Read MAASAI REVISED PROTESTANT Matayo 14 Bible Online

Matayo 14 - MAASAI REVISED PROTESTANT bible

Matayo 14

¹Ore ina kata nening'oo olaiguanani Herode olning'o le Yesu

²nejoki sinkan lenyena, “Yohana Olaibatisani taa ele otopiwuo aing'uaa lootuata, paa ina magilanisho naasisho tiatua ninye.”

³Amu eibung'a apa Herode Yohana aen apik jila te nkaraki e Herodias enkitok e Filipo olalashe lenye.

⁴Amu etiaaka Yohana, “Mikinchoro too nkitanapat ti niaata ninye.”

⁵Ore pee eyieu near Yohana metua, neureyu olorere amu kejo pooki oloiboni le Nkai Yohana.

⁶Ore pee ebau enkolong e inoto e Herode, neranyisho entito e Herodias te mpolos o lorere, neitiship Herode.

⁷Nenya Herode olmumai nchere, ore entoki pooki naomon ninye, neisho.

⁸Neiguan ng'otonye, nejoki tiaaki, “Inchooki tena beshen elukunya e Yohana Olaibatisani.”

⁹Neisinanuo Olaiguanani, kake ore te nkaraki ilmuma lenyena o lelo ooboitare neitanapisho meishori.

¹⁰Neirriwaa oltung'ani meshomo adung'u elukunya e Yohana te jila.

¹¹Neyauni elukunya enye te mbeshen neishori entito, neyaki ina tito ng'otonye.

¹²Nepuo lkipaareta le Yohana aaya osesen aanukaa, nepuo aainosaki Yesu.

¹³Ore pee ening Yesu lelo omon, neinyototo ajing empeut alo ewueji neliyio, ore pee ening olorere, nesuj too nkejek eing'uaa nkang'itie enye.

¹⁴Ore pee edou Yesu te mpeut, nedol olorere kumok, neing'urrie neishiunye iltamuoyia lenye.

¹⁵Ore pee eaku teipa, nepuo lkipaareta lenyena enetii nejoki, “Ore ene nikitii naa ewueji neliyio, netaa teipa tiaaki olorere meshomo kuna ang'itie pee epuo aainyiang'aki ate endaa.”

¹⁶Nejoki Yesu, “Meeta tipat napuoyie, enchoo intae endaa.”

¹⁷Nejoki lkipaareta, “Mikiaata iyiook toki neme mukateni miet o sinkir aare.”

¹⁸Nejoki, “Eyakaki.”

¹⁹Nejoki olorere metotona too nkujit, nedumu nena mukateni imiet o sinkir aare, neing'or shumata, nemayian, negil nena mukateni, neisho lkipaareta lenyena, neisho lkipaareta lenyena olorere.

²⁰Nenya pooki neraposho, nesotuni naatelekutua nkikapuni tomon o aare, naabore.

²¹Ore ilooinosa naa inkalifuni imiet ilewa metii nkituaak o nkera.

²²Neitanap Yesu ina kata lkipaareta lenyena meituruko aapuo te mpeut lido kekun ometaba anaa neitanapare olorere.

²³Ore pee eidip aitanapare olorere, neilepaki oldoinyo alo aomon; ore pee eaku teipa neaku ninye ake openy.

²⁴Netalama empeut enkop natoyio, eyukito lopir le nkare amu kenang'are osiwuo.

²⁵Ore pee enyiku enkakenya[9], nelotu Yesu enetii ninche elo too nkejek ti oriong enkare.

²⁶Ore pee edol lkipaareta lenyena eloito too nkejek ti oriong enkare neureishoyu nejo, “Oloip doi!” Nebuak aaishir te nkuretisho.

²⁷Neirorie taa Yesu nejoki, “Entagoluoto, Nanu doi! Emiureisho.”

²⁸Newaliki Petero ajoki, “Lo Kitok, te naa eiyie, tiaakaki maeu enitii too nkejek ti oriong enkare.”

²⁹Nejoki, “Wou.” Nedou Petero te mpeut nelo too nkejek ti oriong enkare enetii Yesu.

³⁰Ore pee edol osiwuo neureishoyu neiteru aimis, nebuak to ltoilo sapuk ajo, “Lo Kitok, tasaruaki!”

³¹Neitorioo Yesu enkaina nabo kata aibung nejoki, “Oi iyie oloti enkirukoto, aainyo pee inyaaka aing'ash?”

³²Ore pee eilepaki, empeut, negira osiwuo.

³³Ore ilo otii ina peut neserem ninye nejoki, “Esipa ira iyie Enkerai e Nkai.”

³⁴Ore pee eidip aatalang, nebaiki enkop e Genesaret.

³⁵Ore pee eyiolou iltung'ana le ina kop ninye neirriwaa ilkiliku ilubot pooki eilo kirine neyakini ltamuoyia.

³⁶Nesai meiseyie olcholoi lo lkila lenye, ore ilooiseyie pooki neishiu.