Read MAASAI REVISED PROTESTANT Matayo 15 Bible Online

Matayo 15 - MAASAI REVISED PROTESTANT bible

Matayo 15

¹Nepuonu Ilfarisayo oo laiteng'enak loo nkitanapat ooing'uaa Yerusalem enetii Yesu ejo,

²“Kainyoo pee einyal lkipaareta linono inkoon oo lpayiani? Amu kenya endaa meisuja inkaik.”

³Newaliki Yesu ajoki ninche, “Kainyoo pee inyalinyala intae inkitanapat e Nkai te nkaraki nena koon inyi?

⁴Amu etejo Enkai, ‘Iyanyita minyi o ng'utunyi; ore oloitarriki menye aashu ng'otonye, inchoo metua.’

⁵Kake ijojo intae, ore oltung'ani ojoki menye anaa ng'otonye inchere, ‘Ore toki naata naaretie iyie etaa enaisho Enkai to lasar,’ neaku meyanyit menye aashu ng'otonye.

⁶Ore te nkaraki nkoon inyi niwuang'ieng'ie nkitanapat e Nkai.

⁷Lo sunkuro, enotoko Isaya te naibon enye pee ejo,

⁸‘Kayanyit ele orere too nkutukie, kake kaalakuaniki iltauja lenye;

⁹naa pesho aaserem ninche nanu, aa nkitanapat oo ltung'ana eitudupaa anaa ae ninche enkiteng'enare nasipa.’ ”

¹⁰Neipotu iltung'ana nejoki, “Enining'o niyiolouu.

¹¹Mme entoki naim enkutuk naidurukie oltung'ani, kake enapuku te nkutuk naidurukie oltung'ani.”

¹²Nepuonu lkipaareta lenyena nejoki, “Itayioloito aajo etirikate[10] Ilfarisayo pee ening ilo rorei?”

¹³Newaliki Yesu ajoki ninche, “Ore pooki aitubului neme Papa le keper otuuno kedotuni.

¹⁴Entapal ilarikok modook loo lmodook. Naa te nerik olmodooni olikae modooni nesulakino pokira aare engumoto.”

¹⁵Newaliki Petero ajoki, “Imbalakinye iyiook ena kitanyaanyukoto.” Nejoki Yesu,

¹⁶“Keton ake sii mejing'aa intae?

¹⁷Aimiyiololo aajo ore pooki toki najing enkutuk o ltung'ani, enkoshoke elo neipang?

¹⁸Kake ore enapuku te nkutuk, oltau eing'uaa; naa ninye naisarkionie oltung'ani;

¹⁹amu oltau epukunye indamunot torrok, enkitayunoto oo loikop, eloloito, enkiborra oo nkonyek, enkiteenikinoto o emorore.

²⁰Kuna naaisarkionie oltung'ani, kake te nedaa meisuja inkaik, nemeisarkionie oltung'ani.”

²¹Nelo Yesu teine aito enkalo o lkerenket le Tiro o Sidon.

²²Nelotu enkitok e Kanaan naing'uaa ina kop neishiraki ajoki, “Lo Kitok, ng'urrieki, ara Daudi, eitanyamalita enkerai ai oloirirua.”

²³Kake eitu hoo eng'amaa Yesu. Nepuonu lkipaareta lenyena aasai aajoki, “Inchoo ena kitok elo amu, kesujita iyiook eishirita.”

²⁴Newaliki ajoki, “Ntare kiminat ake e nkaji e Siraeli aairriwakaki.”

²⁵Nelotu ina kitok neserem nejoki, “Lo Kitok, taretuoki.”

²⁶Newaliki ajoki, “Meishiaakino te nenang'akini ildiein endaa oo nkera.”

²⁷Nejoki, “Kedede, Lo Kitok; kake kenya sii ildiein inaadoyio te misa oo lkituaak lenye.”

²⁸Newaliki Yesu ajoki, “Na kitok, aisapuk enkirukoto ino, metotiwuo te iyie anaa ina niyieu;” neishiu entito enye teina kata.

²⁹Nelo Yesu teine ashep enaiposha e Galilaya; neilepaki oldoinyo neton teine.

³⁰Neyiaya olorere kumok, erikito iltung'ana ng'ojiniaa o lmodook o lemeiro, o lmaiman, o lkulikae kumok neirragie too nkejek enyena, neishiunye pooki,

³¹ometaba anaa neing'asia iltung'ana pee edol eiroro ilemeiro, neishiu ilmaiman, nepuo iltung'ana ng'ojiniaa, nedolishoyu ilmodook, neisis Enkai oo Siraeli.

³²Neipot Yesu lkipaareta lenyena meetu enetii nejoki, “Kaing'urrie iltung'ana amu, nkolong'i uni taata aaboitare nemeeta entoki nanya, nemayieu naisho meshomo eeta esumash, meiterriaa te nkoitoi.”

³³Nejoki lkipaareta lenyena, “Kaji kitumie tena ong'ata imukateni naaraposh ena siamo kitok naba inji?”

³⁴Nejoki Yesu, “Kaja mukateni niaatata?” Nejoki, “Naapishana o lkuti sinkir kutiti.”

³⁵Neitanap iltung'ana metotona te nkop;

³⁶nedumu nena mukateni naapishana o lelo sinkir, ore pee eisho Enkai enashe, nebelibel neisho lkipaareta lenyena pee eisho lkipaareta iltung'ana.

³⁷Nenya pooki neraposho neiturrur mbelat naatelekuaki naaiputa nkikapuni naapishana.

³⁸Ore ilooinosa nera ilewa nkalifuni ong'uan, metii inkituaak o nkera.

³⁹Neisho esiamo meshomo nejing ninye empeut nelo enkop e Magadani.