye too nkoitoi oo nkaulele,

²⁰nemegil oltiyani oilenye, nemear oltaa[5] oiliilari, omanaa omeisulie enkiguana.

²¹Naa enkarna enye eyooki Loreren aaisilig.”

²²Nerikokini Yesu ina kata oltung'ani oata oloirirua; naa modooni nemeiro, neishiunye, Yesu ninye neiro nedolishoyu.

²³Neing'asia olorora pooki nejo, “Keidim ele ataa ninye Enkerai e Daudi?”

²⁴Ore pee ening Ilfarisayo ina nejo, “Mearaa ele tung'ani iloiriruani mme te ngolon e Beelsebul olkitok loo loiriruani.”

²⁵Neyiolou Yesu ndamunot enye nejoki, “Ore enkitoo pooki naoro tiatua nerruoyo; anaa enkang ake pooki, anaa enkaji naoro aara maate, meitashe.

²⁶Amaa teniaraa Sheitani Sheitani, neoro ninye makewan, kaji naa eiko enkitoria enye teneitashe?

²⁷Amaa te naa te Beelsebul aaraa nanu iloiriruani, ai ng'ae eararie ninche nkera inyi? Ninche maate ooyooki aairrash intae.

²⁸Kake amaa te naa te Enkiyang'et e Nkai aaraa nanu iloiriruani, enkitoria e Nkai naa naewuo atua intae.

²⁹“Keidim oltung'ani atijing'a enkaji o ltung'ani ogol neya ntokitin enyena, eitu eng'as aen ilo tung'ani ogol? Pee etum aawa ntokitin e nkaji enye?

³⁰“Ore olemaaning'ore naa olmang'atinta lai ore olemeiturrur te nebo nanu, keisardaikie.[6]

³¹Te nkaraki ena ajoki intae, epalakini ltung'ana ng'ok pooki o emoroto namor Enkai, kake ore emoroto namor Enkiyang'et Sinyati, nemepalakini.

³²Ore olomor Enkerai e Tung'ani, kepalakini, kake ore pooki ng'ae omor Enkiyang'et Sinyati, nemepalakini tena ishoi o te ishoi nalotu.

³³“Entaa olchani sidai, nesidanu ilng'anayio lenyena, aashu entaa olchani torrono, netorronu lng'anayio lenyena amu too lng'anayio lenyena eyiolouni olchani.

³⁴Naishoi oo lasuriaa, kaji nkoko pee ndimidimi aairoro irorei supati irara intae torrok? Amu inaabore oltau eiro enkutuk.

³⁵Ore oltung'ani supat neitayu supati tiatua olchumati lenye sidai, ore oltung'ani torrono, neitayu ntorrok to lchumati lenye torrono.

³⁶“Ajoki naa intae, ore pooki rorei lemeeta tipat oiro iltung'ana, eikenu kenya ake te nkolong e nkiguana.

³⁷Amu to nkirorot inono kinkenakini isupati, naa to nkirorot inono kinkenakini ntorrok.”

³⁸Nejoki ilaiteng'enak loo nkitanapat o Lfarisayo Yesu, “Olaiteng'enani, kiyieu nikidol olmonekie te iyie.”

³⁹Newaliki ajoki, “Keyieu kulo tung'ana lena kata torrok oololoito olmonekie nemeishori, pooki o lmonekie oishori naa olo loiboni le Nkai oji Yona.

⁴⁰ Ore anaa apa etii Yona enkoshoke e ntiamasi o sinkirri[7] ndamaritin uni o nkewarieitin uni, neijia sii etiu Enkerai e Tung'ani, kelo aton ndamaritin uni o nkewarieitin uni tiatua olodo lenkop.

⁴¹ Keitasheikinore iltung'ana le Ninawi te nkiguana ltung'ana le na ishoi, naa keiguanaki ninche nchere, eitarruoitie amu eirridutua ninche to lkilikuai le Yona; netii ene olkitok olang Yona.

⁴²Keitasheikinore enkaiguanani e moikuape te nkiguana ltung'ana le na kata naa keiguanaki ninche nchere eitarruoitie, amu eewuo ninye te nkop nalakua alotu ainining eng'eno e Solomon, netii ene olkitok olang Solomon.

⁴³“Te nepuku oloirirua torrono aing'uaa oltung'ani neimaa iwuejitin netoito eing'oru eneyeng'iyeng'are, nelau;

⁴⁴nejo, ‘Kashukokino enkaji ai natung'uayie’; ore pee elotu nedol ajo mijooni netooroki enkaji neikodi.

⁴⁵Nelo ariku kulikae oiriruani oopishana torrok aalang ninye, nejing aatoni, neaku mbaa eilo tung'ani torrok aalang enkiterunoto; neijia sii etiu te kulo tung'ana le na ishoi torrono.”

⁴⁶Ore eton eirorie Yesu iltung'ana neitashe ng'otonye o lalashera te boo eyieu neirorie.

⁴⁷Nejoki oltung'ani, “Eitashe ng'utunyi te boo, o lalashera linono, kiyie nikirorie.”

⁴⁸Newaliki Yesu ilo tung'ani ajoki, “Ae ng'ae yieyio anaa ae loo ng'ae ilalashera laainei?”

⁴⁹Neutaki te nkaina enye lelo ooiteng'eni lenyena nejoki, “Kulo yieyio o lalashera laainei.

⁵⁰Amu ore oloas enanyor Papa otii keper, ninye olalashe lai o enkanashe ai, o yieyio lai.”